2969 - Hinn trompaði Trump

Þessar týpur sem allt vita, eða þykjast vita, og allt geta eru dálítið þreytandi til lengdar. Stundum er samt auðvelt að læra á þær og þá má fá þær án fyrirhafnar til að gera allan fjandann með því að fara rétt að þeim. Ef þær eru látnar komast upp með allt og ná of miklum völdum geta þær valdið talsverðum skaða. Frægasta dæmið um slíkt er Trump Bandaríkjaforseti. Hann hefur greinilega náð alltof miklum völdum og veldur gríðarlegum skaða. Auðvitað geta bandaríkjamenn sjálfum sér um kennt, að hafa kosið þetta gerpi til ábyrgðarstarfa. Samt verður að gera gott úr þessu og láta sem ekkert sé. Mistök af þessu tagi getur verið erfitt að leiðrétta, en í hinum vestræna heimi er slíkt samt gerlegt á fjögurra ára fresti. Það verður líka gert í haust. Verst er að sá sem tekur við er ekki mikill bógur þó hann sé að flestu leyti mun skárri en Trump. Annars skiptir stundum mestu máli í svona tilfellum hvernig nánustu aðstoðarmenn gerpisins haga sér.

Að fylla umhverfi sitt með áhugaverðu efni. Snýst fésbókin ekki aðallega um það? Fæstum tekst þetta almennilega, en þegar allt kemur saman má kannski segja að út úr því komi efni sem er áhugavert fyrir einhverja. Spurningin er bara hvar í fjandanum þeir eru. Sennilega halda þeir sig í mikilli fjarlægð. Afleiðingin verður yfirleitt sú að maður verður að leika þessa einhverja sjálfur og það er hundleiðinlegt. Er fésbókin þá hundleiðinleg? Það finnst kannski einhverjum, en flestir eru sífellt að leita. Verst að þeir vita ekki að hverju þeir eru að leita. Svona má fabúlera endalaust án þess að nokkuð komi útúr því.

Nú er ég farinn að liggja miklu meira fyrir í hjónarúminu, en ég áður gerði. Rúmið er líka miklu fullkomnara núna. Hægt að stilla það á marga vegu. Geimfarastillingin hugnast mér best. Þar fæ ég líka þessar geníölu hugmyndir alveg á færibandi. Ég nenni samt ekki nærri alltaf að koma þeim á blað þó þær eigi það vissulega skilið. Þyrfti að finna einhverja aðferð til þess að geta forðað þessum snjöllu hugsunum frá því að gleymast. Þarf semsagt að reyna að skrifa þó ég liggi útaf. Það gæti orðið erfitt. Allt má þó reyna.

Hvar eru takmörk mannlegrar snilli? Kannski felast þau í að koma sér sem oftast úr rúminu og að tölvunni. Mér hefur að minnsta kosti reynst það vel. Með því að afstilla geimfarastillinguna og flýta sér að tölvunni hefur mér tekist að forða margri snjallri hugsuninni frá gleymsku og dái. Þannin vil ég starfa. Með því stuðla ég að aukinni fjölbreytni í hugsunum homo sapiens sapiens.

Já, svona er hægt að halda lengi áfram. Er ekki bara best að hrósa sjálfum sér nógu mikið. Ekki gera aðrir það.

Einhver mynd.

2968 - Hægri og vinstri

Segway-hjólin svonefndu náðu ekki mikilli útbreiðslu, þrátt fyrir mikla fjölmiðaumfjöllun. Aftur á móti virðast rafknúnu hlaupahjólin ætla að gera það. A.m.k. hér á Íslandi. Kannski eru það einhvers konar einkaleyfi og verð sem ráða þessu. Ég er bara ekki kunnugur því. Ef þessi hlaupahjól ásamt reiðhjólum (hugsanlega rafknúnum) verða ráðandi á göngustígum og gangstéttum í nánustu framtíð gæti farið að verða hættulegt fyrir gangandi fólk (svo ég tali nú ekki um gamalt) að ferðast þar.

