2766 - App er happ

„Pantaðu bíl með Hreyfilsappinu og þú ræður ferðinni“. Þessi setning eða önnur álíka dynur sýknt og heilagt á manni. Með þessu er verið að gefa í skyn að sé ekki pantaður bíll með Hreyfilsappinu geti maður engu ráðið um hvert er farið. Slíkt hlýtur að vera hin mesta vitleysa, en hugsanlegt er að þetta fæli samt frá. Annars er þetta með appið efni í langan fyrirlestur um ensk áhrif og þessháttar. Sleppi því samt að þessu sinni. Geðvonsku lokið.

Grettir sterki „var lítt vaxinn niður“ eftir því sem griðkonan sagði. Samt var hann með sterkustu mönnum. Þetta leiðir hugann að því hvort alltaf sé fremur lítið undir mönnum sem sterkir eru. Ekki er mér kunnugt um hvort þetta hefur verið rannsakað. Svo er líka sagt að lítið sé undir mönnum sem vilja eiga sem stærsta bíla. Kannski er þetta allt tilkomið af öfund. Hvað veit ég? Ekki er ég sterkur eða eigandi að stórum bíl.

Sennilega er best fyrir Íslendinga að falla sem fyrst niður í B-flokk í þjóðadeildinni í knattspyrnu. Þar ætti að vera möguleiki að vinna einn og einn leik. Í A-deildinni virðist ekki vera mikill möguleiki á því. Kannski landsliðið okkar í knttspyrnu sé ekkert sérlega sterkt. Hingað til hafi það bara oft verið vanmetið vegna þess að við erum svo fá. Líta má svo á að flestar aðrar þjóðir í Evrópu leggi minni áherslu en við á landsliðin á kostnað félagsliðanna. Ekki verður bæði sleppt og haldið. Þegar heimsmeistaramót o.þ.h. eru haldin vilja þjóðirnar þó að sjálfsögðu standa sig vel. Þar kemur metnaður og föðurlandsást við sögu. Annars er fótbolti ekki í sérstöku afhaldi hjá mér.

Pólitískt séð virðist Washington Post vera dálítið vinstrisinnaðara en New York Times. Gagnrýni þess blaðs á Donald Trump virðist beinskeytt og markviss. NYT vill gjarnan vera yfir flokkapólitík hafið. Þegar það blað segir að háttsettur maður í ríkisstjórn Trumps hafi skrifað þeim bréf kemst jafnvel sjálfur Trump ekki hjá því að trúa þeim. Hann heldur samt áfram að hafa allan sinn fréttafróðleik úr FOX-sjónvarpsstöðinni og skilur það sem þar er sagt með sínum skilningi og kallar pressuna alla óvini þjóðarinnar. Tístið hans á Twitter er víst eini marktæki fjölmiðillinn.

Að það skuli kvikna í útfrá gassprengingum í 60 til 80 húsum svotil samtímis í einu af úthverfum Boston er til þess fallið að kenna gasfélaginu um. Gasleiðslurnar eru víst meira en hundrað ára gamlar og á því svæði sem þær ná til eiga víst heima um 130 þúsund manns. Ekki er ástæða til að efast um að þetta verði rannsakað til hlítar, jafnvel þó ekki sé um tiltölulega ríkt fólk að ræða. Aftur á móti voru sumir íbúar Puerto Rico, sem er bandarískt sjálfstjórnarsvæði, án rafmagns í næstum heilt ár án þess að alríkisstjórnin skipti sér af því.  

Að það kosti yfir 400 milljónir að lappa uppá gamlan bragga í Nauthólsvíkinni finnst mér heldur mikið. Auðvitað þarf að gera þetta almennilega en fyrr má nú aldeilis fyrrvera. Hefði ekki verið betra að dreifa þessum milljónum yfir túrhestana í Austurstræti? Eiginlega eru ferðamennirnir búnir að eyðileggja Íslandið með yfirgangi sínum. Fer annars nokkur maður ótilneyddur niður í Miðbæ nú orðið? Einhverjir stritast enn við að eiga heima þar eða í Þingholtunum en sem betur fer eru þeir fáir.

IMG 7811Einhver mynd.


