799 - Úr einu í annað

Sparisjóðsstjórinn sat á stjórnarfundi þar sem mikilvægar og leynilegar ákvarðanir um framtíð fyrirtækisins voru teknar. Eiginkona hans seldi nokkrum dögum seinna bréf í fyrirtækinu. Auðvitað bjó hún ekki yfir neinum innherjaupplýsingum. Slíkt er aðeins mögulegt að sanna ef upptökur eru til af öllum samskiptum þeirra hjóna á tímabilinu. Þær eru víst ekki til.

Mikið er fjargviðrast í fjölmiðlum og fésbókum útaf Helga Hóseassyni. Nær hefði nú verið að gera eitthvað fyrir kallinn meðan hann lifði. Kannski hefði hann ekki einu sinni þegið það. Skilst að hann hafi verið sérvitur með afbrigðum. Nú vantar sárlega mann sem kann að hanna skilti. Hóseas-hönnunin er dálítið gamaldags.

Nú man ég eftir öðru sem Stiglitz sagði. Hann sagði að flatur niðurskurður af öllum skuldum væri della. Sigmundur Davíð sagði 20 prósent, Lilja sagði 4 milljónir, einhver sagði meira og sumir slógu úr og í og sögðu að skera mætti smá eða jafnvel mikið, þó ekki of mikið o.s.frv. Fátækir skulda lítið og fá lítinn afslátt. Ríkir skulda mikið og fá mikinn afslátt.

Það voru neyðarlögin svokölluðu sem fóru verst með okkur. Að tryggja hundrað prósent eina tegund af skuldum var fáránleg vitleysa. Hvernig hægt var að telja þingheimi trú um að skynsemisvottur væri í þessu skil ég ekki. Ekki þurfti annað en að seðlabankinn tryggði Visa-greiðslur að vissu hámarki til að ekki færi allt í kaos. Svo máttu allir fara á hausinn sem voru á leiðinni á hausinn.

Auðvitað er ekki erfitt að vera gáfaður eftirá. Það geta allir. Bæði Alþingismenn og aðrir. Fyrirfram og meðan á málum stendur er þetta oft mun erfiðara.

Í forsíðufyrirsögn í Mogga sjálfum segir í dag: "Fátt skemmtilegra en að fara á fjöll." Ég er nú svo takmarkaður að þetta minnir mig á vísuna:

Skólapiltar fara á fjöll
og faðma heimasætur.
Ungar stúlkur elska böll,
einkanlega um nætur.

Þarna skiptir máli röddun eða ekki röddun og er oft gaman að leika sér að slíku. Önnur vísa sem gaukað var að mér um daginn er svona:

Hef ég alltaf á því gát
yfirsjónir bæta.
Þegar tungan mín er mát
mun ég kverkar væta.

Sagt hefur verið að íslensk vísnagerð rísi hæst í drykkjuvísum, hestavísum og klámvísum. Líklega er það rétt.

Gísli Ingvarsson er ekki skráður sem bloggvinur minn þó Moggabloggari sé. Hann bloggar sjaldan en um daginn skrifaði hann ágæta grein um ESB á bloggið sitt og kallar hana "Þetta eru "engin rök" Fyrir Birgittur Borgaranna. Lesið hana ef þið eruð að velta ESB fyrir ykkur. Já, hann er meðmæltur aðild.

Og fjórar myndir.

Blómstrandi kaktus.

Stökkpallur.

Landslag í Reykjavík.

Sólarlag í Reykjavík.

Athugasemdir

[DoctorE 10.9.2009 kl. 07:21]

Internetið eru nútíma skilti.

En þetta krimmalið allt saman stólar einfaldlega á að við séum heimsk, og við erum heimsk ef við látum þetta rugla allt saman viðgangast.
Málið er bara að við erum höfuðlaus her í baráttu við mafíósa

[Svanur Gísli Þorkelsson, 10.9.2009 kl. 12:40]

 

Skilgreining á fjárhagslega tengdum aðilum.

Eftirtaldir aðilar skulu teljast fjárhagslega tengdir innherjum í skilningi IX. kafla verðbréfa­viðskipta­laga og reglna þessara:

1. Maki, maki í staðfestri samvist og sambúðarmaki,
2. ófjárráða börn, kjörbörn og stjúpbörn á heimili innherja,
3. önnur skyldmenni sem búa á heimili með innherja og hafa búið á heimili með innherja í a.m.k. eitt ár þegar viðskipti eiga sér stað,
4. lögaðili:

	a)	sem lýtur framkvæmdastjórn innherja eða aðila sem talinn er upp í lið 1, 2 og 3 hér að framan,
	b)	sem er stjórnað með beinum eða óbeinum hætti af innherja eða aðila sem er talinn upp í lið 1, 2 og 3 hér að framan,
	c)	annar en í lið a eða b ef fjárhagslegir hagsmunir hans eru samtvinnaðir hagsmunum innherja eða aðila sem talinn er upp í lið 1, 2 eða 3 hér að framan.

[Sæmundur Bjarnason, 10.9.2009 kl. 14:34]

Ef þetta eru lögin sem fara ber eftir hvað er þá verið að gaufa? Getur þú sagt mér það Svanur Gísli? Eru svo margir aðrir sem þarf að taka í? Er þetta svo mikill smápeningur? Eru einhverjir lagakrókar eða aðrir krókar að þvælast fyrir fólki, eða hvað? Hver andskotinn er að?

Og DoctorE, þetta með samlíkinguna á skiltum og Interneti er áhugavert. Það er líka margt sem skilur að.

[Sæmundur Bjarnason, 10.9.2009 kl. 16:14]

Já og konan mín orti ágæta vísu og birti á sínu bloggi (asben.123.is) undir mafíuáhrifum frá þér DoctorE. Vísan er svona:

Heimskur og höfuðlaus er
hræddur, vonlaus og smáður.
Íslenskur alþýðuher.
Íslenskiri mafíu háður.