Einhver hélt því fram nýlega. Gott ef það var ekki sjálfur Franklín forsetaframbjóðandi (hvað eru mörg f í því?). Að 80% þjóðarinnar hafi verið fylgjandi orkupakkavitleysunni samkvæmt einhverri skoðanakönnum þó aðeins rúmlega 7 þúsund hafi verið tilbúin til að skrifa undir áskorun til forseta Íslands um að setja lög, sem um þennan orkupakka fjölluðu, í þjóðaratkvæðagreiðslu. Hefði gaman af að fá að vita meira um þá skoðanakönnun. Já, ég er að hugsa um að kjósa Guðna og á ekki von á að einhver lesanda minna vilji eða geti svarað þessu.

Í mínum huga er aðalmunurinn á hægri og vinstri mismunandi skoðanir á því hve mikil eða lítil  ríkisafskipti eigi að vera. Þessi skipting getur stundum verið til góðs, þó hún sé um margt úrelt. Afstaðan til ESB, heimshlýnunar, rasisma og margs annars getur verið mismunandi óháð þessari skiptingu og auðvitað margt annað. Einnig getur skipt miklu í hvaða átt þróun virðist stefna. Um þetta get ég ekki mikið fullyrt því ég ákvað fyrir löngu að skipta mér sem minnst af stjórnmálum. Við þetta tel ég mig hafa staðið að mestu leyti.

Þó Moggabloggið birti bæði blogg eftir Björn Bjarnason og Styrmi Gunnarsson er blogg þeirra ekki að finna í tölulegum upplýsingum Moggabloggsins. Ekki veit ég hvers vegna þetta er, en hef þá báða grunaðu um að vilja hafa þetta svona.

Ekkert heyrist frá Icelandair þessa dagana og er það dálítið skrítið miðað við þau læti sem þar voru til skamms tíma. Einhverjir koma til með að tapa verulegum peningum þar. Hvort það verða lífeyrissjóðirnir, starfsfólkið eða félagið sjálft liggur allsekki fyrir. Fréttastofur einbeita sér að fréttum um væntanlega skimun ferðalanga sem vissulega er flókið mál og fréttnæmt en fyrr má nú rota en dauðrota. Gott væri að vita hvernig allir þessir túristar verða fluttir til landsins ef engar flugvélar lenda á Keflavíkurflugvelli.

Einhver mynd.

2967 - Lætin í USA

Sú reiði og sá uppreisnarhugur sem tröllriðið hefur Bandaríkjunum að undanförnu, er á flestan hátt afar skiljanlegur. Rasismi er þar landlægur og ekki hefur framkoma forsetans þar bætt ástandið. Vissulega hefur hann stuðlað að og reynt að auka þá gjá sem þar er á milli ríkra og snauðra. Einnig er þar mikill munur á milli hvítra og svartra. Svörtum í óhag. Í stað þess að leitast við að breiða yfir þessa gjá og sætta fólk, hefur Trump forseti leitast við að ala á sundrungu og dregið á alla hátt taum þeirra ríku og hvítu. Hvort um einhverja endingargóða lausn verður að ræða að þessu sinni er alveg óvíst. Einhverntíma hlýtur samt þessu ástandi að ljúka og ekki er gott að segja hvort Demókratar eða Repúblikanar græði meira á þessu.

Að bæði kórónuveiran og þessar óeirðir skuli eiga sér stað á kosningaári er til þess fallið að gera kosningarnar í Bandaríkjunum í haust enn meira spennandi en ella. Ef skoðanakannanir sýna Trump forseta fara halloka þegar nær líður kosningum, má búast við hverju sem er af honum. Hann mun einskis svífast til að reyna að halda völdum. Greinilega er hann eina von Repúblikanaflokksins og ekki er við því að búast að hann fái neitt marktækt mótframboð þar. Á sama hátt og forkosningar beggja flokkanna eru að mestu leyti búnar að vera lausar við alla spennu, má búast við að kosningarnar sjálfar í byrjun nóvember verði afar spennandi. Biden er kannski ekki sá sem vinstri menn hefðu óskað sér, en margt bendir samt til að þeir muni styðja hann. Gleymum því ekki að bandaríkjamenn eru jafnan fremur hægrisinnaðir samaborið við evrópubúa.  

