1159 - Hér var 1000000 tonnum týnt

Einhverntíma orti ég í tilefni af fréttum um að hafrannsóknarstofnun hefði beinlínis „tapað" einum 1000000 þorskígildistonnum í útreikningum sínum. (Skrifaði reyndar fyrst óvart um stútreikninga og kannski er það réttara.) 

Hér var milljón tonnum týnt
í torráðinni gátu.
Þjóðinni var svarið sýnt.
Sægreifarnir átu.

Nú þykir mér þetta jafnvel sannara en þegar ég gerði vísuna. Kannski má halda því fram að sægreifafíflin hafi ekki étið þorskinn í bókstaflegri merkingu en allavega hafa þeir eytt honum og útrýmt. Þó bankamannablókirnar hafi sett þjóðfélagið (þjófafélagið) á hausinn er jafnvel grátlegra að sjálf lífsbjörgin hafi verið eyðilögð á altari útvegsmannagræðginnar.

Bjarni í kaupfélginu (mér verður tíðrætt um hann) taldi það eina af sínum merkari uppfinningum að hafa komið fyrir útbúnaði sem hann sýndi mér. Hann hafði lagt slöngu ofan af hálofti úr bruggkútnum sem þar var niður í íbúð sína svo hann þyrfti ekki alltaf að klöngrast þangað upp í hvert skipti sem vökva þurfti lífsblómið.

Svo er hérna tilgáta sem varpað hefur verið fram. Var Jón bensín bara kallaður Jón bensín af því hann var rauðhærður? Held ekki, því ég heyrði nýlega sögu um annað en er bara búinn að gleyma henni.

Í veizlu (með setu sem er hæsta stig) sem ég lenti í um daginn (laugardaginn) ræddi ég lengi við mann um persónur í Njálu og Sturlungu. Já, þetta er óþrjótandi umræðuefni enn í dag og þeir sem ekki hafa ennþá lesið þessi höfuðrit og tileinkað sér þau ættu að gera það sem fyrst. Pant vera fyrstur til að gefa Sturlungu út í Kindle-útgáfu með myndum og tilbehör.

Það er þónokkur fjöldi fólks sem vill ekkert með fésbók hafa þó það tölvist jafnvel allmikið. Því hugnast hún ekki og það skráir sig ekki þar. Sumt af þessu fólki les gjarnan blogg og fyrir það skrifa ég ekki síst. Ég get vel skilið óvilja fólks gaganvart skráningu á fésbókina. Meðal annars er hún flestum tímaþjófur hinn mesti og hættuleg og varasöm að auki, því stórfyrirtækjum er seldur aðgangur að þeim upplýsingum sem þar er að finna. Á fésbókinni er þó hægt að una sér daginn langan við allskyns rísl. Auðvitað er hægt að ráða tölvunotkun sinni þar eins og annars staðar en einhverjir virðast eiga það til að missa sig.

Fékk hristingsborða þar sem mér var á íslensku tilkynnt um vinning o.þ.h. þegar ég var að fésbókast áðan. (Þar var sagt að ég væri gestur númer 16.319.604.708 - hef nefnilega grun um að sama númerið sé á öllum slíkum borðum - léleg forritun.) Þetta er alls ekki í fyrsta sinn sem ég fæ svona borða upp á tölvuskjáinn hjá mér en í þetta sinn ákvað ég að taka þolinmæðisprófið á þennan ófögnuð. Jú, viti menn eftir svolítinn tíma hætti hann að hristast en fór samt ekki neitt.

Skoðaði þennan borða betur og sá að þar var talað um frítt bingó (hvað sem það nú er) Svo mig grunar að þetta standi í sambandi við Nígeríubréfin um alla bingóvinningana.

Er svonalagað ekki harðbannað?

Athugasemdir

[Jóhannes Laxdal Baldvinsson, 4.10.2010 kl. 08:37]

Milljón tonna mistök þá
minniháttar sýnast
margfalt meir' var tekið frá
merkt og látið týnast

það var glæpurinn

[Sæmundur Bjarnason, 4.10.2010 kl. 09:05]

Já en Jóhannes minn, útrásarvíkingarnir eru svo margir og ekki búið að ná nema Geira greyinu svo það er auðveldara að einbeita sér að LÍÚ eða einhverju svoleiðis. Svo má líka snúa sér að þeim sem gera skilti eins og hér er fyrir ofan.

[Jóhannes Laxdal Baldvinsson, 4.10.2010 kl. 11:28]

þeim mun meiri ástæða til að pönkast á þeim

Bjarni Ármanns betur stæður
bankann rændi innan frá
Steinunn ein sem öllu ræður
aðeins Jóni pönkast á

[Sæmundur Bjarnason, 4.10.2010 kl. 12:02]

Lemja Bjarna Laxdal fór
af lífs og sálar kröftum.
En hann er sterkur, hann er stór
og studdur mörgum röftum.

[Kristinn Pétursson, 4.10.2010 kl. 18:20]

Kristján frá Djúpalæk orti: (þegar síldin hvarf - vegna sjávarkulda á "hafísárum")

• Bann við síldveiði í sjó
• var samþykkt í dag,
• uppí rányrkjuráðuneyti.
• Og síldin samþykkti þetta samkomulag
• fyrir sitt leyti.

PS: Hafrannsóknarstofnun "tapaði" nákvæmlega 1.596 þúsund tonnum úr "bókhaldinu" á árunum 1984-2005 (21 ár).

Þetta var nú allur "árangurinn" - meðaltalstjón var 76 þúsund tonn á ári (týndur þorskur).

Mér reiknast til - (skv. gögnum Hafró) að það hafi týnst meira en tvær og hálf milljón tonna af þorski - sem bannað var  að veiða "til að byggja upp stofninn"

Þetta virðist mesta heimska  og stærsti skandall Íslandssögunnar - og er þá ýmsu til jafnað.

[Sæmundur Bjarnason, 4.10.2010 kl. 20:15]

Takk Kristinn. Gat ekki stillt mig um að vísa í athugasemd þína í næsta bloggi mínu.

[Jóhannes Laxdal Baldvinsson, 5.10.2010 kl. 00:49]

Þorskurinn færði sig líka af hefðbundinni veiðislóð á hafísárunum fyrir Vestjörðum á árunum 1974-1977  Þessi breyting var notuð til að koma á fiskveiðistjórnun. En staðreyndin var að togaraskipstjórar sem voru óhræddir að prófa ný veiðisvæði og höfðu útbúnað til að veiða á dypra vatni en áður, þeir fiskuðu ekkert minna á þessum meintu aflaleysis árum. Og þetta er skýringin á hversu Vestfirðingar voru andvaralausir gangvart varanleika kvótakerfisins. þeir trúðu því að skerðingin væri bara tímabundin en áttuðu sig ekki á hinni pólitísku fléttu sem lá að baki. Þess vegna misstu þeir frá sér veiðiheimildirnar og misstu að lokum frá sér togarana líka eins og Gugguna sem ég var á í 14 ár. Þetta var allt ein sorgarsaga