2004 - Trúir ÓRG fagurgalanum í Sigmundi?

Mér finnst óþarfi að taka þátt í einhverri vinsældakeppni á blogginu. Þó finnst mér allsekki að ég geti kvartað yfir því að vera ekki lesinn. Leit svolítið yfir vinsældalistann á Moggablogginu áðan og sé að margir, sem ég hef mikið álit á sem bloggurum, þurfa að sætta sig við mun minni vinsældir en ég. Auðvitað er ég stórhaus eins og það er kallað og lendi þar með reglulega á forsíðu bloggsins. Einnig gæti ég þess jafnan að auglýsa ný blogg á Facebook. Má annars ekki kalla hana fésbók, mér finnst langeðlilegast að nota gælunafn um svona vinsælt fyrirbrigði. Og svo er ég skráður á blogg-gáttina auk þess að blogga mjög oft.

Öruggast til vinsælda, ef mælt er eftir aðsóknartölum, er að blogga mjög oft og sem mest um þau mál sem hæst ber hverju sinni. Linka síðan í fréttir á mbl.is o.s.frv. Já, ég vonaði eiginlega að ÓRG mundi neita að undirrita lögin um lækkun veiðigjaldsins. Þjóðaratkvæðagreiðslur um mikil hitamál eru vissulega af hinu góða. Eftirá séð var sú skýring mest sannfærandi að ríkisstjórnin hafi vitað þetta allan tímann og þessvegna ekki viljað veita neinn afslátt frá ítrustu hugmyndum LÍÚ.

Mikið er rætt um lögregluofbeldi þessa dagana og er það af ærnu tilefni. Myndband hefur verið sýnt í fréttum og víðar af viðbrögðum lögreglunnar við drukkna konu á Laugavegi. Hafi konan hrækt framan í lögreglumanninn eru viðbrögð hans kannski skiljanleg, en alls ekki afsakanleg. Skelfilegt er að hugsa til allra hinna ómynduðu viðbragða lögreglunnar sé þetta sjálfsagt og eðlilegt. Orð vitna á viðbragðsstað eru yfirleitt lítils metin. Sjálfdæmi lögreglunnar virðist algjört.

Trúir Ólafur Ragnar fagurgalanum í Sigmundi Davíð? Já, sennilega gerir hann það eins og fleiri. Sumum (mörgum) finnst að þeir verði að gera það, m.a. vegna þess að þeir kusu hann (Sigmund) eða finnst þeir vera í forréttindastéttinni þó þeir séu það ekki í raun. Ástæðan fyrir því að hægri sinnum gengur oft betur að stjórna er einkum sú að stórfyrirtækin vita vel hverja þau eiga að styðja og gera það á réttan hátt. Hin ástæðan er sú að stórum hluta þjóðarinnar finnst þeir í rauninni vera ríkari en þeir eru og að vinstri sinnar séu oft ansi miklir draumóramenn.

Í einhverjum skilningi finnst ÓRG sennilega að hann sé loksins kominn heim. Hann byrjaði feril sinn sem framsóknarmaður og nú vill hann loka hringnum á svipaðan hátt. Sennilega trúir hann því í einlægni að „framsóknarhugsjónirnar“ muni standast atlögu „stórkapítalismans“, en svo mun ekki verða. Þjóðrembingur Sigmundar mun verða honum að falli og Doddson og Co. munu fagna sigri að lokum.

Jarðýta.

Segir forsetann skorta hugrekki

Athugasemdir

[Sæmundur Bjarnason, 10.7.2013 kl. 07:55]

Svona eftirá séð finnst kannski sumum að þessi mynd sé meira rammandi en áætlað var. Hún var einfaldlega næst í röðinni.

[Ellismellur 12.7.2013 kl. 13:48]

Hvar er þessi beltavél niðurkomin? Ef ég þekki rétt, er þetta IH TD14 og trúlega af árgerðunum frá 1946 - 1952, sem voru nokkuð svipaðar og þarf kunnáttufólk til að greina á milli ef upprunaspjöld eru glötuð. En það væri gaman að fregna hvar þetta eðaltæki er statt.

[Sæmundur Bjarnason, 12.7.2013 kl. 23:42]

Svona tæki voru alltaf kölluð jarðýtur í gamla daga. A.m.k. þar sem ég þekkti til. Þetta tæki er á Kársnesinu í Kópavogi niður við sjó í Fossvoginum. Hugsanlega er þetta skemma frá Þjóðminjasafninu sem er í baksýn. Ýtan gæti verið í þeirra eigu líka. Jafnvel er það ekki ólíklegt. Minnir að það sé eitt gamalt tæki þarna á svæðinu auk ýtunnar. Það eru samt alls ekki neinar járnahrúgur þarna. Meira af slíku er hjá Siglingastofnun sem er til húsa þarna rétt hjá.