Vel getur farið svo að ferðalög með flugvélum verði það sem mest breytist á næstunni. Hætt er við að það að vera lokaður inni í járnröri í marga klukkutíma höfði ekki til margra.. Búast má við að sumarleyfisferðlög verði mjög flókin í nánustu framtíð og þar að auki miklu dýrari en þau hafa verið. Flugfélög munu varla geta þjappað flugfarþegum eins mikið saman og gert hefur verið. Allskyns sóttvarnarbúnaður og þessháttar verður nauðsylegur í flugvélum o.s.frv.

Annars veit enginn með neinni vissu hvernig ferðalög muni þróast á næstunni ef kórónuveiran sleppir því kverkataki sem hún hefur haft á heimsbyggðinni. Kannski fer allt fljótlega í sama far og áður var og kannski minnkar flugumferð verulega. Loftslagsváin mun eflaust ógna flugfélögunum meira en mörgum örðum. Hvernig mengunvörnum verður viðkomið þar er allsekki ljóst. Kannski förum við meira og minna að ferðast með skipum aftur.

Líkur eru til að við Íslendingar munum ekki fljúga mikið í sumar. Flestir fara eflaust eftir ráðleggingum Þórólfs sóttvarnalæknis og ferðast innanlands í sumar ef þeir ferðast þá nokkuð. Unanlandsferðum kann að fækka verulega. Ekki er einu sinni öruggt að allt verði komið í lag næsta sumar.

Einhver mynd.

2966 - Utanbæjarmenn

Óeirðir eru talsverðar í Bandaríkjunum. Stjórnvöld tala um „utanbæjarmenn“. Þetta er eins og hér á litla Íslandi. Allsstaðar eru þessir utanbæjarmenn til bölvunar. Trump vill setja alla þá sem eru á móti honum í skipulögð samtök og skilgreina þau sem hryðjuverkasamtök. Þetta held ég að sé ekki rétt. Að halda því fram að óeirðir þessar snúist um eina persónu, er heldur ekki rétt. Þetta er miklu stærra en svo. Skilgreining eftir pólitískum línum rekst líka á staðreyndir. Hægri og vinstri eiga ekki við hér. Hvernig þetta endar er það eina sem máli skiptir núna.

Alveg er ég hissa á því hve margir heimsækja þessa bloggsíðu. Athugasemdum fer líka stórlega fjölgandi. Sennilega er þetta mest vegna þess að ég blogga fremur oft um þessar mundir.

Fór áðan í nokkuð langa gönguferð. Held að hún hafi verið rúmir 4 kílómetrar. Sennilega er kófið sem margir kalla svo, í þann veginn að yfirgefa okkur. Túristarnir kannski líka. Sjálfur er ég að mestu hættur að vera hræddur við hurðarhúna og lyftuhnappa. Innilokunin sem hefur verið síðustu mánuði hefur ekki haft mjög mikil áhrif á mig. Mest er það að sjálsögðu vegna þess að einhverfa eða introvert-ska mín hefur farið vaxandi með aldrinum. Ekki get ég neitt gert að því þó fjarlægð mín frá öðru fólki sé svo mikil að kófið hefur ekki fært mér nein vandræði að ráði.

Aðrir kunna vel að hafa orðið fyrir miklum vanda í sambandi við þennan faraldur. Tala nú ekki um þá sem hafa misst atvinnu sína og/eða lifibrauð af hans völdum. Hugsanlega breytir hann hugsunarhætti fólks verulega og varanlega. Kannski láta samt margir sér nægja að þvo sér eitthvað oftar um hendurnar og láta það duga. Allt á þetta eftir að koma í ljós eins og margt fleira.