« Síðasta færsla | Næsta færsla »

Athugasemdir

1 Smámynd: Þorsteinn Briem

Sautján þúsund manns ganga eða hjóla í Bankastrætinu og á neðsta hluta Laugavegarins að meðaltali á degi hverjum, eða 6,2 milljónir manna á ári.

Þriðjungur Reykvíkinga býr vestan Kringlumýrarbrautar og þar eru langflest hótel, gistiheimili og veitingastaðir á höfuðborgarsvæðinu.

Og þar vilja flestir Reykvíkingar búa samkvæmt skoðanakönnunum.

Þorsteinn Briem, 15.9.2018 kl. 10:47

2 Smámynd: Sæmundur Bjarnason

Í bráðum 80 ár hef ég að sjálfsögðu átt víða heima. Vesturbæingur hef ég þó aldrei verið. Hér á Akranesi er allt fremur rólegt. Bílaumferð ekki mjög mikil. Göngustigar margir og á flestan hátt gott að búa í ellinni. Skoðanakannanir eru bara meðaltöl.

Sæmundur Bjarnason, 15.9.2018 kl. 16:23

3 identicon

Sæll Sæmundur.

Hreyfill hefur svo sannarlega efni á að
auglýsa þjónustu sína því annað eins mannval hef
ég aldrei vitað á einum vinnustað.

Þessir starfsmenn eru tilbúnir að leysa hvers manns vanda
um það get ég gleggst vottað og vitnað og vonum seinna að
ég þakki fyrir einstaka þjónustu.

Auglýsing þeirra er mér jafnvel ljúfari tónlist
en Beethoven og Bach til samans!

Húsari. 15.9.2018 kl. 19:10

4 identicon

Sæll Sæmundur. Hef ekkert vit á appi. Og því síður hef ég vit á pólitískum og ópólitískum skoðunum á Hreyfli. Veit bara að Sjóvá tryggingar eru víst með vegaþjónustusamning við Hreyfil, því ég þurfti að fá þjónustu frá Sjóvá tryggingafélaginu mínu síðastliðinn miðvikudag til að fá start á bílinn. Og ekkert út á þá þjónustu að setja.

App er ekki eitthvað sem ég kann að tjá mig um af nokkru viti til neins gagns. Kann hreinlega ekkert á það.

Í dag rakst ég á tvö myndbönd á youtube sem mér fannst umhugsunarverð svo ekki sé sterkar að orði kveðið, fyrir alla ólíka, með og án apps.

Youtube: 5G is a sterilization & eugenics program - debora tavares

Youtube: 5G transhumanism; your life will never be your own again

M.b.kv.

Anna Sigríður Guðmundsdóttir 15.9.2018 kl. 22:44

5 Smámynd: Þorsteinn Siglaugsson

Fólkið sem gengur um Bankastræti er ekki Reykvíkingar að sækja sér þangað þjónustu. Það eru ferðamenn. Reykvíkingar fara í Kringluna eða Smáralind til að versla, ekki í miðbæinn.

Þorsteinn Siglaugsson, 16.9.2018 kl. 20:43

6 Smámynd: Sæmundur Bjarnason

Húsari, ég var ekki að tala um nema að mér þætti auglýsingin hjá þeim misheppnuð. Ekkert um þjónustuna.

Sæmundur Bjarnason, 16.9.2018 kl. 22:19

7 Smámynd: Sæmundur Bjarnason

Anna, ég skil ekki innleggið þitt fullkomlega. Skipti sjálfur hvað tryggingar varðar við Sjóvá. Linkarnir virðast ekki virka. App held ég að sé stytting á enska orðinu application sem getur svosem þýtt forrit eða eitthvað sem maður notar.

Sæmundur Bjarnason, 16.9.2018 kl. 22:24

8 Smámynd: Sæmundur Bjarnason

Þorsteinn, einmitt. Sennilega eru það ekki margir Íslendingar sem GANGA niður Bankastræti. Einhverjir gera það samt.

Sæmundur Bjarnason, 16.9.2018 kl. 22:26

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Innskráning

Ath. Vinsamlegast kveikið á Javascript til að hefja innskráningu.

Hafðu samband