1833 - Fésbókin og fleira

 

Galdurinn við fésbókina er að hafa mátulega marga vini skilgreinda sem nána vini (og auðvitað þá réttu). Mér er sagt að þeir geti ekki komist að því. Þá fær maður alltaf tilkynningar þegar þeir skrifa eitthvað og getur fylgst með öllum þeirra skrifum. Annars skrunar allt svo hratt framhjá að engin leið er að fylgjast með. Þ.e.a.s.ef maður er með marga fésbókarvini. Ég var einu sinni að safna slíkum og er með næstum 500 stykki.

Mikið er fjasað um kæsta skötu þessa dagana. Hef reyndar aldrei smakkað hana en lyktin er ferleg og kalla ég þó ekki allt ömmu mína í þeim efnum. Saltfiskur var alltaf á borðum í foreldrahúsum á laugardögum. Hann var ágætur, ef maður gat valið sér stykki. Sum voru þó fremur vond. Ný ýsa var ódýrasti matur sem hægt var að fá. Svona u.þ.b. þriðjungur til helmingur af kjötfarsverði. Yfirleitt bara skorin í stykki og soðin þannig. Þessvegna var sporðurinn bestur því einfaldast var að ná beinunum úr honum.

Ef kæst skata er raunverulega það góðgæti sem sumir segja, af hverju er hún þá ekki borðuð oftar? Veitingahús sem sérhæfðu sig í kæstri skötu mundu stórgræða. Aðalgallinn við hamsatólgina (þó góð væri) var alltaf hve fljótt hún storknaði. Og þá var hún fremur vond.

Já, líklega vill meirihlutinn fá 2007-ástandið aftur. Halda að það sé í lagi að selja allt sem seljanlegt er og skulda sem allra mest. Það er samt flest sem bendir til að það geti ómögulega verið viðvarandi ástand. Það kemur alltaf að skuldadögunum. Spurningin er bara hve snemma það verður. Hrunið 2008 var óþyrmilegt. Kannski var það líka óhjákvæmilegt. Þó uppgjör þess fari alls ekki eftir því sem flestir vilja, þá er óhugsandi annað en að sætta sig við breytta heimsmynd og taka því sem nú er, sem því sem koma skal. Er það ekki skárra en óvissan eða að steypa sér aftur útí vitleysuna? Ég veit það ekki, en held það.

Bloggið mitt er með daufasta og pólitískasta móti núna. Ekki er það heimsendaleysinu að kenna og ekki þeirri firru að rétta ráðið til að koma í veg fyrir fleiri Sandy Hook atburði sé að hafa vopnaða verði í hverjum einasta skóla. Frekar er það útaf því hvað dagurinn er stuttur og að 9 gráðu hæð sólarinnar á himninum náist ekki fyrr en 1. febrúar. Gott að vera laus við snjóinn hérna á Stór-Kópavogssvæðinu, en á móti kemur að myrkrið er hálfu svartara fyrir vikið.

Brúin yfir Kringlumýrarbraut.

Athugasemdir

[Jóhannes Laxdal Baldvinsson, 22.12.2012 kl. 15:47]

Að afneita orðum síns Herra
um Ésúbarn liggjand' í jötunni
er verjandi en hitt er verra
að vilj' ekki smakka á skötunni

Gleðileg jól Sæmi

[Jóhannes Laxdal Baldvinsson, 22.12.2012 kl. 17:08]

p.s  Við nánari endurskoðun hljóðar vísan betur svona:

Að afneita orðum síns Herra
um Ésúbarn liggjamd' í jötu
er verjand' en hitt er þó verra
að vilj'ekki smakka á skötu

[Sæmundur Bjarnason, 22.12.2012 kl. 20:24]

Ilmurinn ei má þverra

elskar hann margur fús.

Ekkert þó verður verra

en veitingaskötuhús.

Gleðileg Jól Jóhannes.

[Sæmundur Bjarnason, 23.12.2012 kl. 04:02]

Og eins og Laxdalinn þarf ég að lagfæra pínulítið. Uppsetninguna líka.

Ilmur sá ei má þverra
elskar hann Laxdalsmús.
Ekkert þó verður verra
en veitingaskötuhús.

SB

[Jóhannes Laxdal Baldvinsson, 23.12.2012 kl. 11:27]

Hérna fer kallinn á kostum
og kveðskapinn leiðrétta kann.
Ætli hann fúlsi við ostum!
Ja, Áslaug á gikk fyrir mann

[Sæmundur Bjarnason, 24.12.2012 kl. 04:53]

Hér má tilfæra gamlan húsgang sem er svona:

Hossir þú heimskum gikki
hann gegnur lagið á.
Og ótal asnastykki
af honum muntu fá.

En svona í tilefni dagsins get ég reynt að hnoða einhverju saman:

Já, ostur mun afar góður
ætið ég kýs mér hann.
En Lutefisk fær sér fróður
ferlegur skötumann.

Og til að jafna metin er hér enn einn gamall húsgangur:

Annar lapskáss bar á borð
og beinakex fyrir náðarorð.
Hinn gaf okkur harðan fisk
og hangikjöt á silfurdisk.

Þetta var einskonar samanburður á ræðum tveggja kennimanna. Höfundur: Gestur á Hæli.