Best finnst mér þegar ég fer í gönguferðir að hugsa ekki um neitt sérstakt. A.m.k. að vera ekki með neina fyrirframgerða áætlum um slíkt. Upplagt er að hugsa fyrst og fremst um veðrið og gönguna sjálfa. Af nógu er að taka. Einkum ef öpp eru notuð. Þá má velta fyrir sér hraða, vegalengd og ýmsu öðru. Svo er líka ágætt að tala svolítið við sjálfan sig á göngunni. Jafnvel reyna að komast vel að orði o.s.frv. Mér datt t.d. í hug áðan: „Sennilega er ég summan af öllu sem mér hefur dottið í hug á ævinni“. Hver veit nema þetta sé ódauðlegt spakmæli.

Sumir vilja helst fara í gönguferð með öðrum. Aðrir fara með hundinn sinn. Sumir vilja helst vera í hóp, aðrin einir. Svo er upplagt að fylgjast með landslagi, litum, birtu eða dýralífi. Afbrigðin eru óteljandi.

Einhver mynd.

2965 - SpaceX og óeirðir

Svandís og Kári virðast hafa samið frið. Kannski hafa þau haft í huga klámvísuna frægu:

Loksins hefur storminn lægt
ljúfur saminn friður.
Yfirsængin hægt og hægt
hreyfist upp og niður.

Óeirðirnar í Bandaríkjunum núna snúast ekki um stjórnmál eða einstakar persónur. Um er að ræða langa sögu lögregluofbeldis gagnvart hörundsdökku fólki og rasisma sem grasserað hefur þar lengi. Allt frá því að óeirðirnar miklu urðu þar um 1967 hefur rasismi verið áberandi þar, þó ýmsir hafi haldið að hann færi minnkandi. Svo er þó greinilega ekki. Kannski þrífst hann einkum meðal lögreglunnar,sem er að sjálfsögðu vopnuð þar eins og algengast er annars staðar en hér á Íslandi.

Um þessar óeirðir í ríkasta og voldugasta ríki heimsins er ég ekki fær um að tjá mig mikið. Hörmulegar eru þær samt. Kannski á Covid-19 veiran einhvern hlut að máli. Atvinnuleysi meðal svartra Bandaríkjamann og allar tölur og skýrslur hafa sýnt það á undanförnum árum að kynþáttahyggja á þar miklu fylgi að fagna og kannski hefur óréttlætið komið enn betur í ljós í þeim þrengingum sem Bandaríkjamenn hafa mátt ganga í gegnum eins og flestar þjóðir aðrar að undanförnu.

Oft er það svo að hægri mönnum er einkum kennt um rasisma. Á sama hátt má segja að vinstri menn séu og hafi oft haft ansi barnalega trú á jafnrétti og jöfnuði öllum til handa. Jafnvel að þeir aðhyllist kommúnisma, sem greinilegt er að mannkynið er ekki fært um að tileinka sér, eins og grenilega kom fram í Sovétríkjunum sálugu. Þó má segja að óeirðir þessar sé alls ekki pólitískar og vandséð er hvort Repúblikanar eða Demókratar græða á þessu ástandi. Ef nauðsylegt reynist hinsvegar að fresta kosningum þar í haust er þó hægt að segja að Repúblikanar græði á þeim atburðum sem eru núna að gerast þar vegna þess að þeir viðhalda þá líklega völdum í Hvíta Húsinu lengur en ella.

Í öllu svartnættinu í Bandaríkjunum er samt ljós punktur. Það er giftusamlegt geimskot SpaceX í gærkvöldi. Efast ekki um að rækilega verður sagt frá þessu í öllum fjölmiðlum hérna á eftir þar sem þetta er í fyrsta skipti sem einkaframtakið stendur frammi fyrir svona nokkru.

Einhver mynd.

2964 - Grímur eða grímur ekki

Ef ég blogga um nafntogaðar persónur, eða pólitík, tala nú ekki um ef ég held líka fram einhverjum vafsömum skoðunum þá bregst það varla að fleiri koma inná mitt blogg en venjulega. Einkum á þetta við ef mér tekst að koma þessu að einhverju leyti til skila í fyrirsögninni. Einu sinni var ég með aðsóknartölur útvortis, öðru hvoru a.m.k. en nú eru þær bara innvortis. Þori ekki að reyna að breyta þessu því ég gæti gert einhverja bölvaða vitleysu.

