1508 - Fallið og Saga Akraness

Gamla myndin.
„Alltaf eru þeir til óþurftar þessir kettir“ gæti Pési verið að hugsa þarna.

Skárri eru það nú lætin þó einn maður detti í það. Hörpu Hreins fannst bókin hans Þráins um fallið í Færeyjum og flýtimeðferðina á Vogi ekki merkileg og bloggaði um það. Svo er að sjá að sumir séu svo heilagir að ekki megi anda á þá. Þráinn má vel vera alkóhólisti fyrir mér. Ef hann vill endilega skrifa bók um það þá má hann það líka. Það má alveg gagnrýna bókina einnig ef einhver kærir sig um það. Sé samt engan flöt á því að ég kaupi þessa bók. Kannski fæ ég hana lánaða á bókasafninu ef ég rekst á hana þar. Efnið finnst mér samt nauðaómerkilegt.

Úr því ég minnist á Hörpu þá er ekki úr vegi að minnast á Árna Múla Jónasson einnig. Ekki er að sjá að hann ætli að svara henni í neinu. Saga Akraness stendur þó fyrir sínu og ef menn vilja kynna sér málið er hægt að líta í þá bók og á bloggið hennar Hörpu.

Styrinn stendur um það að Páll Baldvin Baldvinsson og Harpa Hreinsdóttir (ásamt mörgum fleiri) telja þessa bók (einkum þó fyrsta bindið) afspyrnu lélega og að peningum þeim sem kastað hefur verið í þetta verkefni (á annað hundrað milljónum króna) hafi verið illa varið. Bæði Árni Múli og Páll Baldvin hafa hótað málaferlum en sennilega treysta þeir sér ekki í þau. Þöggunin er samt í fullum gangi og einkum virðist sumum illa við að Harpa tjái sig um þetta mál.

Ég geri mér engar vonir um að bæjarstjórinn láti svæla sig úr greninu enda hefur hann ekkert að vinna í þessu máli. Verður áreiðanlega hvort eð er ekki endurráðinn í þetta embætti. Bæjarstjórnin treystir vafalaust á að Akurnesingar verði búnir að gleyma þessu máli næst þegar kosið verður.

Blóm í Hveragerði.

Athugasemdir

[Harpa Hreinsdóttir 21.10.2011 kl. 00:54]

Mér hafa gjörsamlega ofboðið lætin yfir þessari bloggfærslu um Fallið, sem verið hafa í dag. Stór hluti þeirra sem tjáir sig hefur alls ekki lesið bloggfærsluna mína þar sem ég benti nú á slatta af kostum við bókina (t.d. að hún væri á köflum fyndin og ákv. lesendahópi þætti hún væntanlega sniðug og fyndin) en meginniðurstaðan var að einlægni og auðmýkt væri afar áfátt í bókinni sem er vitaskuld hroðalegur galli á bók af þessu tagi.

[Harpa Hreinsdóttir 21.10.2011 kl. 01:00]

Þegar ég fæ svo fregnir af því að höfundurinn ljúgi því blákalt á sinni Fésbókarsíðu að hann hafi hafnað FB-vinskap við mig og þess vegna skrifi ég illa um bókina hans er mér allri lokið!  Hið sanna er að hann falaðist eftir fésbókarvinskap við mig, ég samþykkti en dömpaði honum  þegar ég fékk nóg af illmælgisfærslum og umræðu á hans vegg, sem eðlilega slettist inn á minn vegg. Er eðlilegt að rígfullorðinn maður, haldandi fram sínum ágæta bata og heiðarleika og jafnvel manngæsku (skv. bókinni) ljúgi?

[Harpa Hreinsdóttir 21.10.2011 kl. 01:05]

Af Sögu Akraness er ekkert að frétta. Árni Múli hefur engar forsendur til að fara í mál og hafði aldrei. Eftir að greinargerð Páls Baldvins varð opinber finnst mér afar ólíklegt að Uppheimar hafi áhuga á að koma meira nálægt þessu verki, hvað þá önnur bókaforlög. Ég reikna allt eins með að Páll Baldvin fari í persónulegt meiðyrðamál við Árna Múla og vinni það. Það verður áhugavert að sjá hvort bókaforlögin sem stolið var frá höfði mál gegn Gunnlaugi Haraldssyni og Uppheimum. En sem sagt: Engar fréttir af Sögu Akraness (sem hljóta að teljast góðar fréttir).

[Vilhjálmur Örn Vilhjálmsson, 21.10.2011 kl. 05:51]

... og allir komur þeir aftur, og enginn þeirra dó...

Ég bíð eftir sögu Þórshafnar...

[Sveinn R. Pálsson, 21.10.2011 kl. 09:16]

Viðbrögðin við bókardómi Hörpu Hreinsdóttur eru svona hörð, vegna þess að dómurinn hitti algjörlega í mark. Maður sannfærðist um að þetta getur ekki verið merkileg bók. Ljóst að vinir Þráins hafa fyrst og fremst áhyggjur af sölu bókarinnar en ekki gæðum hennar.

[Sæmundur Bjarnason, 21.10.2011 kl. 11:15]

Villi, mörg bæjarfélög hafa lagt metnað sinn í að láta skrifa stórar og þungar bækur um sögu sína. Hafa þó ekki hent hundruðum milljóna í þau verkefni. Saga Akraness tekur þeim öllum fram í þyngd og stærð.

Sveinn, sammála þér um það að margir virðast vilja að þessi bók Þráins seljist sem mest, alveg burtséð frá gæðunum.