2769 - Christine Blasey Ford

Að lýsa upp alþingi. Eða upplýsa alþingi. Af hverju þurfti að kosta svona miklu til svo hægt væri að upplýsa (eða lýsa upp) alþingi á Þingvöllum. Annað hvort er almenningur svona illa upplýstur eða alþingisfólkið. Ég hallast að hinu síðarnefnda. Fólkið (almenningur) á að ráða. Þannig er hið sanna lýðræði. Alþingi þarf að skilja það. Flokksræðið og flokkshollustan er ekki upphaf og endir alls. Flokkarnir eiga ekki öllu að ráða. Ennþá síður flokksforingjarnir. Í skátafélögunum í gamla daga voru bæði flokksforingjar, sveitarforingjar, deildarforingjar og félagsforingjar. Samt réðu þeir eiginlega engu. Allir hugsuðu um það eitt að skemmta sér sem best og fara í útilegur fjarri foreldrum og öðrum óþjóðalýð, sem sífellt vildi flækjast fyrir.

Christine Blasey Ford hefur sakað Brett Kavanaugh, sem Trump forseti og repúblikanar vilja skipa í Hæstarétt Bandaríkjanna, um að hafa í fylliríi reynt að nauðga sér þegar þau voru bæði táningar á níunda áratug síðustu aldar. Auðvitað skiptir það litlu máli hjá sumum (karlmönnum) í dag hvað Kavanaugh gerði fyrir mörgum áratugum. Afbrot minnka samt yfirleitt ekki með árunum. Er með þessu verið að segja við þá pilta sem eru 17 ára í dag að í lagi sé að ofsækja stúlkur? Af hverju er þetta mál orðið svona pólitískt núna? Segja má að það sé útaf tvennu. Í fyrsta lagi getur þetta haft mikil áhrif á úrslit þingkosninganna í byrjun nóvember í haust og þarmeð þróun þjóðmála í USA. Þingið verður umboðslaust 1. október (að ég held). Í öðru lagi getur þetta haft talsverð áhrif á framtíð Donalds Trumps sjálfs (15 konur hafa sakað hann um að hafa gert sitt af hverju, sumt fyrir allmörgum árum) á forsetastóli og að sjálfsögðu einnig á það hvernig Hæstiréttur Bandaríkjanna er skipaður. Segja má að stuðningur í þessu máli fari alveg eftir flokkslínum. Bandaríkjamenn virðast ekki fara í grafgötur með að dómstólar séu annaðhvort frjálslyndir eða íhaldssamir og stuðningur við annan hvorn stóru flokkanna sé ekki dómurum framandi. Vitanlega er Kavanaugh repúblikani eða a.m.k. íhaldssamur.

Segja má að Donald Trump láti stundum eins og asni. Mér finnst íhaldssemin í honum og mörgum fleiri óttalega asnaleg. Yfirleitt finnst mér of mikil íhaldssemi asnaleg. En hvað er of mikil íhaldssemi? Ekki er annað að sjá en Trump eigi sér ófáa fylgendur. Kannski er það Rússum að þakka. Kannski ekki. Má hann ekki láta svona? Hingað til hafa Bandaríkjaforsetar ekki gert það. Kannski er hann bara skrýtinn. Ekki held ég að hann sé hættulegur. Ekki get ég séð að hann nái eins miklum tökum á þjóðinni og Hitler náði á Þjóðverjum á sínum tíma. Auðvitað vorkenni ég múslimum að þurfa að þola þennan mann, en hættulegur á sama hátt og Hitler held ég að hann sé ekki.

Þar sem enginn þekkir mann
þar er gott að vera.
Því að allan andskotann
er þar hægt að gera.

Var einu sinni ort. Ekki hef ég minnsta grun um eftir hvern þetta er. Enda finnst mér það engu máli skipta. Sá eða sú sem gerði þessa vísu hefur sennilega langað til ýmislegs, sem ekki hefur verið viðurkennt í því samfélagi sem höfundurinn var upprunninn í. A.m.k. hefur hann verið talsvert ónógur sjálfum sér. Líklega bundinn af ýmiss konar kreddum. Þær eru og hafa alltaf verið, landlægar í öllum samfélögum.

