2059 - Pólitík dagsins

Ríkisstjórnir og ráðamenn hérlendis hafa að undanförnu staðið sig svo illa að bylting er í rauninni sjálfsögð og óhjákvæmileg.  Ótti minn við slíka byltingu er eingöngu sá að þeir sem fyrir henni stæðu kæmu sér áreiðanlega ekki saman um það sem á eftir ætti að koma. Líklega er það bara vegna þess hve gamall ég er og ónýtur til allra afreka, að mér hugnast alls ekki blóðug bylting. Búsáhaldabyltingin sáluga var heldur ekki blóðug. Nú fimm árum eftir Hrunið mikla er augljóst að sú bylting hefur mistekist með öllu. Ríkisstjórnin er ráðþrota, alþingi óstarfhæft, forsetinn eins og hver önnur grúppía og aðilar vinnumarkaðarins ónýtir með öllu. Hvað er þá til ráða? Háskólasamfélagið er í upplausn. Seðlabankinn einskisnýtur og auðurinn allur kominn til Tortóla. Stjórnleysi er einfaldlega ekki valkostur. Nágrannaríkin mundu aldrei líða það. 

Bíðum bara eftir Sigmundi Davíð. Hann reddar öllu. Eða vill það a.m.k. Svo getum við hægt og rólega sett hann af. Hvað tekur þá við? Ekki er víst að Bjarni sé neitt betri. Auðvaldið kemur samt alltaf standandi niður. Vinnur kosningar eftir því sem með þarf. Hugsanlega með hjálp fáráðlinga, en þeir hafa sinn atkvæðisrétt eins og aðrir. Kannski það sé bara best að gera ekki neitt!!

Fátt er svo með öllu illt að ei boði gott.
Það má finna útúr öllu ánægjuvott.

Var sungið hér um árið og er kannski enn. Pollýönnu-leikur er vinsæll. Krakkarnir vilja auðvitað heldur fara í Grand Theft Auto og vita jafnvel ekki hvað Pollýönnu-leikur er.

Eiginlega getur ríkisstjórnin ekki verið svo slæm að ekki sé hægt að kjósa á móti henni í næstu kosningum. Já, en það eru fjögur ár þangað til. Í millitíðinni getum við allavega kosið Gnarrinn í næstu borgarstjórnarkosningum og látið þannig í ljós óánægju okkar. Er það samt ekki ansi máttlaust? Jú, sennilega.

Þegar Þórbergur Þórðarson tók til við að skrifa ævisögu Árna prófasts Þórarinssonar var sagt að þar kæmu saman lygnasti maður landsins og sá trúgjarnasti. Líklega var með því meint að Þórbergur væri trúgjarn í meira lagi. Sennilega hefur það verið vegna þess að hann virtist trúa í einlægni á annað líf og drauga. Á margan hátt ber ég samt mesta virðingu fyrir honum vegna esperantó-baráttu hans. Hún bar vott um mikla framsýni. Vissulega var hann líka mikill meistari orðsins en heimsborgari var hann ekki á sama hátt og þeir Halldór Laxness og Gunnar Gunnarsson.

Þegar tveir andans jöfrar leggja saman einsog í bókinni „Trúin, ástin og efinn“ má búast við miklu. Rögnvaldur Finnbogason, sem ég þekkti vel þegar hann var prestur að Staðastað, er frásögumaður í þeirri bók enda er hún einskonar ævisaga hans. Guðbergur Bergsson er skrásetjari. Hann er einhver þekktasti rithöfundur hér á landi nútildags enda hefur hann verið með afbrigðum mikilvirkur. Þegar ég bjó við Vífilsgötuna bjó hann þar einnig. Býr kannski í Grindavík núna, eins og fleiri góðir menn. Þegar bók hans „Tómas Jónsson, metsölubók“ kom út las ég hana alla og hreifst mjög af. Síðan hef ég lesið margt sem frá hans hendi hefur komið en allsekki allt. Bók þessi „Trúin, ástin of efinn“ er til hér á heimilinu og ég rakst einmitt á hana fyrir skemmstu uppi í hillu. Hef samt aldrei komið því í verk að lesa hana.

Krunk, krunk og korriró
í kofanum útmeð sjó.
Endemis aflakló
andlega veitir fró,
en sumum varð um og ó,
og þó.

Einhver hélt því fram að það væri algjör einangrunarstefna að vilja einangrast inni í ESB. Finnst það dálítið fyndið. Sér er nú hver einangrunarstefnan. Sjálfstæðismenn eru í rauninni kommúnistar og miklir Rússavinir. Þetta hélt ég að allir vissu. Á endanum mun Rússland verða hluti af ESB. Bandaríkin eru á fallanda fæti. Rússneski björninn er það sem koma skal. Pútín verður ekki eilífur. Ætli Kasparov taki ekki við. Hann eldist reyndar líka.

Röndóttur steinn.

Athugasemdir

[Haukur Kristinsson 20.10.2013 kl. 10:35]

Alltaf jafn gaman og gott að lesa þínu ágætu pistla Sæmundur.

Kveðja frá Peloponessos. HK

[Sæmundur Bjarnason, 20.10.2013 kl. 11:34]

Takk Haukur.

Nú er ég nýkominn inn eftir að hafa farið í göngutúr hér í Kópavoginum. Veðrið er fallegt. Dálítið kalt að vísu, en sólskin og logn. Hvað er hægt að hugsa sér það betra.

[Sigurður H Grétarsson 21.10.2013 kl. 13:15]

Algjörlega sammála þér, Sæmundur.

Maður verður alltaf meira og meira kjaftstopp yfir þessari nýju ríkisstjórn okkar, hvernig allt sem gert er virðist vera fyrir þá sem eiga nóg og vilja meira.

Og algjörlega grímulaust.

Skyldu þeir venjulegu launamenn sem einhverra hluta vegna kusu þessi ósköp yfir okkur vera hugsi? Eða það sem líklegra er, skyldu þeir setja x-ið á sama stað eftir 4 ár?

Maður spyr sig. Og satt að segja er ég dauðhræddur um að svarið sé já.

Gott blogg, eins og venjulega.

[Sæmundur Bjarnason, 21.10.2013 kl. 22:53]

Takk Siggi.

Eina vonin er að þetta með x-ið dragist ekki í heil 4 ár.