981 - Surtur fór sunnan með svigalævi

Svo segir í Völuspá: 

Surtur fer sunnan
með sviga lævi,
skín af sverði
sól valtíva.
Grjótbjörg gnata,
en gífur rata,
troða halir helveg
en himinn klofnar.

Minnir að nefnd hafi ákveðið nafnið á Surtsey og stuðst aðallega við þetta erindi úr Völuspá.

Nú er mikið rætt um hvað nýja fjallið á Fimmvörðuhálsi skuli heita. Mér finnst það kyndug umræða. Finnst einfaldlega ekkert liggja á með það. Áður en gosinu lýkur er engin leið að sjá hvernig fjallið verður. Kannski verður útlitið til að auðvelda nafngiftina. Mér finnst það líta út eins og hvert annað Búrfell. Kannski verður málið bara sett í nefnd.

Hundleiðist stjórnmálafarganið. Pabbi minn er stærri og sterkari en pabbi þinn. Margt í þessu er svo barnalegt að engu tali tekur. Undarlegt að þeir sem að þessu standa skuli ekki sjá sjálfir hve ópródúktívt þetta stagl er.

Uppskrift að undraverðum heilsuhafragraut með sjávarsalti.

4 skeiðar heilsuhaframjöl. (má nota venjulegt).
dass af sjávarsalti. (auðvitað má nota venjulegt borðsalt).
vatn eftir þörfum.

Þetta er allt sett í skál af hæfilegri stærð, hrært í og skellt í örbylgjuofn í nokkar mínútur. Borið fram með mjólk og brauð má hafa með ef vill.

Ég er afar leikinn í matargerð af þessum toga, en sum matargerð er flóknari en þetta, það viðurkenni ég. Uppskriftir standa samt alltaf fyrir sínu það sanna allar matreiðslubækurnar.

Yahoo fréttir koma sjálfkrafa upp í ferðatölvunni sem ég nota mest þessa dagana. Þar eru oft margar þúsundir kommenta. Athugasemdir eru þar oft við athugasemdir og hægt að sjá samstundis hvort þær eru jákvæðar eða neikvæðar. Yfirleitt nenni ég ekki að lesa þessar athugasemdir og sjaldan fréttirnar sjálfar heldur. Í mesta lagi að ég kíki á svona tvær til þrjár myndir sem fylgja helstu fréttum og ekki þarf nema að færa kursorinn yfir til að fá stækkaðar. Veit ekki af hverju ég er að segja þetta. Kannski til að undirstrika hve fáir og smáir við Íslendingar erum.

Athugasemdir

[Þorsteinn Briem, 5.4.2010 kl. 00:18]

Surtur er með mjúkan massa,
á mótum samt í fyrsta klassa,
gefur skít í risa rassa,
sem rosknum þroska ætíð flassa.

[Brjánn Guðjónsson, 5.4.2010 kl. 03:00]

kjósi ég að nota venjulegt haframjöl og venjulegt borðsalt í grautinn, er hann samt enn heilsuhafragrautur?

[Sæmundur Bjarnason, 5.4.2010 kl. 08:46]

Að sjálfsögðu Brjánn. Hafragrautur er alltaf heilsufæði hvernig sem hann er matreiddur. (Nema ef sykur er settur útá hann.)

[Jóhannes Laxdal Baldvinsson, 5.4.2010 kl. 14:20]

Einhver heilsupostulinn, þessi sem var með lífsstílsþættina á Skjánum, telur það alls ekki hollt að matreiða við örbylgjur. Kannski er það rétt, allavega skrítið að kalla eðlisfræðitilraun eldamennsku

[Óskar Þorkelsson, 5.4.2010 kl. 18:51]

Hafragrautur að norskum hætti er bara snilld.. uppskriftin er eins og hjá þér Sæmi en þeir setja kanel og fljótandi hunang út á.. það smakkast afbragðsvel.  Ég elda slíkt fyrir liðið á mínum vinnustað á hverjum morgni..

[Sæmundur Bjarnason, 5.4.2010 kl. 20:55]

Óskar, líst vel á þetta með kanelinn og hunangið, prófa það einhvern tíma.