Eiginlega er mér alveg sama hvort margir eða fáir lesa þetta blogg mitt. Auðvitað vil ég samt að sem flestir lesi það. Annars væri ég varla að þessu. Ólíkindalæti eru minn stíll enda ólst afi minn upp á Látalátum í Landsveit. Er vanur að gera lítið úr öllu. Jafnvel sjálfum mér. Vitanlega er mér þó ekki alls varnað.

Einkennilegt að á Íslandi skuli andlitsgrímur varla sjást nema á heilbrigðisstarfsfólki í þessum kórónufaraldri. Sennilega er þetta eingöngu vegna þess að Þórólfur er á móti þeim. Sumsstaðar í útlandinu eru þær beinlínis fyrirskipaðar og flestir virðast hafa mikla trú á þeim. Svona eru nú Þórólfsáhrifin mikil. Skaði að hann skuli ekki hafa boðið sig fram til forseta. Hann hefði getað flogið til Bessastaða á vinsældum sínum.

Annars eru forsetakosningarnar að verða mesta rifrildisefnið í flestum miðlum núna. Ekki er líklegt að Guðmundur Franklín fái meira en svona 5 prósent atkvæða í mesta lagi, hvað sem öllum gerviskoðanakönnunum líður. Afganginn fær Guðni að sjálfsögðu enda hefur hann staðið sig sæmilega.

Hefði samt viljað sjá Kára eða Þórólf í þessari kosningabaráttu frekar en Guðna og Guðmund, en við því verður ekki gert úr þessu. Hætt er við að kosningabaráttan verði fremur linkuleg að þessu sinni. Engin þeirra sem næstum því felldu Guðna fyrir 4 árum vilja reyna aftur og er það skaði. Sennilega hefði ekki veitt af einum sannfærðum loftslagssinna í þessa baráttu. Orkupakkinn dugar líklega skammt. Það eru allir búnir að fá leið á honum.

Einhver mynd.

2963 - Svandís og Kári

Svandís Svavarsdóttir ráðherra er á móti öllum einkarekstri í heilbrigðisgeiranum og hefur líklega ætlað sér að kenna Kára Stefánssyni og Íslenskri Erfðagreiningu lexíu í síðasta skemmtiþættinum hjá Víði, Þórólfi og Ölmu, sem hún fékk óvænt að taka þátt í.

Þetta gerði hún með því að minnast ekki á hann í þakkarræðu sinni og vekja þannig upp villidýrið í honum. Einnig sagðist hún reikna með því að hann og fyrirtæki hans hjálpaði til við skimunina sem áformað er að fara í án þess að tala við hann. Þannig mistókst henni hrapallega að kenna honum og þetta gæti jafnvel kostað hana vinnuna.

Ekki eykur hún vinsældir ríkisstjórnarinnar með þessu, en þríeykið blómstrar sem aldrei fyrr. Kári fór næstum því framúr sjálfum sér í kastljósþætti gærkvöldsins með því að neita með öllu að taka þátt í opnuninni á Keflavíkurflugvelli eða undirbúningi að því verkefni.

Íslenska sjónvarpið er á góðri leið með að leggja sjálft sig undir íþróttirnar aftur. Að viðhalda íþróttaþætti í fréttunum án þess að nokkrar íþróttir væri eiginlega um að ræða er sennilega einhvers konar met. Að sýna líka eldgamla íþróttakappleiki sem einu sinni voru í beinni útsendingu er ekkert annað en hrein snilld. Kannski hafa einhver íþróttafrík horft á þetta. Mest er ég hissa á að þetta efni skuli hafa verið geymt. Jæja, vídeóspólur eru víst orðnar svo ódýrar núna.

Alveg á eftir að sjá hve margir túristar láta sig hafa það að koma til Íslands að veirufaraldrinum loknum. Einhverjum verður sjálfsagt orðið svo brátt í brók að komast í flugferð að hugsanlega fær BB að blæða svona 50 til 60 milljónum á dag í tóma vitleysu. Áreiðanlega veifa flestir flugfarþegar einhverjum vottorðum við komuna, en vonandi verður ekkert mark tekið á slíkum pappírum.

