1280 - Blogg og bókasöfn

Svo haldið sé áfram með óveðurssögur frá Vegamótum, þá var aðkoman stundum á þessa leið á morgnana. 

Einhver fjöldi fólks er það sem les bloggið mitt að staðaldri. Að hluta til eru það eflaust ættingjar. Þó vafalaust ekki allir. Margir af þeim sem oft lesa bloggið mitt hljóta að vera farir að venjast því hvernig ég hugsa. Þó vita þeir kannski ekki neitt eða hérumbil ekki neitt um mig persónulega. Einkennilegt það. Finnst mér a.m.k. Kannski ættingjum líka og þeim sem þekkja mig vel.

Nú er allt að verða vitlaust í Líbýu. Áður í Egyptalandi og víðar. Hvar endar þetta? Ég get sagt ykkur það. Bensínverð mun rjúka upp (5 - 600 kr. pr. líter) og jafnvel í Bandaríkjunum mun bensínverð fara að nálgast verð annars staðar. Lýðræðið mun sigra. Lífskjör á Vesturlöndum verða lakari. Síðan mun allt fara í svipað far og var. Náttúruhamfarir munu taka fyrsta sæti sem fréttaefni og svo mun röðin koma að svörtu Afríku. Þá verð ég dauður.

Ég er með þeim ósköpum gerður að ég get ekki án bókasafna verið. Fyrrum átti ég erfitt með að muna eftir að skila bókum en það er liðin tíð. Takist mér ekki að lesa þær bækur sem ég fæ lánaðar tek ég þær bara að láni aftur. Og enn aftur ef með þarf.

Mér er ráðlagt að blogga sjaldnar og hætta þessu væli. Það er að vonum. Þó ég þurfi að lesa þessi ósköp og það jafnvel oft til að ganga úr skugga um að þetta sé sæmilega gert þá er ekki þar með sagt að aðrir þurfi að gera það. Hér með er þeim gefið frí sem eru hálfleiðir á þessu jukki.

Sé að Tenerife-myndirnar ætla að endast mér eitthvað. Það er gott. Grámyglan hér er ekki vinveitt ljósmyndum. Rigningarsúldin ekki heldur. Þegar vorið fer að bæra á sér er samt fátt sem jafnast á við ástandið hér, ljósmyndalega séð.

„Eru ALLIR svona vitlausir nema öfgamenn Heimssýnar og Páll Vilhjálmsson?" Páll Blöndal ræðir ESB og spyr svona. Ég held að málið sé aðeins flóknara en þetta og þeir séu fleiri sem andvígir eru inngöngu í ESB. Kannski er andstaða þeirra tómur misskilningur en áreiðanlega er það ekki vegna þess að þeir séu vitlausari en aðrir. Það er einfaldlega ekki hægt að ræða þessi mál á þvílíkum nótum sem hér er gert. Yfirleitt finnst mér andstæðingar ESB eiga fleiri svona hjákátlegar fullyrðingar en ef til vill finnst öðrum það ekki. Að tengja saman Icesave málið og aðild að ESB á þann hátt sem hollenskur þingmaður nokkur og einhverjir aðrir virðast gera er og fásinna hin mesta.

Don Quixote á verði.

Athugasemdir

[Harpa Hreinsdóttir 24.2.2011 kl. 11:00]

Mér finnst jukkið skemmtilegt og les það á hverjum degi. Sé enga ástæðu til að breyta neinu en auðvitað ræðurðu sjálfur þínu bloggi og skrifar sem þig lystir hverju sinni - það er svo lesenda að ráða hvort þeir lesa eða ekki.

Sem daglegur lesandi tek ég fram að við erum óskyld þannig að ég telst nú ekki ættingi :)  En við erum náttúrlega tengd og fyrrverandi göngufélagar og kunningjar af Imbu o.s.fr. Ekki að það skipti samt máli upp á daglegan lestur af minni hálfu. Ég myndi líklega lesa þetta blogg þótt ég þekkti þig ekkert fyrir. Enda eitt af fáum moggabloggum sem ekki snýst um að kalla aðra fífl og hálfvita í annarri hvorri málsgrein (þ.e. ef viðkomandi moggabloggari nær að blogga meir en eina málsgrein, sem oft er ekki).

P.s  Af hverju heitir færslan "og bókasöfn"?

[Sæmundur Bjarnason, 24.2.2011 kl. 11:26]

Takk, Harpa.

Þetta með bókasöfnin er tilkomið útaf málsgreininni sem byrjar svona: Ég er með þeim ósköpum gerður.... Þar er minnst á bókasöfn og þar að auki fór ég á bókasöfnin mín í gær. Auk þess þurfa færslurnar að heita eitthvað. Oft skíri ég þær ekki fyrr en rétt áður en ég set þær upp svo nafnið getur verið tilviljunum háð.

[Númi 24.2.2011 kl. 11:53]

Þú ritar Sæmundur  að eflaust séu það mest ættingjar þínir sem lesa bloggfærslur þínar. Ekki er ég í fjöldskyldu þinni, en les blogg þitt ætíð vegna skemmtilegra uppsetningu og þar af leiðandi uppfræðandi og bara mannleg og svo verður maður svo afslappaður við lestur pistla þinna . Sérstaklega gaman að lesa um Snæfellsnes,og nágrenni þar í kring,og skemmtilegar og auðvitað flottar myndir hjá þér inn á milli.   Hafðu þökk.

[Sæmundur Bjarnason, 24.2.2011 kl. 14:53]

Takk, Númi.

[Sigurður Hreiðar, 24.2.2011 kl. 15:11]

Ekki veit ég til að við séum skyldir en ugglaust hafa leiðir okkar einhvern tíma legið saman. Ég fylgist með blogginu þínu og hef oft gaman af þó stundum þyki mér frekar þunnt á síðunni; það gerir ekkert til því það gengur bara betur næst eins og þeir sögðu á Spaugstofunni hér áður -- og segja kannski enn sem ég veit ekki því ég er ekki með Stöð 2

Og þó ég sé ekki ýkja kunnugur á Snæfellsnesinu þykir mér gaman að myndunum þínum frá Vegamótum. Varstu verslunarstjóri þar? Ertu búinn að blogga eitthvað um það? Eflaust gætirðu rifjað upp eitt og annað áhugavert/spaugilegt frá þeim tíma.

[Sæmundur Bjarnason, 24.2.2011 kl. 16:17]

Já, Sigurður ég var verslunarstjóri á Vegamótum í 8 ár. Frá 1970 til 1978 og það var eftirminnilegur tími. Þar gerðist margt og ég hef stundum bloggað um það. Endurminningar er svolítið lengi verið að skrifa því maður vill helst hafa allt rétt og sæmilega orðað og frá sagt. Enga má heldur meiða og það er miklu auðveldara að láta móðann mása um málefni dagsins.