977 - Mér heyrðist svartur ullarlagður detta

Maður kom á bæ og kvaðst vera nær því blindur og þess vegna ekki geta unnið neitt á kvöldvökunni, sem þó var vani hjá næturgestum. Hjálpsamur var hann þó og allt í einu segir hann við eina af konunum sem sátu í baðstofunni við tóvinnu. 

„Mér heyrðist svartur ullarlagður detta." Er það haft að orðtaki síðan.

Ódýrt slapp ég frá blogginu í gær. Endurbirti gamlar færslur. Það er ennþá betra en að vísa í færslurnar eins og sumir gera.

Hver er munurinn á Jóhannesi H. Laxdal og Jóhannesi Laxdal Baldvinssyni? Bara að spögúlera. Nenni ekki að fletta þeim upp í þjóðskrá, gúgla þá eða beita öðrum hefðbundnum aðferðum. Er ekki skráður á Facebook. Moggabloggið virðist þekkja báða.

Vorið er greinilega á næsta leyti. Smáfuglarnir farnir að láta í sér heyra. Ennþá er samt kalt og vel gæti átt eftir að koma hret (Páskahret). Fyrir austan var oft talað um Sýslufundarhret. Veit ekki hvort það er enn við lýði.

Jens Guð er að verða einn af uppáhaldsbloggurunum mínum. Kann að meta sögurnar hans. Ein er á boðstólum núna fyrir páskana og linkar á fleiri. Matar- og neytendaskrifin hans eru líka oft ágæt. Leiðist samt hljómsveitadellan í honum.

Nú mega kvótakóngarnir fara að vara sig. Ætli Jóhanna smali þeim bara ekki saman eins og óþægum köttum? Kattasmölunarmyndbandið sem Steini Briem setti link á hér í athugasemdunum í gær var ágætt. Ömmaliðið virðist ætla að sætta sig við frýjunarorð Jóhönnu þó þau hafi farið svolítið fyrir brjóstið á þeim í upphafi. Ætli stjórnmálahávaðinn verði ekki bara þolanlegur um þessa páska.

En það er hávaði annars staðar. Er að horfa á gosið á Fimmvörðuhálsi í beinni útsendingu þar sem nýja sprungan opnaðist í kvöld og má ekki vera að því að skrifa mikið núna. Þetta er líka orðið ágætt.

Athugasemdir

[Sigurður Þór Guðjónsson, 1.4.2010 kl. 01:20]

Það er nú búið að vera hret í eina fimm daga!

[Brjánn Guðjónsson, 1.4.2010 kl. 07:57]

endilega, skelltu þér á facebook, þar er margt um góðan manninn. Siggi og Mali meðal annars :) alla vega Siggi. Mali hefur lítið sem ekkert tjáð sig þar.

[Kama Sutra, 1.4.2010 kl. 09:18]

Mali tjáir sig bara við sérstaka vildarvini.

Hann er hefðarköttur og er ekki síbreimandi í allar áttir eins og óstýriláta kattastóðið hennar Jóhönnu niðri á Alþingi.

Mjá bara.

[Sæmundur Bjarnason, 1.4.2010 kl. 10:33]

Takk öll.

Ég viðurkenni að það hefur verið fremur kalt hér í Kópavoginum undanfarna daga en ágætis gluggaveður samt.

Ég þrjóskaðist lengi við að fara að blogga sjálfur. Las bara annarra blog. Svo kom að því og þá get ég helst ekki hætt. Gæti orðið svipað með Fésbókina.

[Jóhannes Laxdal Baldvinsson, 1.4.2010 kl. 10:58]

Sæll Sæmundur, þú spyrð hver sá Jóhannes H. Laxdal sé, sem er með skráð blogg hér á blog.is og ég verð víst að gangast við króganum Hann er sonur minn, en að öðru leyti tek ég ekki ábyrgð á skoðunum hans.

Í gær endurbirtirðu sérstakan pistil, þar sem þú fullyrtir að:, "Maðurinn er herra jarðarinnar og ber því ábyrgð á öðrum dýrategundum" Þessu get ég ekki verið sammála, vegna þess að maðurinn er bara lítið hjól í náttúrunni og áhrif hans eru stórlega vanmetin. Veiðieðlið er ein af frumhvötunum sem er nauðsynleg til að komast af. Ennþá eymir eftir af þeirri hvöt hjá mörgum. Ég geri ekki athugasemdir við að veiða og drepa til að komast af (survival of the fittest og allt það..) en sport og skemmtiveiði er lítilmannleg. Og veiða og sleppa er ein birtingarmynd þeirrar hræsni sem tröllríður nútíma þjóðfélögum, þar sem menn eru í svo mikilli tilvistarkreppu að búin hefur verið til eitthvað sem kallað er á útlensku "political correctness" og margir éta upp til að þurfa ekki að taka afstöðu.

Furðuleg var öll þessi kattaumræða og skrítið hvað menn voru lengi að kveikja. Ég afgreiddi málið fyrir 3 dögum með þessari stöku sem ég leyfi mér að endurbirta með leyfi síðuhaldara og að hans hætti, Sæmundarhættinum alkunna

Ríkisstjórn sem reikult fley
ef raðir ekki þéttir
Vöndinn kyssa vilja ei
vinstri grænir kettir

[Sæmundur Bjarnason, 1.4.2010 kl. 12:41]

Sæll Jóhannes. Hefði kannski átt að segja að "Maðurinn teldi sig vera herra Jarðarinnar o.s.frv." Annars er ég að mestu sammála þér um þessi dýramál en þó finnst mér þú gera of mikið úr veiðieðlinu sem frumhvöt.

Já, kattaumræðan er skrýtin, en eru ekki vinstri grænu kettirnir að gefa sig?

[Sigurður Þór Guðjónsson, 1.4.2010 kl. 14:32]

Ef Sæmi kemur á feisbúkk ætlar Mali að tjá sig þar og láta til sín taka.

[Þorsteinn Briem, 1.4.2010 kl. 19:29]

Óli Gränz er tæpur, tens,
tómt sér skens hann alveg lens,
lítill séns hann lesi Jens,
lostugt glens og kossaflens.