3166 - Minningar o.fl.

Gleymdi víst að setja mynd með síðasta bloggi, en það gerir lítið til. Set samt varla 2 núna.

Er ekki nærri búinn að jafna mig á veikindunum og næst á dagskrá er að fá aðstoð við að kaupa inn. Það er handleggur fyrir mann eins og mig að trasporta öllu sem þarf til heimilisins uppá fjórðu hæð. Endurhæfing gengur ekki eins vel og ég hélt að hún mundi gera. Í síðustu viku ofgerði ég mér greinilega og það endaði með því að ég datt. Meiddi mig að vísu ekkert en nú er ég svo hræddur við að detta að mér hefur farið aftur.

Erum búin að sækja um að komast á heilsuhæli NLFÍ í Hveragerði og það ætti að ganga. Veit samt ekki hvenær það verður.

Ekki er bloggnáttúran komin alveg yfir mig aftur, en kannski stendur það til bóta. A.m.k. hef ég skoðanir á ýmsu, þó það sé kannski tóm vitleysa. Mér datt t.d. ekki í hug að vantrauststillagan sem flutt var um daginn á Alþingi næði fram að ganga þó ég væri að mörgu leyti sammála þeim sem fluttu hana. Svokölluð „Virðing Alþingis“ fer síminnkandi.

Um ýmislegt mætti svosem skrifa. Ég man t.d. svo langt aftur að 170.000 Ísleningar voru til og brennivínsflaskan kostaði 170 krónur (gamlar krónur, vel að merkja). Mig minnir endilega að þetta hafi verið um svipað leyti. Það kann þó að vera misminni.

Ég man ekki eftir rauðum hundraðköllum, en ég þykist muna eftir því að pakki af Camel-sígrettum hafi einhverntím verið álíka dýr og kíló af kjötfarsi og eitt sinn kostði ekki nema 3 gamlar krónur á bíó (Barnamiði) og þar að auki fæddist ég í konungsríkinu Íslandi. Já, ég hef marga fjöruna sopið.

Einhver mynd.

3165 - Ýmislegt o.fl.

Ég er að hugsa um að fara að blogga oftar en ég hef gert að undanförnu. Ég er búinn að skila göngugridinni sem fékk lánaða á sjúkrahúsinu. Samt er ég hálfragur við að fara langt án stuðnings. Fór t.d. ekki í sjúkraleikfimi í dag (þriðjudag) því mér fannst fullmikill vindur.

Í dag er miðvikudagur og ekkert sérstakt liggur fyrir. Kötturinn er hálfóánægður núna því hann fékk ekki flóaða mjólk í gærkvöldi eins og hann er vanur. Gaf honun pínulítið af harðfiski í staðinn.

Kannski ég hafi þetta einsog einskonar dagbók, en þá verð ég að passa að skrifa bara um það sem allir mega vita. Um daginn (sennilega á mánudaginn) komu systur Áslaugar þær Hafdís og Kiddý ásamt Þór og Sollu í heimsókn hingað. Hafdís og Jói komu svo líka og svo þurfti Áslaug að fara og sitja yfir á sýningu listfélagsins í björgunarfélagshúsinu. Þangað konu dálítið margir og kannski hefur Áslaug nælt sér í veikindin þar.

Bjarni kom svo í snögga heimsókn í gær og skilaði skyrtum og þ.h. sem Tinna vildi ekki nota.

Eitthvað miðar mér við vinsældirnar, það er samt litið að marka slíkar vinsældir. T.d. held ég að Palli falli eitthvað í vinsældum þegar Samherjamálinu lýkur, sem væntanlega verður einhverntíma.

Annars er þetta pólitískt mál og ég hef ekki mikinn áhuga á því. Þó get ég alveg reynt að spá um hvernin það endar. Kata bjargar sennilega sínu fólki hverjir sem það eru.

Ég get líka reynt að spá um hverning Ukrainustríðið muni enda. Pútín bjargar sennilega andlitinu með því að semja um smávægilegan ávinning. Aðalspurningin er hvernig Bandaríkjamönnum gangi að fá Selenski og Co. til að gefa pínulítið eftir. Pútín þarf nefnilega að geta sýnt framá árangur sem hann líklega mun mikla sem mest.

Kalt stríð milli Rússa og Kínverja annars vegar og Nato og einkum Bandaríkjamanna hinsvegar er liklegt að geysi næstu ár og allir gleymi svonefdri hnatthlýnun á meðan.

Einhver mynd.

