1121 - Hrun, trú og ESB

Það er tvímælalaust rétt að um þessar mundir eru þeir fleiri sem eru andvígir aðild að Evrópusambandinu en hinir. Ég get samt ekki séð neina ástæðu til að hætta við umsóknina. Sumir flokkar eru þó búnir að mála sig að því leyti út í horn að það er ekki ólíkleg niðurstaða ef núverandi ríkisstjórn hrökklast frá völdum. Ef við förum í gegnum þetta ferli sem nú er hafið erum við tvímælalaust betur í stakk búin til að taka ákvörðum um aðild. 

Mér finnst þjóðrembu- og stórríkisrökin bíta best hjá andstæðingum aðildar um þessar mundir. Þau geta þó orðið bitlausari með tímanum og einkum ef aðildarviðræðurnar ganga eðlilega fyrir sig.

Bankahrunið olli talsverðri vinstri sveiflu í stjórnmálum hérlendis. Sú sveifla virðist nú vera að koma fram í vaxandi andstöðu við þjóðkirkjuna. Á sama hátt og stjórnmálaumræðan er að yfirtaka hrunið er líklegt að hún verði þjóðkirkjunni fjötur um fót. Um þetta má auðvitað endalaust fjölyrða og verður líklega gert.

Heyrði ávæning af útvarpsviðtali við einhvern um Orkuveituna um daginn. Líklega var það við Alfreð Þorsteinsson. Hann líkti Reykjavíkurborg við fíkniefnasjúkling og að fixið hans hefði löngum verið að sækja peninga til Orkuveitunnar. Nefnd var talan 70 milljarðar. Ekki veit ég hvernig hún var fengin en þó hún sé há er hún ekki nema hluti af því sem veitan er sögð skulda núorðið. Sýnir reyndar líka, ef rétt er, að verðlagning afurðanna frá Orkuveitunni hefur ekki verið í samræmi við tilkostnað.

Ekki fylgist ég nú vel með þó ég þykist vera áhugamaður um blogg. Moggabloggsguðirnir virðast hafa lokað bloggi Lofts Altice Þorsteinssonar án þess að ég tæki eftir því. Aðrir tala um þetta eins og alkunna staðreynd en hún hefur farið algjörlega framhjá mér. Er ekki vanur að lesa bloggið hans og er eiginlega nákvæmlega sama þó því hafi verið lokað. Oft var hann giska orðljótur og eiginlega furða að því skuli ekki hafa verið lokað fyrr. Veit ekki hvað það var sem bloggguðunum ofbauð núna en krassandi hlýtur það að hafa verið.

Líklega fjölgar þeim um þessar mundir sem búast við að ríkisstjórnin hrökklist frá. Það er samt ekki líklegt. Vinstri grænir munu halda áfram að styðja hana þó ekki væri nema valdanna vegna. Ögmundur og Liljurnar láta illa en munu samt styðja stjórnina ef á reynir.

Athugasemdir

[Axel Þór Kolbeinsson, 27.8.2010 kl. 09:57]

Það eina sem gæti sprengt stjórnina er ef þingsályktunartilagan um að draga ESB-umsóknina til baka væri samþykkt, en þá myndum við fá skrýtið stjórnarmynstur eða minnihlutastjórn fram yfir stjórnlagaþing.

Annars er síðasta Eurobarometer könnunin athygliverð.  http://ec.europa.eu/public_opinion/archives/eb/eb73/eb73_en.htm

[Sæmundur Bjarnason, 27.8.2010 kl. 11:31]

Þakka þér fyrir Eurobarometer-tengilinn. Skoða þetta betur seinna.
Held að ESB-aðild verði mál málanna á næstunni. Geri ekki ráð fyrir að þingsályktunin um að draga umsóknina til baka verði samþykkt. Stjórnlagaþing, þjóðaratkvæðagreiðslur o.fl. mun tengjast þessum málum. Icesave er hætt að duga sem rifrildisefni.

[Ben.Ax. (Benedikt Jóhannes Axelsson), 27.8.2010 kl. 12:29]

Sæll. Getur verið að fólk, sem segist vera á móti ESB-aðild, sé einfaldlega á móti því að eyða fjármunum í það að kanna hvað í henni felst og atkvæðagreiðsluna í kjölfarið sem andstæðingar aðildar segja að ekkert mark verði tekið á? 

[Sæmundur Bjarnason, 27.8.2010 kl. 13:55]

Bindandi eða ráðgefandi þjóðaratkvæðagreiðsla er vandamál. Líka ef fáir taka mark á henni. Svo held ég samt að ekki verði. Ríkisstjórnin sótti um aðild með samþykki Alþingis. Að draga umsóknina til baka núna er í besta falli hjákátlegt.

[Ben.Ax. (Benedikt Jóhannes Axelsson), 27.8.2010 kl. 14:12]

,,Tillaga ríkisstjórnarinnar um að senda umsókn til Evrópusambandsins um aðildarviðræður var samþykkt með 33 atkvæðum, 27 voru á móti en þrír greiddu ekki atkvæði.''

Er samkvæmt þessu nokkuð búið að sækja um aðild? Er ekki verið að kanna málin?

[Sæmundur Bjarnason, 27.8.2010 kl. 14:25]

"Umsókn um aðildarviðræður", segir þú. Í mínum huga er umsókn bara umsókn. Ríkisstjórnin mun ekki dirfast annað en halda þjóðaratkvæðagreiðslu um málið og fara eftir henni. Annars er "Ólafi sjálfum" að mæta.

[Ben.Ax. (Benedikt Jóhannes Axelsson), 27.8.2010 kl. 14:55]

Sammála.