Spacex Drekinn sem átti að fara með tvo geimfara í alþjóðlegu geimstöðina komst ekki á loft í gærkvöldi eins og til stóð. Reynt verður aftur á laugardaginn. Kannski að nú sé að renna upp nýtt skeið geimferða sem gaman verður að fylgjast með. Tunglferðirnar eru orðnar að svolítið gömlum sögum, þó ég muni vel eftir þeim. Kannski ég sé að verða gamall sjálfur. Ehemm.

Einhver mynd.

2962 - Brúarhlöð

Nú er kominn tími til að ég bloggi smá. Já, við fórum í Hveragerði og í sumarhúsahverfið við Úthlíð um síðustu helgi. Maður hagar sér næstum eins og Covid-19 veirusýkingin sé bara vondur draumur. Sennilega veldur þessi faraldur talsverðum eða miklum þrengingum í efnahagslegu tilliti hér á Íslandi eins og annarsstaðar. Held samt að það að við virðumst hafa unnið nokkuð góðan sigur í fyrstu lotunni komi til með að hjálpa okkur að lokum. Þó er allsekki víst að ferðamennirnir komi aftur þegar við viljum. Líka er eftir að sjá hvernig stóra Flugleiðamálið leysist.

Kannski þessi veirufaraldur verði okkur á endanum til góðs. Auðvitað koma allsekki allir til með að græða á þessu. Ekki einu sinni óbeint. Þeir sem voru svo vitlausir að byggja Hótel fyrir alla sína peninga og treysta á ríka túrista koma ef til vill til með að tapa á þessu öllu saman. Sama eða svipað er að segja um allstóran hluta þeirra sem missa atvinnuna.

Vitanlega er afleitt að vera undir náð og miskunn útlendra flugfélaga kominn. En það er líka slæmt að henda milljarðatugum í illa rekið flugfélag bara af því að það er ekki frá útlandinu. Að sjálfsögðu þarf að finna atvinnu fyrir allt það fólk sem missir hana ef Icelandair fer á hausinn, en kannski má nota milljarðatugina sem sparast við að styrkja ekki þetta vonlausa félag, til að finna góða atvinnu fyrir það fólk.

Eins og ég sagði áðan fórum við hjónin til Hveragerðis og gistum á Hótel Örk í tvær nætur. Hittum í Hveragerði ættingja og borðuðum fínan kvöldverð í Skyrgerðinni, sem einu sinni var Hótel Hveragerði. Allt var upppantað til slíkra nota hjá Örkinni föstudags- og laugardagskvöld svo kannski þurfa eigendur þess ekki að kvarta. Á laugardag fórum við uppað Úthlíð og síðan að Brúarhlöðum. Fremur fáir voru á ferðinni við Geysi, og kannski vantar þar útlenda túrista. Ennþá færri voru við Brúarhlöð eða réttara sagt engir, en kannski eru túristarnir ekki búnir að finna þann stað.

Einhver mynd.

2961 - Pólitík

Hernaðarhyggja byggist að einhverju leyti á viðteknum sannindum. Vinstri menn geta ekki með öllu hlaupið frá kommúnisma og stalíniskum skoðunum. Sú tilraun sem gerð var í Sovétríkunum sálugu mistókst hrapallega. Á sama hátt geta hægri menn ekki með öllu hlaupið frá einræðisherrum sem hafa myrt fólk hópum saman með stuðningi Bandaríkjamanna. Hverjum þykir sinn fugl fagur og ég neita því ekki að sú samblöndun kapítalisma og kommúnisma sem stunduð er eða hefur verið á Norðurlöndum hugnast mér að flestu leyfi betur en blindur ofsatrúnaður við einhverja ákveðna hugmyndafræði. Sérhvert mál er á sinn hátt einstakt og sérfræðingar eru ekki alltaf best til þess fallnir að taka ákvarðanir.