3164 - Ýmislegt

Ég sé að einhver ruglingur er á myndunum, sem ég læt yfirleitt fylgja bloggum mínum. Það stafar af því að ruglingur hefur verið á þeim við upphaflega notkun. Ég held að ég hafi látið þess getið að allar þessar myndin eru endurnotaðar.

Ekki hefur margt gerst í mínu lífi síðan siðast.Tinna kom hingað í gær á föstudagskvöldi og fór svo og hitti vinkonu sína. Bjarni kom svo úr vinnunni um tólfleytið og kom skikki á sjónvarpið, en okkur hafði með fikti tekist að fokka því upp og kunnum ekki að lagfæra það. Bjarni sótti nýtt RUV-app og þar með var það komið í lag.

Áslaug er veik. Veit ekki hvað það er. Hugsalega er það flensa.

Mikið gengur á útaf rafbyssum fyrir lögguna. Heldur er ég á móti þeirri aðferð sem notuð er. Ef löggunni finnst hún öruggari með rafbyssur og þær eru notaðar skynsanlega finnst mér það komi til greina að fá þeim þannig byssur. Að hægt sé að möndla þetta með einfaldri reglugerðarbreytingu sýnir vel hve vald ráðherra er mikið. Með þessu verður vald forsætisráðherra minna en áður. Það skiptir líka máli. Annars hef ég ekki sterkar skoðanir á þessu öllu saman. Samskipti mín við lögregluþjóna hafa hingað til verið hnökralaus. Þeir geta samt gert vitleysur eins og aðrir.

Menntamál og öldrnarmál eru mér mun hugleiknari. Eftir nýjust breytingu hef ég um 400 þúsund á mánuði fyrir það eitt að vera til. Ríkið og VR hefðu semsagt grætt ef ég hefði drepist um daginn.

Einhver mynd.

3163 - Er kovítið búið?

Ekki er ég alveg frá því að einhverjir séu búnir að fá leið á fésbókinni og jafnvel komnir aftur hingað á Moggabloggið. Þetta er bara tilfinning og kannski er ekkert að marka hana.

Sko mig, fingrasetningin er að koma til baka og ég var ekki nema 2 mínútur eða svo að skrifa klausuna hér á undan. Annars er ekki rétt að gera þetta blogg of pesónulegt. Kannski er það samt einmitt rétta ráðið. Stórhausunum fjölgar ekki og það virðist vera erfitt að komast í 50 manna hópinn. Ef ég les rétt þá er ég númer 69 í vinsældum núna.

Verst er að ég er ekki sérhæfður í neinu. Gurrí skrifar ansi persónulega, enda býr hún á Akranesi eins og ég. Flestir virðast skrifa um pólitík, en mér leiðist hún fremur en hitt og svo skrifa sumir um popp og það sem þeir finna á Internetinu (Jens Guð).

Þessum skrifun byrjaði ég á aðfaranótt föstudagsins 17. Mars og ætla að klára þetta annað kvöld. Þetta er nefnilega í styttra lagi.

Fékk í jólagjöf ísmolavél. Kötturinn hefur mikinn áhuga fyrir henni og situr og bíður eftir því að ísmolarir detti. Hefur líka komist upp á lag með að lyfta plastlokinu með trýninu og láta það skella aftur. Óþolandi hegðun.

Er farinn að geta gengið um innanhúss án þess að nota göngugrindina. Fullur máttur í fótunum er þó ekki í boði. Konan mín gengur um með hækju eða hækjur. Hún fékk senda göngugrind sem dugar mér ágælega og er talsvert bílvænni en skrímslið sem ég var með í láni frá sjúkrahúsinu hér á Akranesi. Verst er jafnan að standa upp og ef ég dett er ég alveg bjargarlaus.

Þetta er nú orðið nægilega langt og ef ég fer ekki uppúr 69da sæti á vinsældalistanum við þetta, verð ég reiður. Samt ekki eins reiður og ég varð einu sinni á öndunarvélinni. En sleppum því. Ég ætla ekki að skrifa um allar ímyndanirnar og ranghugmyndirnar sem ég fékk þar. Það er lífsreylsla sem ekki verður frá mér tekin. Ég vissi vel að ég var við dauðans dyr.

Nú er ég hættur. Í dag eru 61 ár frá því við trúlofuðum okkur ég og Áslaug.

Einhver mynd.

3162 - Enn um Covid

3162 – Enn um Covid

Sannarlega er kominn tími til að skrifa mars-blogg og ekki er örgrannt um það að ég fari hvað líður að blogga reglulega. Þó er engu að treysta um það.

