1885 - Verðtrygging

Á fésbókinni skrifar einhver (framsóknarmaður??) um að hann telji að eignamyndun hafi átt sér stað hjá sér, varðandi íbúðarhúsnæði, þó skuldin við íbúðalánssjóð sé hærri nú en upphaflega, vegna þess að húseignin sé miklu meira virði en hún var þegar hann keypti hana. Þessu er ég sammála. Þó mikið sé andskotast útí verðtrygginguna þessa dagana og látið í veðri vaka af pólitíkusum að hún sé upphaf og endir alls ills er hún í mínum huga aðeins annað nafn á vöxtum. Þegar verðtryggingunni er hallmælt sem mest er venjulega verið að deila á framkvæmd hennar og vísutölubindinguna. Pólitíkusar hafa haldið því fram að við hvorugu megi hrófla en það er mesti misskilningur og íhaldssemi.

Hingað til hefur munurinn á innláns og útlánsvöxtum (sem er mikill hér á landi) verið notaður til að styrkja bankana. Sú styrking var auðsjáanlega orðin alltof mikil í hruninu. Þetta er auðvelt að sjá eftirá. Misrétti í framkvæmd verðtryggingarinnar var einkum notað til að styrkja lífeyrissjóðina sem aftur voru látnir tryggja ríkisvaldinu möguleika á að hafa skatta tiltölulega lága með því að taka frá þeim skylduna til að greiða mannsæmandi ellilaun. Með því að stjórnvöld tryggðu síðan mikið eftirlitsleysi gátu útrásarvíkingar fengið aðgang að ódýru lánsfjármagni. Svo fór auðvitað sem fór og allt varð á skammri stund vonlaust.

Að halda því fram að setja eigi lög sem banna verðtryggingu er eingöngu að pissa í skóinn sinn. Það er vísitölubindingin sem er vitlaus og framkvæmdin á verðtryggingunni kann að vera það líka. Merkilegt þykir mér að það eru oft sömu stjórnmálamennirnir sem halda því fram að allt sé ómögulegt hjá ESB (Icesave o.fl.) og vilja svo nota einhverja tilskipun þaðan til að losna við verðtrygginguna og útvega sér um leið fáein atkvæði.

Undanfarið hafa einhver Jón Geir og María Ýr stundað það að setja linka á ómerkilegar auglýsingar í athugasemdakerfið hjá mér og ekkert annað. Ekki veit ég hver þau eru og hef engan áhuga á að vita það. Aðallega setja þau óorð á þessi nöfn og kannski eru það ekki einu sinni lifandi verur sem gera þetta. Ef þessu heldur áfram og versnar kannski, mun ég að sjálfsögðu kæra þetta til Moggabloggsguðanna. Þeim ber skylda til að sjá um að svona lagað gerist ekki.

Kannski er helsti gallinn á blogginu mínu að það fjallar ekki um neitt ákveðið efni, heldur fer það sem ég blogga um bara eftir því á hverju ég hef áhuga í það og það skiptið. En ég hugsa bara svona og get ekki að því gert.  Þykist vera allgóður stílisti en oft er það svo að ég finn að ég veit ekki nærri nógu mikið um það sem ég leiðist útí að skrifa um.

Fullyrðingar Jónasar Kristjánssonar og margra fleiri um að „fólk sé fífl“  og tal um gullfiskaminni og þess háttar, ber vott um hroka. Mér finnst ég vera laus við þesskonar hroka en allsekki er víst að allir samþykki það. Upplifun hvers og eins er sannleikur hans og staðreyndir skipta oft litlu máli. Með því að forðast umtal um þær hliðar mála sem vafasamar eru má oftast leiða talið að öðru. Mín skoðun er einfaldlega sú „að fólk sé ekki fífl“. Hæfileikar hvers og eins beinast samt að sjálfsögðu í mismunandi áttir og fífl eru til.

Skipsmódel.

Athugasemdir

[Ellismellur 20.2.2013 kl. 05:49]

Eins og oft hefur komið fram, var verðtryggingin við upphaf hennar (Ólafslögin) miðuð við s.n. lánskjaravísitölu. Hún mældi ekki það sama og vísitala neysluverðs, t.d. hækkuðu lánin ekki þótt brennivínið hækkaði. Það var hinsvegar að undirlagi bankanna með stuðningi Vinnuveitendasambandsins, sem þá hét (nú SA) að þessu var breytt á níunda áratug síðustu aldar. Þá var líka afnumin verðtrygging launa, sem var grundvallaratriði í Ólafslögum og var ætlað að stuðla að stöðugleika.

[V.Jóhannsson 20.2.2013 kl. 12:19]

Húseignin er ekkert meira virði í dag en þegar hann, (framsóknarmaðurnn), kaupir hana, nema að hann hafi endurbætt og jafnvel byggt við.

Það er krónan sem hefur hrunið mörg 1000 falt. Einfalt.

Hann verður að bera söluverðið við aðra fasteign sem hann kaupir á sama tíma!

Hitt er að steinsteipa stendur oftast fyrir sínu.

Ég hef bent á það annarsstaðar, að rjómabolla, sem kostaði eina krónu í Sveinsbakaríi 1950 kostar í dag, ef við tökum ekki tvö núllin af krónunni( mesti þjófnaður Íslandsögunnar), kr. 33.200.00 (332). Það er krónan og heilabúið í íslendingum sem hefur rýrnað. Kv.

[Jóhannes Laxdal Baldvinsson, 20.2.2013 kl. 15:55]

Það er krónan og heilabúið í íslendingum sem hefur rýrnað. Kv.

V.Jóhannsson 20.2.2013 kl. 12:19

Hjartanlega sammála. Og þetta verða ummæli ársins   Takk fyrir það

[Sæmundur Bjarnason, 20.2.2013 kl. 23:02]

Er ekki sammála þessu með heilabúið og held að það styðjist ekki við nein sérstök rök eða mælingar. Augljóst er að verðtryggingin eins og hún er notuð í dag er óæskileg.