1583 - Hafragrautur

Gamla myndin.
Gerður Garðarsdóttir.

Uppskriftir skipa yfirleitt ekki stóran sess á mínu bloggi. Minnir þó að einhverntíma hafi ég birt hafragrautaruppskrift. Þegar ég fæ mér hafragraut fer ég oftast nákvæmlega eftir þeirri uppskrift þó ónákvæm sé. Þannig eru yfirleitt hunang, kanill, döðlur og mjólk samanvið minn hafragraut. Slíkur grautur er nefnilega ekkert sérlega góður svona einn og sér, eða ekki minnir mig það. A.m.k. er ekki gott að blanda skyrafgangi samn við hann eins og gert var áður fyrr og nefndist útkoman þá hræringur. Nú hef ég komist að því að jafnvel er betra að hafa ódýrar þurrkaðar döðlur úr Bónus í grautnum en nýjar og læt ég þess getið hér því ekki er örgrannt um að hugsanlegt sé að einhver fari eftir þessari uppskrift.

Á vísi.is segir:

„Vogaskóli verður fyrsti íslenski skólinn til að rafbókavæðast, en á þriðjudag fá allir nemendur við níunda bekk skólans afhenta Kindle spjaldtölvu til notkunar á vorönn í tilraunaskyni.

Kindle varð fyrir valinu þar sem spjaldtölvan er einföld, handhæg og hentar eingöngu til lestrar, svo nemendur geta ekki laumað sér á Fésbókina eða leikjasíður. Verkefnið er unnið í samvinnu við Námsgagnastofnun og Skólavefinn.“

Þarna mundi ég halda að átt væri við lesvél en ekki spjaldtölvu. Kannski þekkja blaðamennirnir ekki muninn, en í mínum huga er það ekki tölva sem ekki kemst á vefinn.

Tölva, lesvél, lesbretti, rafbók o.s.frv. Svolítill ruglingur virðist vera á þessum orðum. Í mínum huga er þetta þó einfalt. Lesbretti er rugl. Rafbók er bara fæll. Hægt er að hafa a.m.k. nokkur þúsund rafbækur á einni lesvél samtímis. Annars eru afbrigðin af þessu nokkuð mörg og einkennilegt að lesvélar skuli fyrst núna vera að verða vinsælar á Íslandi.

Vafasamt er að jarðnæði eigi að erfast. Með tímanum safnast fjármagn saman og verður of valdamikið. Þegar fjármagn ræður stjórnmálum er hætta á ferðum. Mennirnir sjálfir eru mikilvægari en peningarnir. Hagsmunir peninganna og peningaaflanna sitja í fyrirrúmi í vestrænu skipulagi. Mennirnir sjálfi eru í öðru sæti. Slíkt kann ekki góðri lukku að stýra. Íslenska Hrunið stafaði af þessu. Vandræði hins vestræna heim stafa einnig að þessu. Nauðsynlegt er að koma böndum á peningana. Þeir mega ekki ráða öllu. Þá fer illa, eins og komið hefur í ljós.

Baráttan við fönnina.

Athugasemdir

[Sigurður Hreiðar, 9.1.2012 kl. 11:17]

Í útvarpinu á dögunum -- kannski bara í gær? -- heyrði ég einhvern kalla svona rafbókabretti bókhlöðu. Fannst það fráleitt fyrst en kannski venst það?

[Sigurður Hreiðar, 9.1.2012 kl. 11:18]

Má kannski bæta því við að fleira má kalla tölvu en það sem tengist við netið, enda gerðu tölvur það ekki framan af. Minni tam. á reiknitölvu.

[DoctorE 9.1.2012 kl. 12:48]

Þessar spjald"tölvur" eru á mörkum þess að geta kallast tölvur; Ég sé ekkert í þeim fyrir mig, nema kannski þegar ég verð á grafarbakkanum, afvelta.. með spjald"tölvuna" uppi írúmi að lesa dánarfregnir og jarðafarir.

Eða þannig.. per se

[Sæmundur Bjarnason, 9.1.2012 kl. 15:00]

Sigurður, mér finnst bókhlaða afleitt orð í þessu sambandi. Útvarpið vill þetta bara af því að einhverjum þar datt í hug kalla það tónhlöður sem bara getur spilað tónlist. Í lesvélum er hægt að lesa margt fleira en bækur. Og eru textaskrár bækur?

DoctorE. Stýrikerfi á tölvum eru ekkert heilög. Windows hentar ekki við snertiskjái. Sú er samt framtíðin.

[DoctorE 9.1.2012 kl. 15:23]

Ég sé ekki fyrir mér að snertiskjáir séu framtíðin, kannski fyrir þá sem lesa bara en vinna ekki neitt á tölvurnar.
Þetta snertidót getur aldrei komið í staðin fyrir það sem er tilstaðar í tölvum í dag, amk ekki í útfærslum sem nú eru í gangi.

Windows hentar ágætlega í snertiskjái, hefur notast við snertiskjái mjög lengi... voru með spjaldtölvu fyrir löngu síðan... náðu ekki að hypa hana upp + a' eitthvað smá vantaði upp á ...  Ég get alveg séð MS koma inn með látum á þennan markað....  

[Sæmundur Bjarnason, 10.1.2012 kl. 00:46]

Snertiskjáir eru miklu sjálfsagðari og eðlilegri en músin. Tölvur í framtíðinni verða einkum notaðar til að lesa, skoða og spyrja. Það þarf varla að skrifa á lyklaborð allt sem spurt er um.