Hef undanfarið verið að fylgjast með „STORM“-þáttunum í sjónvarpi allra landsmanna. Þar er látið eins og Covid-19 tilheyri fortíðinni. Sjálfsagt er svo fyrir mörgum. En ekki mér. Fyrir mér er þessi drepsótt að byrja núna. Sóttkvíin hentaði mér ágætlega.Var rétt dauður að þessu sinni. Fékk þennan andskota ofan í lungnabólgu fyrir jól og er svotil nýsloppinn út af spítala og hvergi nærri búinn að jafna mig. Skilst að læknar hafi deilt um hvort ég ætti mér lífsvon eða ekki. Fór að ég held þrívegis í öndunarvél er mér sagt, og gerður var á mér barkaskurður, lagað magasár o.s.frv. Og ekki nóg með það, heldur datt konan min og lærbrotnaði. Nelgd saman í Rvík og lá um hríð á sama spítala og ég. Þ.e.a.s. á Akranesi. Þar með var kettlingurinn orðinn einn eftir á heimilinu og gat ómögulega séð um sig sjálfur, svo honum var komið í fóstur. Þar voru kettir fyrir. Þó hann sé mannelskur þolir hann ekki aðra ketti, svo finna varð annað fóstur. Það tókst og nú erum við öll saman aftur.

En fjölyrðum ekki un þetta. Þið verðið enn um sinn að sjá bloggið mitt og jafnvel lesa það, þó ég hafi ekkert að segja.  

Mikið er talað um Nígeríu þessa dagana og sögu þess ríkis, en hvergi hef ég séð minnst á Biafra sem hlýtur þó að vera elstu kynslóðinni ofarlega í huga þegar minnst er á sögu Nígeríu. Kannski var það bara á Íslandi sem þetta stríð vakti athygli, en mig minnir að fjölmiðlar hafi verið ákaflega uppteknir af því.

Einhver mynd.

3161 - Verkfall vs verkbann

Hvernig hægt er að tala um tiðindi dagsins án þess að minnast á verkalýðsmál er mér hulin ráðgáta. Íslensk verkalýðsbarátta hefur ekki alltaf farið eftir ítrustu lagakröfum. Segja má að mörg þeirra réttlætismála sem þar hefur áunnist hafi unnist vegna baráttu einstakra verkalýðsfélaga.

Ég álít að verkbann það sem atvinnurekendur hafa boðað verði fellt. Úrslit verða ljós á morgun svo ekki þarf lengi að bíða eftir hvort ég hef rétt fyrir mér.

Það er nú svo að auk þess að vera lengi að hugsa nú eftir veikindin er ég lengi að vélrita. Læt ég því staðar numið að sinni.

Einhver mynd.

3160 - Covait-19 og lungnabólga, ásamt ýmsu öðru.

3160 – Covait-19 og lungnabólga ásamt ýmsu fleiru.

Nei, ég er ekki alveg dauður enn, þó legið hafi nærri að þessu sinni. Var á spítala allan janúar og hluta af desember og febrúar. Vil ekki ræða það sem þar gerðist nema fram komi sértækar spurningar um það, en það er ástæðan til þess að ég bloggaði ekki neitt i janúar s.l.

Nú er ég ekki nema rúmlega 90 kg. Mæli samt alls ekki með þessari aðferð til megrunar. Hún er erfið og gott ef ekki lifshættuleg.

Einhver mynd.

3159 - Kattablogg einu sinni enn

Myndin sem fylgdi síðasta bloggi var ekki af Doppu Dimmalimm heldur af Elizabeth von Kattholt, sem nú er dáin. Myndir eru til af Doppu en ég skirrist við að birta þær. Það var fyrir hreina tilviljun sem myndin af Lísu (eins og hún var yfirleitt kölluð) birtist þarna. Ég er nefnilega önnum kafinn við að endurnýta myndir. Þar að auki veit ég ekki hvort nokkur eftirspurn er eftir Doppu-myndum.

Held að Lísa hafi á sínum tíma kostað krónu. Kannski var það Hólmfríður Högnadóttir sem kostaði eina krónu á sínum tíma. Eiginlega finnst mér að allt ætti að kosta eina krónu í Krónunni, en það er önnur saga. Man eftir mjólkurstríðinu milli Bónuss og Krónunnar. Það var nokkru seinna sem ég gerði athugasemd við strarfsmann Krónunnar útaf verðmerkingu. Þá var mér sagt að þetta væri svona samkvæmt beinum og skýrum fyrirmælum forsætisráðherra landsins, sem á þeim tíma var Jóhanna Sigurðardóttir. Mér féll allur ketill í eld við þessar upplýsingar og sagði ekki múkk meira.

