1113 - Blogg vs. fésbók

Því segi ég það. Bloggið er betra en árans fésbókin. Hún hentar samt ágætlega til sumra hluta. En séu menn haldnir messufíkn eins og ég þá er bloggið betra. Þetta með messufíknina tengist þó ekki Guðsorði. Ég er heldur á móti því en finnst gaman að messa yfir fólki og er vanur því. Semsagt einskonar besservisser. Verst hvað fáir nenna að kommenta hjá mér. Skil það samt vel. Ekki kommenta ég víða. Les þó talsvert af því sem á Netið fer. Fréttir líka. 

Gera má greinarmun á bloggi og greinaskrifum. Sumir sem látast vera að blogga eru í rauninni að skrifa greinar. Slík blogg les ég oft. Einkum ef greinarnar eru ekki of langar. Ef þær eru það þreytist ég gjarnan og hætti. Ímynda mér að það sé vegna þess að ég veð oftast úr einu í annað sem fólk les bloggin mín. Nú er ég farinn að skilgreina blogg. Blogg er bara það sem ég segi að sé blogg. Svona vinna besservisserar.

Er búinn að finna ný nöfn á Facebook. Fjasbók gæti hún sem best heitið eða til dæmis Skvaldurskinna. Annars dettur mér jafnan í hug málshátturinn sem er einhvernvegin svona: „Kært barn hefur mörg nöfn." Það er alveg rétt. Ef menn hafa nenningu til að fjasa um nafnið á fyrirbrigðinu þá finnst þeim það einhvers virði.

Minntist á trúmál í síðustu færslu. Það var eins og við manninn mælt, margur þurfti að kommenta. Rök eru að mestu ónýt í trúmálaumræðu, þessvegna verður hún oft svona illvíg. Bíð eftir bókinni um netofbeldið.

Tölvur og tölvutækni allskonar skipar æ stærri sess í lífi nútímmannsins. Margt sem ekki þekktist fyrir nokkrum áratugum þykir sjálfsagt núna. Ætla ekki í neina upptalningu á slíku, en þessi þróun á mikinn þátt í þeim lífsgæðum sem við Íslendingar höfum notið undanfarið. Nýjungagirni okkar er talsverð og stundum sjáumst við ekki fyrir og ýmislegt fer aflaga. Nú er ég farinn að nálgast hrunumræðu og stjórnmál svo það er best að hætta.

Athugasemdir

[Billi bilaði, 19.8.2010 kl. 03:31]

Ég á líka við þann vanda að etja að fasa út við lestur langra pistla, sé mér ekki þess meira umhugað um efnið.

[Matthías Ásgeirsson, 19.8.2010 kl. 08:34]

Ekki get ég séð að þetta sé mjög "illvíg" trúmálaumræða við síðustu færslu.

[Sæmundur Bjarnason, 19.8.2010 kl. 11:28]

Kannski ekki, en deila Grefils og Kristins var það tvímælalaust.

[Emil Hannes Valgeirsson, 19.8.2010 kl. 12:26]

Ég skoða kannski þessar trúmálaumræður þegar niðurstaða er fengin og allir orðnir sammála.

[doctore 19.8.2010 kl. 14:40]

Það er ekki hægt að vinna á trúarbrögðum með rökum/ langlokum með twisted pælingum.


Svo er wordpress besta blog kerfið... kerfið er geggjað gott; Maður hefur líka algert málfrelsi... ekki ein aðvörun hjá mér :)

[Sigurður Hreiðar, 19.8.2010 kl. 21:57]

Satt að segja finnst mér þú vaða fullmikið úr einu í annað án þess stundum að hafa nokkuð til málanna að leggja. Er sammála þér um að of langir pistlar verða leiðinlegir. Þá er betra að skipta efninu í tvennt eða þrennt og hafa framhald í næsta blaði.

Um fésu: Það er hægt að kalla hana ýmsum nöfnum en hún skánar ekki við það og mig stórundar vinsældir hennar. Sjálfur kýs ég að kalla hana Smettu. Skírskotar til smettis (=andlits, féss) og sögusmettu (=slaðurskjóðu, kjaftatussu - og tussa hér að sjálfsögðu í merkingunni skjóða).

[Sæmundur Bjarnason, 19.8.2010 kl. 23:57]

Takk allir.
DoctorE. Kannski er Wordpress best. Mér finnst bara gott að einhverjir aðrir en ég sinni því að halda kerfinu í lagi. Kostar að vísu að ég verð að einhverju leyti að skrifa eins og eigendurnir vilja.
Sigurður. Það getur vel verið að ég hafi stundum lítið til málanna að leggja. Gallinn er bara sá að maður finnur það ekki alltaf sjálfur. Finnst jafnvel allt sjálfsagt sem maður segir og skrifar.