393. - Nöldur og aftur nöldur. Ekkert nema eintómt nöldur

Yfirleitt er blogg ekkert annað en djöfulsins nöldur. Nöldur og tuð. Til hvers að vera að nöldra á bloggi? Það tekur enginn mark á þessu. Sínöldrarar eru sjálfum sér verstir. Þeir hætta með öllu að sjá annað en nöldurbloggin sín og annarra og telja sér trú um að lífið snúist um þetta. Að nöldra sí og æ. Daginn út og inn. 

Ef menn eru ekki sínöldrandi þá eru þeir að Lúkasast um eitthvað sem þeir vita hreint ekkert um. Og hafa ekkert vit á. Þykjast samt vera gáfaðri en nokkur annar. Væri ekki nær að vera svolítið jákvæður og tala um hvað veðrið hafi verið gott í dag og sólsetrið fallegt í gærkvöldi.

Af hverju er ég að þessu fjandans nöldri? Getur ekki bara hver og einn nöldrað og Ramsesast útaf fyrir sig. Það væri best fyrir alla. Svo eru fréttamenn og blaðamenn búnir að smitast af þessari nöldur ónáttúru líka. Ekki má Geiri greyið segja fréttamanni í fullri vinsemd að hafa hægt um sig þá verður allt vitlaust og blaða- og fréttamenn nöldurspóla upp um alla veggi.

Verst af öllu er pólitíkin. Þar nöldra menn hver í kapp við annan en verða þó að gæta þess að nöldra nokkurn vegin eins og flokkslínan segir. Stjórnarandstöðunöldur er auðveldast. Þá er nokkuð seif að vera bara á móti öllu. Þeir sem álpuðust til að styðja stjórnarflokkana í síðustu kosningum eiga ekki sjö dagana sæla. Allt er tóm tjara sem þeir segja. Ef þeir segja þá nokkuð. Auðveldast að taka bara þátt í nöldurkórnum. Pakkið sem mænir stöðug uppá stjórnina veit ekkert í sinn haus frekar en ráðherraræflarnir.

Þegar nöldrinu linnir í bloggheimum taka kóararnir og hirðirnar við. Einhver hirðbloggarinn lætur ljós sitt skína og samstundis taka kommentasmiðirnir við og jesúsa sig yfir snilldinni og frábærunni. Alltaf þeir sömu. Mikið rosalega er þetta flott. Ég hef bara ekki heyrt frábærari brandara allt mitt líf. Snilldarlega sagt. Endalaust knús og kossar. Ég gæti ælt.

Óskaplegt hvað hræsnin og mærðin getur orðið mikil í þessum athugasemdum hjá hirðfólkinu. Ég færi bara að gráta ef ég væri ekki svona eitilharður og afrenndur nöldrari.

Nöldur og mærð. Í því eru bloggarar bestir. Hefur nokkurn tíma frést af bloggara sem bloggaði skynsamlega? Ekki hef ég heyrt um það.

Í lokin eru svo fáeinar myndir. Allar teknar í dag í Elliðaárdalnum nema sólsetursmyndin.

Athugasemdir

[Lára Hanna Einarsdóttir, 19.7.2008 kl. 00:18]

Hverslags nöldur er þetta, Sæmi minn! 

Myndirnar þínar eru æðislegar - pistlarnir líka reyndar. (Ekki æla!)

[Lilja Kjerúlf, 19.7.2008 kl. 00:43]

Ja þetta kalla ég nú almennilegt nöldur

knús og kossar

[asben 19.7.2008 kl. 00:56]

Já en...  það er bara svo gaman að vita allt betur en hinir.

                                  Skítt með alla skynsemi 

                                  skilurðu það ekki.

                                  hún er bara brjálsemi

                                  bindur fólk í hlekki.

Bara svona smá vísubull !

[Beturvitringur, 19.7.2008 kl. 04:17]

Nöldraðu bara áfram og gerðu það almennilega. Auðvitað vitum við allt best; sjáðu bara hvaða blogg-nafn ég valdi mér.

Sonna, sonna, sonna. Það er fullt af fallegum myndum, fróðlegum greinum og skemmtilegum frásögnum og sumt til fræðslu.  Hirðathugasemdasemjendurnir verða líka að hafa e-a til að líta upp til og undirgefast.  Svo eru líka margir sem koma með mótrök í aths. og alls ekki með sleikjuhátt.

Nöldrandi Besserwisser

[Helgi Viðar Hilmarsson, 19.7.2008 kl. 13:53]

Sjálfur geturðu verið nöldrari! Í ofanálag er bloggið þitt fullt af lundareykjadalskjaftæði og ritræpu. Skil ekki í að nokkur maður nenni að lesa þetta. Myndirnar þínar eru svo bæði viðvanings- og flatneskjulegar og blogginu þínu til hreinna vansa.

