1738 - Hatursáróður kirkjunnar

Eftirfarandi klausu setti ég á fésbókina í gær. Held að ég hafi aldrei skrifað jafnlangt innlegg þar. Endurtek það hér á blogginu mínu, en þeir sem þegar hafa lesið það geta auðvitað sleppt því. Aðallega er ég að hugsa um að bjarga þessari snilld frá „glatkistunni gaflalausu“, sem mér finnst fésbókin vera:

„Svokallaðar rökræður eru oft lítils virði. Hver og einn talar einkum um það sem hann (eða hún) hefur áhuga á. Spurningum er ekki svarað og áhersla lögð á það sem viðmælanda finnst ekki skipta máli. Oft er leitað í stjórnmálaskoðanir til að finna rök og þvæla viðmælandanum út í eitthvað annað en hann vill ræða.

Í bloggi mínu í gær ræddi ég m.a. um hina biblíulegu auglýsingu í Fréttablaðinu og taldi hana meinlitla. Jóhann Páll Jóhannsson blaðamaður á DV skrifar um þetta mál og kallar auglýsinguna hatursauglýsingu. Ég tel hana ekki vera það og málfrelsið mikilvægara, en vil samt benda á eitt sem styður málflutning Jóhanns á vissan hátt.

Þeir sem telja ekki vera um hatursskrif hjá Jóhanni eða andstæðingum hans að ræða geta varla talið málflutning æstustu múhameðstrúarmanna (islamista) vera hatursskrif. Hugsanlega er hægt að ganga of langt í stuðningi sínum við málfrelsi, en mér finnst ekki að Jóhann eða hans líkar eigi að ákveða það. Hver á þá að skera úr? Þar liggur vandinn einmitt. Ef úrskurður einstakra aðila skiptir jafnmiklu máli og mér finnst Jóhann telja í þessu máli er varla um annað að ræða en spyrja almenning.

Þannig er lýðræðið. En auðvitað er ekki hægt að hafa þjóðaratkvæðagreiðslur um öll mál og  skoðanakannanir geta e.t.v. komið í staðinn. Fyrirfram þurfa aðilar þá að fallast á þá aðferðafræði sem notuð er og það getur orðið þrautin þyngri“.

Svolitlar umræður þó undarlegar væru spunnust um þetta innlegg þar og þeir sem mikinn áhuga hafa á þessu efni geta séð þær á fésbókinni.

Annars skila deilur um trúarbrögð, (sama er reyndar að segja um mannréttindi) hvort sem er á bloggi eða fésbók, afar litlu. Fyrir því er löng reynsla. Ég ætla rétt að vona að ofurlangur svarhali myndist ekki við þessa færslu.

Örvhendi. Samkvæmt frétt á RUV er dagur örvhendra í dag 13. ágúst. Skv. fréttinni er hlutfall örvhendra barna um 10 prósent. Þetta leyfi ég mér að efast um. Held að hlutfallið sé hærra. Í fréttini var líka sagt að álitið sé að örvhendi stafi aðallega af áfalli á meðgöngu. Er alls ekki sammála því. Annars finnst mér örvhendi og örvhendi alls ekki vera það sama. Oft er um mismunandi sterka tilhneygingu til örvhendis að ræða og það sem einn kallar örvhendi kallar annar eitthvað allt annað. Einhversstaðar hef ég lesið að ef fólk hefur svotil alveg jafna tilhneygingu til örvhendis og rétthendis sé það ávísum á andlega erfiðleika.

Það er ekkert til sem heitir matarskattur og hefur aldrei verið. Á sínum tíma var samt mikið talað um slíkan skatt. Söluskatturinn sálugi var misjafn og sumt var undanþegið honum. Einn af kostunum við virðisaukaskattinn þegar hann var tekinn upp var að hann átti að leggjast á allt jafnt. Ekki leið samt á mjög löngu áður en farið var að mismuna með honum. Flest matvæli bera nú lágan virðisaukaskatt og ferðaþjónustan einnig. Forystufólk þeirrar þjóustu er nú komið í grenjuflokkinn með LÍÚ og hefur hátt um vonsku ríkisstjórnarinnar. Best væri auðvitað að allir borguðu jafnháan virðisaukaskatt, þá mætti jafnvel lækka hann eitthvað.

