1884 - AMX

Þann níunda desember 2008 hef ég skrifað eftirfarandi:

Vefmiðlar spretta upp eins og gorkúlur á haugi um þessar mundir. AMX er einn kallaður. Ekki hef ég hugmynd um fyrir hvað þessir stafir standa. Frá stofnun hefur þessi vefur verið fremsti fréttaskýringarvefur landsins eftir því sem sagt er í hausnum. Þetta er skrýtinn vefur og ekki gott að átta sig á honum. Hægrisinnaður er hann þó örugglega og mótfallinn EU-aðild. Meðal fyrstu  pistlahöfunda á þessum óviðjafnanlega fréttaskýringarvef má nefna Jónas Haraldsson, Styrmi Gunnarsson, Óla Björn Kárason, Björn Bjarnason og Bjarna Harðarson.

Við þetta er litlu að bæta. Kjaftasögurnar þar eru kallaðar „fuglahvísl“ og með því er sennilega verið að vitna í þýska talsháttinn „Das hat mir ein Vogel gesagt“. Annars kann ég afar lítið í þýsku og kannski er þetta tóm vitleysa hjá mér.

Enn er fuglahvíslið á AMX við sama heygarðshornið. Sá þar eftirfarandi um daginn þó ég lesi bullið þar afar sjaldan. Þar var verið að vitna í forstjóra Landsvirkjunar og í hugleiðingum AMX er sagt að hann hljóti að hafa skipt um skoðun. (Eins og hann megi það ekki.)

Við teljum að fjármögnun í gegnum fjármálastofnanir muni ganga eftir á næstu vikum ef tekst að ljúka Icesave-deilunni. [...] Út frá hagsmunum fyrirtækisins tel ég það afar jákvætt að leysa þetta Icesave-mál. Þetta mun örugglega auðvelda okkur fjármögnun, og þá ekki bara fyrir Búðarháls heldur fyrir öll önnur verkefni sem við erum með í skoðun. Lausn þessa máls hefði líka jákvæð áhrif á lánshæfismat fyrirtækisins og íslenska ríkisins sem myndi hafa jákvæð áhrif á aðgengi að fjármagni fyrir öll íslensk fyrirtæki.

Samkvæmt skoðun AMX (eða fuglanna þar) er EFTA-dómurinn semsagt ekki lausn.

Í sannleika sagt held ég ekki að Framsóknarflokkurinn eigi sér viðreisnar von í komandi kosningum og Sjálfstæðisflokkurinn vinnur varla þann sigur sem flokksmennirnir vonast eftir. Fráfarandi stjórn á heldur ekkert gott skilið og fær það nánast örugglega ekki. Nýju flokkarnir hljóta þá að vera helsta vonin. Hvernig þeir skipta atkvæðunum á milli sín á alveg eftir að koma í ljós. Annars eru stjórnmálin svo óljós að ég ætla að hætta að hugsa um þau núna.

Samkvæmt frétt http://www.mbl.is/frettir/innlent/2013/02/18/vid_aettum_ad_eiga_bestu_skolana/ sem ég var að lesa á mbl.is fá 27,5% grunnskólanemenda á Íslandi sérkennslu. Ekki veit ég hvernig þessi tala er tilkomin en mér finnst hún ansi há. Gefið er í skyn í greininni að vel væri hægt að minnka þetta í svona 5% og mér þætti gaman að vita hvort reyndir skólamenn eru sammála þessu. Sé svo er augljóst að núverandi grunnskólastefna er stórgölluð og mikil þörf á að lagfæra hana. Kannski er þetta bara innlegg í Katrínarsönginn í Hádegismóum en ég vil samt ekki trúa því að komandi kosningar komi þarna við sögu.

Málverkasýning.

Athugasemdir

[Maria Ýr 19.2.2013 kl. 03:07]

(Athugasemd með auglýsingatengli fjarlægð af umsjónarmönnum.)

[Sæmundur Bjarnason, 19.2.2013 kl. 11:08]

Það er ókurteisi að setja bara link á auglýsingu í athugasemdir. Athugaðu það María Ýr, hver sem þú ert.

[Jens Guð, 19.2.2013 kl. 22:09]

  Dagblöðin birta stundum lista yfir heimsóknir á vefmiðla.  Amx sést ekki á þeim lista.  Sá miðill virðist því vera einhver "lókal" miðill fárra.  Ég hef aðeins kíkt þangað inn þegar vitnað er í mig þar.  Mér hugnast ekki efnistök þarna. 

[Sæmundur Bjarnason, 20.2.2013 kl. 00:20]

Já, ég hef líka lítið álit á AMX.