1078 - Skák og mát og kattaumræður

Þegar maður hefur einu sinni ánetjast tölvuskrapatólunum þá er maður aldrei búinn að öllu sem maður ætlaði að gera þar eða réttara sagt á árans Internetinu. Sama hve hraðvirk og fljót tölvan er að öllu. Alltaf verður eitthvað til að glepja mann og maður fer að lesa einhvern fjárann eða skoða og gleymir því sem maður ætlaði að gera. Rétta ráðið er að forðast þessa ánetjun. Hún er að minnsta kosti eins hættuleg og ofátið sem flestir (sérstaklega tölvuaðdáendur) eru búnir að tileinka sér. Nú er ég semsagt farinn að predika og best að fara út til að leika sér (eða eyða peningum).

Allt er að verða vitlaust útaf köttum (eða fótbolta eða bara Magma Energy). Reyndar vekja kettir mestan áhuga minn af ofantöldu. Í athugasemdum við bloggið mitt um bekkjarmyndina sem ég setti upp um daginn eru þónokkuð fjörugar kattaumræður en ekkert rætt um myndina þó ég hefði frekar búist við því.

Kattaumræður eru víða og allsekki víst að ég hafi séð þær allar. Það er aðalgallinn við Internetið að maður getur aldrei verið viss um að maður sé búinn. Í gamla daga las maður sinn Mogga (eða jafnvel Þjóðvilja) og henti honum svo.

Og svo var Karpov að flækjast á Bahamaeyjum um daginn og ekki sérlega vel tekið. Hann var þar í tilefni af því að þar var haldið svæðamót. (Bjarni sonur minn er á Bahamaeyjum þessa dagana vegna þess að konan hans er þaðan). Hann býður sig fram til embættis forseta FIDE. (Karpov altsvo).  Annars er fullsérhæft að vera að fjölyrða um þetta hérna. Þeir sem áhuga hafa á skák hafa eflaust lesið um þetta á skákhorninu eða á chessbase.com.

Mikið er ég feginn að menn eins og Loftur Altice Þorsteinsson og Vilhjálmur Örn Vilhjálmsson eru andstæðir þeim skoðunum sem ég hef haldið fram varðandi ESB. Þetta segi ég vegna þeirra umræðna sem nú fara fram á Moggablogginu og víðar um nýjasta „afrek" Lofts. Man enn skrif hans um að Jóhanna Sigurðardóttir og Steingrímur J. Sigfússon ættu skilið sömu örlög og Mussolini. Annars finnst mér að ekki eigi að vekja sérstaka athygli á skrifum sem þessum. Velþóknun Moggablokksguðanna á skrifum af þessu tagi er samt undarleg því oft virðast þeir ekki þola mikið.

Athugasemdir

[K.S. 13.7.2010 kl. 08:15]

„Til eru þeir menn, og þær skoðanir, að það varðar velferð og heilsu að vera þeim ósammála með kjafti og klóm.“ Þetta er lauslega þýtt spakmæli kattar sem lengi hefur haldið sig í Öskjuhlíðinni.

Kisi veit að sumir menn eru fljótari en aðrir að svipta af sér hinum þunga kufli siðmenningarinnar og leyfa frumstæðum eðlishvötum sínum að ná yfirhönd. Kisi forðast þá.

[Sæmundur Bjarnason, 13.7.2010 kl. 08:32]

Já, en hinn þunga kufl siðmenningarinnar verðum við að bera því við þykjumst vera dýrunum æðri og berum því vissa ábyrgð á þeim.

[K.S. 13.7.2010 kl. 08:45]

Við tvífætlingarnir þurfum að burðast með hinn þunga kufl siðmenningarinnar vegna þess að við berum ábyrgð á okkur.

[doctore 13.7.2010 kl. 09:01]

Því meira sem ég kynnist mönnum, því vænna þykir mér um kisuna mína... og fiskana mína. :P

[Sæmundur Bjarnason, 13.7.2010 kl. 11:33]

doctore. Friðrik Prússakeisari tók einhvern vegin þannig til orða um hundinn sinn minnir mig endilega að sé frægt í sögunni. Þetta er ekki verra fyrir það og í mörg dýr vantar í rauninni illskuna með öllu.

[Mali the malicious 13.7.2010 kl. 14:52]

''Kufl siðmenningarinnar''. Ég gef nú ekki mikið fyrir það skálkaskjól! Mjá, það held ég. Það er nú likast til.

[Sæmundur Bjarnason, 13.7.2010 kl. 22:44]

Rösklega er riðið í hlað
rétt fyrir sólarlagsbil.
Ég er nú hræddur um það
það er nú líkast til.

Þessi vísa er ekki eftir mig, því miður.

[K.S. 14.7.2010 kl. 00:29]

Upp í flet mér aftur sný

allt er í blautu svaði

og aftur stendur enn á ný

aldin dróg í hlaði.

Þessi vísa er eftir mig. Því er nú verr og miður.