1123 - Stjórnlagaþing

Bankahrunið, Icesave, glæpamenn á biskupsstóli, pínulítil morð og þessháttar eru auðvitað smámál í samanburði við væntanlegt stjórnlagaþing. Ef vel tekst til verður þarna gerður rammi um Íslenskt þjóðlíf næstu áratugina eða lengur. 

Hugsanlega skiptir ekki máli þó þingið sé aðeins ráðgefandi. Ótrúlegt er að stjórnvöld vogi sér að ganga gegn samþykktum þess ef þær eru nægilega samhljóða. Það er reyndar aðalgallinn við væntanlegt stjórnlagaþing. Hættan á að allt fari í tóma vitleysu vegna rifrildis. Stjórnmálaflokkarnir munu örugglega vilja ráða yfir þátttakendum þarna og hugsanlega er erfitt að koma með öllu í veg fyrir það.

Leyfilegt er samt að vona að þingið verði samstillt og árangursríkt. Mikið er búið að vinna að stjórnarskrármálum undanfarna áratugi og vel er líklegt að nota megi margt af því.

Eflaust eru hugmyndir manna um samstillt og árangursríkt stjórnlagaþing mjög mismunandi, en ef mönnum tekst að láta flokkapólitíkina víkja og sinn betri mann taka völdin er slíkt ekki útilokað.

Vel getur verið að hugsanleg aðild að ESB setji mark sitt á stjórnlagaþingið. Andstæðingar aðildar gætu reynt að koma inn ákvæðum sem gerðu slíkt erfitt eða ómögulegt. Þörfin á að koma með tillögur sem flestallir geta sætt sig við gæti þó komið í veg fyrir það.

Athugasemdir

[Dingli, 29.8.2010 kl. 00:59]

Sæll Sæmundur.

Því miður er ótti þinn um að fyrir hugað stjórnlagaþing leysist upp í karp og deilur vegna ESB sennilegur. Ákvæði stjórnaskrár um ævarandi yfirráð Íslenskrar þjóðar á landi, landhelgi og auðlindum, gæti útilokað aðild að ESB. Því gætu deilur um orðalag slíks ákvæðis gert þingið nánast óstarfhæft.

[Sæmundur Bjarnason, 29.8.2010 kl. 09:39]

Já, þetta snýst allt um orðalag og áherslur, Dingli. En ef vilji er til að ná samkomulagi er nægilega sterkur næst samkomulag. Spilling á Íslandi mun minnka. Hrunið sér fyrir því. Augu margra hafa opnast.

[Kristinn Pétursson, 29.8.2010 kl. 16:36]

Efst á blaði er að virða mikilvæg atriði stjórnarskrár - eins og t.d. fjármálaákvæði. Það hefur ekki verið gert - og þess vegna þynnist gjaldmiðillinn út.

Ef engin breyting verður á hugarfari um virðingu fyrir ákvæðum´stjórnarskrár eins og fjármálaákvæðum (40. og 41.gr.) - þá ´varla til mikils að breyta stjórnarskránni.

Skýrari verkaskipting löggjafar og framkvæmdavalds er hins varar afar brýn og til þess þarf ekki beina stjórnarskrárbreytingu - en síðar myndi þess þurfa - að þessu leyti.

Nú er þetta bara orðin einhver klisja "halda stjórnlagaþing"... til hvers að breyta stjórnarskránni - en engin breyting verður á hugarfari um stjórnmálalegt siðferði.

Lagfæringa á stjórnmálalegu siðferði - er eitthvað sem við ættum að byrja á að ræða ítarlega - og hvers vegna við virðum ekki fjármálaákvæði stjórnarskrár - þrátt fyrir bankahrun - er umgengni framkvæmdavaldsins  vara verri en nokkru sinni - hvað varðar þessi umræddu fjarmálaákvæði stjórnarskrár - um það eru til fullt af nýjum dæmum - eins og t.d. að snara 200 milljörðum í nýja Landsbankann - með skriflega álitsger falda í skúffu - um að gengisbundin lán í ísl. krónum væru ólögleg...

Svona framferði  - heimtar eiginlega nýja Rannsóknarnefnd Alþingis - og það strax í fyrramálið. Hvernig gat það gerst - ofan í allt - að mokað var 200 milljörðum í "nýjan landsbanka" með kvótaskuldurnar´og þessi  ólöglegu gengislán í "rússneskri rúllettu" innandyra???

Maður er eiginlega gjörsamlega orðlaus - og svo á bara að tala um að "endurskoða stjórnarskrána".... og láta eins og allt sé í  þessu fína lagi...

[Sæmundur Bjarnason, 29.8.2010 kl. 20:05]

Takk Kristinn.
Ég held að hugarfarsbreytingin hafi að verulegu leyti þegar átt sér stað og stjórnmálamönnum verði spillingin ekki eins auðveld í framtíðinni og hún hefur verið hingað til. Siðvæðingin er semsagt að eiga sér stað. Sammála þér um það að stjórnarskrárþing er engin töfralausn en gæti verið ágætis byrjun. Ekki er þörf á að endurskrifa stjórnarskrána frá grunni en ýmsa kafla hennar (t.d. allt sem snertir stjórnskipun) þarf að endurskoða og virða þarf hana betur.