Einhver mynd.

Athugasemdir

[Þorsteinn Briem, 23.9.2018 kl. 13:32]

Víða er með brundinn Brett,
brókarlaus að vestan,
út í hefur fingur fett,
fjanda einna mestan.

[Sæmundur Bjarnason, 23.9.2018 kl. 15:47]

Steini hefur fingur fett
í frygðina að vanda.
hefur nú í sundur sett
seigan brettafjanda.

[Jón Valur Jensson, 24.9.2018 kl. 01:43]

Enn með gróft sitt fer með flím

Frygðarþanka-Steini Briem,

klínir því á Kavanaugh,

karlinn lýgur aldrei nóg,

hatast við allt heiðarlegt

hefðarfólk að góðu þekkt;

sjálfur Brussel-bitlinginn 

býður margan, ræfillinn.

[Sæmundur Bjarnason, 24.9.2018 kl. 08:03]

Fín visa hjá þér, Jón Valur. Sumir mundu segja að þær væru tvær. 

Ekki get ég samt fallist á að þú eða Trump sé eitthvað sérstakt "hefðarfólk" og þar með ósnertanlegt. Það er reyndar önnur saga.

Ekki er heldur hægt að segja að allir sem gagnrýna Trump séu óalandi og óferjandi. 

[Jón Valur Jensson, 24.9.2018 kl. 10:50]

Óalandi, óferjandi

er hann Steini, landsins fjandi,

svo mér hefur sýnzt. Ég veit:

Bezt er þeim, sem bræður styðja,

Brusselpilti einskis biðja

góðs, því fyllir fjanda sveit !

[Sæmundur Bjarnason, 24.9.2018 kl. 20:55]

Þessi finnst mér aftur á móti óttalega léleg. En það er bara ég. Kannski er þetta ódaulegur skáldskapur. Hvað veit ég? Ekki er ég svo frægur að rifist sé um mig í Moggatetrinu. 

Skáldskapur þinn er skothent klúður
skakksettum höfuðstöfum með.

var einu sinni ort. Gott ef það var ekki um Grútarbiblíu. Pro-lifer er ég ekki. Tromparinn er ekki þess virði að rifist sé um hann í bundnu máli.

[Jón Valur Jensson, 25.9.2018 kl. 04:12]

Féll nú niður um fáein ömp

fyrrum stuðið á Sæma,

agnúast síðan út í Trump,

en ekki´ er það hans að dæma.

 

PS. Höfuðstafirnir í vísunni hér á undan (er, Brusselp.) eru ekki "skakksettir", heldur einmitt í áherzluatkvæði, og ekkert af 6 rímorðum vísunnar er skothent (öll aðalhent), þannig að þessi gamla gagnrýnisvísa séra Jóns Þorlákssonar á Bægisá (á kannski Grútarbiblíu) er ekki rétt vel valin hjá þér, ágæti Sæmundur, til að kryfja minn fábrotna sexlínung.

[Sæmundur Bjarnason, 25.9.2018 kl. 08:44]

Alveg er hann eitursvalur
alltaf styður Tromparann.
Japlar áfram Jónsi Valur
étur bara þrumarann.

[Húsari. 26.9.2018 kl. 12:08]

Sæll Sæmundur.

Reyndar er fyrri partur tilvitnaðrar vísu 
eftir Þorsteinn Erlingsson en Jón Þorkelsson (Fornólfur)
orti seinni partinn.

Jón frá Bægisá var steindauður þegar hér var komið sögu!

[Jón Valur Jensson, 26.9.2018 kl. 13:24]

Húsari, vísaðu um þetta í rit þeirra og bls.tal. Orðbragðið á vísupartinum (Skáldskapur þinn er skothent klúður / skakksettum höfuðstöfum með) er fremur 18. aldar en 19. eða 20. En við finnum út úr þessu.

[Sæmundur Bjarnason, 26.9.2018 kl. 13:49]

Ég segi bara pass. Nú eruð þið komnir út í einhverja umræðu sem ég skil eiginlega ekki og hef ekki beðið um.