Gámur fjarlægður.

Athugasemdir

[Ellismellur 14.8.2012 kl. 05:26]

Að mestu leyti sammála þér. Hinsvegar langar mig að benda á að það er ekki rökrétt að kalla muslimi múhameðstrúarmenn. Þeir trúa ekki á Múhameð, hann er spámaður Allah að þeirra trú, en Allah er einn og almáttugur, líkt og Jahve hjá gyðingum og Guð hjá sumum okkar. Svo talar maður um tilhneigingu með einföldu skv. stafsetningarorðabók dr. Halldórs Halldórssonar.

[DoctorE 14.8.2012 kl. 07:37]

Það sjá allir sem vilja að þessi trúarbrögð eru ekkert annað en tól sem var og er notað til að stjórna sauðum... Tal um trúarbrögð er það sem er að eyða þeim, internetið er staðurinn þar em trúarbrögðin koma til að deyja; Trúarbrögð þola ekki frjálst umtal, þola ekki neina skoðun.. Við sjáum í gegnum söguna hvernig allir voru drepnir/fangelsaðir ef þeir voguðu sér  að gagnrýna þrælahaldarahandbækurnar(Biblíu/Kóran).
Fátt virkar betur á trúarbrögð en það að lesa bækurnar.. heimskan, viðbjóðurinn, ofbeldið er svo svakalega ömurlegt í þessum bókum. Svo eru það sköpunarsinnar, menn eins og Mofi, mjög margir aftrúast við að lesa og heyra í sköpunarsinnum.
Það dugar vel að tala um trúarbrögð Sæmi.. aldrei í sögunni hafa trúarbrögð staðið jafn höllum fæti; Á Írlandi hefur trú hrapað niður í 47% á stuttum tíma.. í kjölfar þess að kaþólska kirkjan nauðgaði þúsundum barna.. þeir nauðguðu stúlkubörnum, þunguðu þær og myrtu jafnvel börnin þegar þau fæddust, eða seldu í ættleiðingu.
Þetta er hræðilegt en satt... Mr JVJ segir aldrei neitt um þessi alvarlegu mál.. það voru svo margir sem sögðu ekkert.. því gerðist þetta.. þöggunin er alger í trúarbrögðum, myrkrið fullkomið

[Sæmundur Bjarnason, 14.8.2012 kl. 11:36]

Ellismellur, ég er nú svo illa að mér í þessum trúarbragðafræðum að ég rugla alveg saman Múhameðstrúarmönnum og múslimum. Bið afsökunar á því. Þetta með réttritunina er eflaust rétt hjá þér líka. Takk.

[Sæmundur Bjarnason, 14.8.2012 kl. 11:43]

DoctorE, ég hef tilhneigingu til að álíta ykkur Jón Val Jensson á sitt hvorum endanum þegar talað er um trúarbrögð. Er ekki sammála þér um nærri allt, en miklu nær þér samt á línunni en JVJ. Mofa þekki ég lítið.

[DoctorE 14.8.2012 kl. 14:18]

Þú ert þá að meina að JVJ sé vírus og ég anti-vírus muhhahha

[Emil Hannes Valgeirsson, 14.8.2012 kl. 17:28]

Trúarbrögð eru sáttmáli um að allir skuli skilja eða misskilja heiminn á sama hátt svo fólk fari ekki að rífast.

[Sæmundur Bjarnason, 14.8.2012 kl. 19:45]

Emil Hannes, mér finnst fólk nú einmitt rífast af mestri tilfinningu ef um trúarbrögð er að ræða. Kannski eru sáttmálarnir of margir!!

[Emil Hannes Valgeirsson, 14.8.2012 kl. 21:04]

Já, það er einmitt málið. Fólk fer að rífast ef það misskilur heiminn á sitthvorn hátt.