Auðvitað meina ég ekkert með þessu þrasi, en setti þetta inn fyrir þig svo að þú seljir síður upp yfir allri mærðinni, væmninni og bullinu, sem veður uppi hér á Moggablogginu.

[Sæmundur Bjarnason, 19.7.2008 kl. 18:19]

Já, auðvitað er þetta tómt nöldur hjá mér og mest til gamans gert.

Vísan er fín og kommentin finnst mér ekki vera neim hirðkomment.

Skil samt ekki alveg hvað lundareykjadalskjaftæði er.

[spambot, 19.7.2008 kl. 20:22]

Jíha, þetta er ástæðan fyrir að ég slóst í bloggarahópinn fyrir nokkrum dögum. Allt þetta dýrindis nöldur.

Meira nöldur og meira spam, takk!

[Lára Hanna Einarsdóttir, 19.7.2008 kl. 20:31]

Ein tillaga varðandi myndirnar, Sæmundur...

Það væri mjög gaman ef þú skírðir þær, þ.e. segðir hvað er á hverri mynd og hvar hún er tekin. Ekki væri verra ef þú segðir klukkan hvað sólarlagsmyndir eru teknar.

Smá vinna en skilar sér og þá hefurðu þetta líka "á lager".

[Sæmundur Bjarnason, 19.7.2008 kl. 20:59]

Lára Hanna. Myndavélin er með klukku þannig að tímasetningarnar eru ekki vandamál. Hvar myndirnar eru teknar finnst manni liggja í augum uppi meðan maður man eftir þeim. Auðvitað verður það ekki alltaf þannig. Myndirnar sem ég set á bloggið eru bara mikið minnkaðar kópíur og ekki mikils virði. Stundum segi ég líka eitthvað um myndirnar.

Spambot, njóttu nöldursins. Mér finnst kjötbúðingur ágætur.

[Helgi Viðar Hilmarsson, 19.7.2008 kl. 21:42]

Ég sem hélt að ég væri að eiga orðastað við Borgfirðing, en ég sé að þú ert fæddur í Hveragerði. Það er því engin furða að þú áttir þig ekki alveg á lundareykjadalskjaftæðinu. Þar sem orðið finnst ekki í Orðabók Blöndals þá ætla ég að gefa út mína eigin orðskýringu þér til handa og glöggvunar. Lundareykjadalskjaftæði er sem sagt sambland af nöldri, vaðli og vitleysu. Viðhöfðu Lundareykdælingar þennan plagsið í erjum við nágranna sína úr Flókadal og Skorradal á sinni tíð.  

Og nú að öðru. Þar sem þú ert fæddur í Hveragerði þá langar mig til að spyrja þig hvort þú lítir á þig sem Ölfusing? Afi minn sem fæddur er að Riftúni í Ölfusi, átti sumarbústað í Hveragerði á sinni tíðn. Eitt sinn spurði hann okkur afkomendurna hvort við teldum að Hveragerði væri í Ölfusinu. Og við héldum það nú. Afi minn hélt nú aldeilis ekki, því Hveragerði væri nú bara í Hveragerði. Því má svo við bæta að Afi minn var hálfgerður rugludallur og því vara samt að taka of mikið mark á honum.

Og nú að enn öðru. Þar sem þú ert hrifin af vísum þá sendi ég þér einn gamlan kviðling úr Kópavoginum.

Hver gerði Gerði grikk í sumar
Hver gerði Gerði bomsí bomsí bomm.
Því eru hún svona þykk í sumar
Það er af því að hún er bomsí bomsí bomm.

Ég bið svo Guð að forða þér frá því að taka nokkurt mark á því sem ég hef skrifað.

[Sæmundur Bjarnason, 19.7.2008 kl. 22:06]

Já, það er gaman að þessu. Að óreyndu hefði ég giskað á að Lundarreykjadalskjaftæði væri langhundur eða eitthvað þess háttar. Ég bjó í Borgarnesi um tíma en þekki ekki mállýskur úr Lundarreykjadal. Mér finnst ég geta talið mig hvort heldur sem er Hvergerðing eða Ölfusing allt eftir því sem betur hentar. Þegar ég var í skóla hefði ég eflaust talið mig frekar Hvergerðing en Ölfusing en ekki lengur. Vísuna um Gerði sungu þeir félagar í Ríó tríói endur fyrir löngu. Ég man samt alltaf best eftir setningunni þeirra: "Mikið er mjúkur malbikaði spottinn."

[Heidi Strand, 19.7.2008 kl. 22:18]

Hér er nöldur um nöldur frá nöldri til nöldurs.

[alva 20.7.2008 kl. 23:41]

þú ert frábær nöldrari!!!!