Já, skoðanir mínar eru kratískar í eðli sínu, eða það ímynda ég mér. Annars leiðist mér pólitískt argaþras, sem oft byggist á lítilli þekkingu. Ég get allt eins tekið undir sumar skoðanir öfgafullra hægri manna eins og sannfærðra sósíalista. Oft eru þeir ekki síður öfgafullir en hægri menn. Venjulega er ég „sammála síðasta ræðumanni“ eins vitlaust og það nú oft er.

Þetta með ræðumennskuna ræður alltof miklu í stjórnmálum yfirleitt. Lítum t.d. á Alþingi. Sumir sem þar eru hafa það eitt sér til ágætis að geta talað þindarlaust. Stundum segja þeir eiginlega ekki neitt. Stundum einhverja bölvaða vitleysu. Kannski hef ég það eitt mér til ágætis að geta skrifað þindarlaust. Ætti ég að semja eða setja lög væri við því að búast að þau yrðu ömurleg. Lýðræðið svokallaða er eiginlega ekki annað en meðaltal. Eru meðaltalsskoðanir eitthvað betri en aðrar? Ég bara veit það ekki. Framtíðin kemur alltaf á óvart. Lögfræðingar og hagfræðingar geta líka haft rangt fyrir sér.

Einhver mynd.

2960 - Allskyns meðöl

Nei, ég ætla helst ekkert að blogga núna. Er að reyna að draga úr því eins og mörgu öðru. Þó get ég varla stillt mig vegna þess að veðrið er mjög fallegt og ég er að hugsa um að fara út að labba. Fór samt í gær, en er að hugsa um að kannski hafi verið of mikið að segja „fitbitinu“ að ég stefndi að því að fara sex sinnum í viku í langa gönguferð. Kannski er líka alveg skítkalt.

Fékk um daginn ábendingu á netinu um svokallað Lactoferrin sem mér skilst að einhverjir noti við Covid-19 sem allir eru víst að berjast við. Gott ef það á ekki að styrkja ónæmiskerfið eða eitthvað þessháttar. Berið mig samt ekki fyrir þessu og gúglið það endilega. Held að þetta sé svokallað náttúrulyf og fáist í þessháttar verslunum undir nafninu Colostrum. Veit ekki meira um þetta og nota það ekki sjálfur. A.m.k. ekki ennþá. Er ákaflega skeptískur á allt svona, en satt að segja þá treysti ég þeim manni sem sendi mér þetta betur en mörgum öðrum.

Tel sjálfum mér samt trú um að ég þurfi ekkert á þessu að halda. Sagt er að Trump sjálfur taki reglulega hydroxyklórofin. Sennilega er það alveg rétt og hann hefur mælt mjög með þessu lyfi, sem kannski er hættulegt með einhverju ákveðnu og aukaverkanir af því eru víst talsverðar. Læt svo lokið þessu lyfjatali.

Annað í sambandi við vírusinn sem ég vildi gjarnan minnast á er hvað margt er skrítið í sambandi við andlitsgrímurnar. Meirihluti þeirra er án vafa næstum eða alveg gagnslaus. Þórólfur er á móti þeim og hér á Íslandi verður maður lítið sem ekkert var við þær. Tískustraumar eru farnir að gera vart við sig í sambandi við þær og margir reyna að græða á þeim. Þeir sömu og bönnuðu grímur með lögum fyrir stuttu krefjast þess nú að allir séu með grímur. Eitthvert gagn gera sumar þeirra, en fyrst og fremst eru þær nokkurs konar auglýsing um að sóttvarnarreglum sé hlýtt.

Fór áðan út að ganga og um svipað leyti fór sólskinið á bak við ský og hefur verið þar síðan. Ágætt veður er samt og ég fór 3,66 kílómetra og tók yfir 5000 skref og notaði á annað þúsund kalóríur. Allt þetta segir „fitbitið“ mér og margt fleira sem ég nenni ekki að telja upp. Kannski ætti ég að gera þetta blogg meira dagbókarkennt en ég hef gert hingað til.

Einhver mynd.