En þetta var útúrdúr. Man ekkert hvað ég ætlaði að skrifa um, en líklega er þetta orðið alveg passlega langt blogg að þessu sinni.

Jú, ég held að ég hafi ætlað að skrifa eitthvað um sálarlíf katta, þó ég sé nú enginn sérfræðingur á því sviði. Kattafólk ætti að fylgjast með þessu bloggi, því vel getur verið að ég geri alvöru úr þessu bráðlega. Mér finnst merkilegra að skrifa um það en að skrifa daglega um Samherja eins og sumir gera.

Einhver mynd.

3158 - Doppa Dimmalimm

Það var eins og mig grunaði. Kötturinn sem við fengum hjá Bjarna og Tinna átti að fá er hagmæltur. Þó það hafi ekki komið í ljós fyrr en núna þegar hann er orðinn meira en sjö mánaða gamall er enginn vafi á þessu. Meira aftar í þessu bloggi.

Það var nefnilega þannig að Áslaug Ben. konan mín fékk Covid-19. Ég var af því tilefni sendur snimmhendis í Hafnarfjörð suður í nokkurs konar sóttkví hjá Benedikt syni mínum. Í ljós kom þó að það var að mestu marklaust, því ég var þegar smitaður. Þegar það kom í ljós fór ég heimleiðis hingað á Akranes aftur, sömuleiðis í sóttkví. Síðan hef ég rembst við að láta mér batna.

En aftur að kettinum henni Doppu Dimmalimm. Hún er af Hvalfjarðarættum, en mér skilst að þar hafi sundkunnátta verið nokkur í fornöld og eflaust hafa einhverjir verið hagmæltir þar. Í þjóðsagnasöfnum (veit ekki hve mörgum) er getið um Árna í Botni, eflaust er átt við Hvalfjarðarbotn þar (sbr, Botnssúlur). En fjölyrðum ekki meira um það.

Þegar við tókum hana að okkur var eitthvað liðið á júní í sumar. Þá var hún „kassavön“ sem kallað er og eins og köttur í laginu. Að öðru leyti var hún pínulítil. Fæðingardagur hennar er 8. maí, en opinber fæðingardagur hennar er 10. maí.

Ekki er það með öllu óþekkt að kettir séu ljóðelskir og hagmæltir. Þó held ég að sjaldgæft sé að kettir byrji á slíku á svo ungum aldri sem hún. Sennilega gefur hún út ljóðabók um eða fyrir fermingu. Ég hef svosem fundið að hún er mjög forn í skapi, en mig óraði ekki fyrir þessum hæfileikun hennar.

Þessari vísu gaukaði hún að mér í dag. Ég get ekki annað en sett hana hingað:

Atlot Covids eru dýr.
Eins og Jólin sanna.
Eðalmaður aftur snýr.
Unnin Lokasenna.

Mér finnst nú þetta með Lokasennuna vera fulllangt seilst. En vísan er sæmileg, miðað við aldur og fyrri störf.

Einhver mynd.

3157 - Um fótbolta og fleira

Sé að ég hef gleymt að setja myndina neðst, sem ég setti með síðasta bloggi. Allar þessar myndir hef ég sjálfur tekið og þær eru endurnýttar.

Apropos myndir. Ég borgaði Moggatetrinu eitt sinn 1000 krónur fyrir aukið pláss undir myndir og hef sett þær margar upp síðan. Annars er það ekki aðallega fyrir sparsemis sakir sem ég nota myndir oftar en einu sinn með bloggi. Það er ólíkt minna vesen fólgið í því.

Fyrir utan Jólin hugsa sumir um fótbolta um þessar mundir. Man óljóst eftir HM í fótbolta í Svíþjóð 1958. Þar held ég að Pele hafi verið 17 ára og skorað þrjú mörk í úrslitaleiknum í 5:2 sigri Braslíumanna. Hann er tvímælalaust merkasti knattspyrnumaður sem uppi hefur verið. Ég hef þá trú að Brasilíumenn verði heimsmeistarar að þessu sinni og leiki úrslitleik við Frakka. A.m.k. vona ég að Englendinar verði ekki heimsmeistarar. Veit ekki af hverju það er. Enska knattspyrnan er allavega samt mjög vinsæl hér á Íslandi.

Hafði enga hugmynd um spilafíkn Michaels Jordan og fleiri vandræði. Finnst hann hafa verið merkasi körfuboltamaður heimsins á sinni tíð. Ekki meira um íþróttir að sinni.

Einhver mynd.