1001 - Þúsund og ein nótt

Dundaði mér einu sinni við að setja arabisku sögurnar sem bera þetta nafn á vef Netútgáfunnar. Lauk samt aldrei við það.

Stefán Benediktsson er athyglisverður og mjög góður bloggari þó hann sé sannfærður Samfylkingarmaður. Um daginn birti hann setningu á bloggi sínu sem ég man enn: „Vondir þegnar hafa alltaf ýtt okkur í átt til betra mannlífs."

Þetta má meðal annars heimfæra á útrásarvíkingana. Það má mikið vera ef lífið hér á Íslandi verður ekki betra þegar við erum búin að jafna okkur á hruninu. Gott ef eldgosin verða okkur ekki til blessunar líka á endanum.

Leó sem kallaði sig Ljón Norðursins var einu sinni með prjónastofu í Gamla Barnaskólanum í Hveragerði. Dóttir hans hét (og heitir eflaust enn) Katla eins og eldfjallið. Leó sá var eftirminnilegur.

Rödduð ell eða órödduð er eitt af því sem útlendingar skilja illa í íslensku en getur oft verið skemmtilegt að velta fyrir sér. Man samt aldrei hvort er hvort. Ella mella kúadella, sögðum við oft áðurfyrr án þess að meina nokkuð sérstakt með því. Eina vísu kann ég sem leikur sér vel með ellin. Hún er svona:

Skólapiltar fara á fjöll
og faðma heimasætur.
Ungar stúlkur elska böll,
einkanlega um nætur.

Veit ekki hvenær ég hætti að blogga. Örugglega þegar ég er dauður. Kannski fyrr. Aðrar tegundir af tölvusamskiptum eiga ekki nærri eins vel við mig og blessað bloggið. Er nýbúinn að prófa að skrá mig á fésbókina en hef enn ekki náð tökum á því formi. Bloggið er betra. Þar getur maður látið móðann mása án þess að vera truflaður.

Finnst einhvernvegin að fésbókin sé til þess að setja þangað samstundis það sem manni dettur í hug. Hægt er að vanda bloggskrif svolítið. Samt er margt mjög athyglisvert á fésbókinni. Til dæmis er víða svo mikið af myndum þar að spurningin er frekar að „nenna" en að „hafa áhuga á."

Göngustígareynsla mín í Kópavogi segir mér að áhugaverðara sé að ferðast þar til fóts en til bíls.


« Síðasta færsla | Næsta færsla »

Athugasemdir

1 Smámynd: Hrannar Baldursson

Facebook öðlast líf þegar þú uppgötvar hvernig þú getur tengst gömlum vinum. Þú verður hins vegar að leita þeirra með leitarvél Facebook. Ég hef fundið fjölmarga gamla vini og kunningja þar inni, og held þannig samskiptum, þó yfirborðskennd séu, við vini sem eru í mikilli fjarlægð, bæði út frá tíma og rúmi.

Facebook er þannig allt öðruvísi samskiptavefur en bloggið.

Hrannar Baldursson, 25.4.2010 kl. 08:25

2 Smámynd: Jóhannes Laxdal Baldvinsson

Tvíræðni og orðaleikir er list sem lifir bara í bókum núorðið. Við þurfum að halda þjóðlegum fróðleik og alþýðumenningu meir að unga fólkinu.

Jóhannes Laxdal Baldvinsson, 25.4.2010 kl. 14:37

3 Smámynd: Sæmundur Bjarnason

En Hrannar hvað ef maður vill ekkert finna gamla vini? Segi bara svona og meina ekkert með því. Er facebook þá alveg gagnslaus? Mér finnst menn nota hana bara eins og þeim sýnist. Hentar mér kannski ekki eins vel og sumum öðrum. Ég er svo tregur til að hætta að blogga.

Jóhannes, "til fóts" eins og er síðast í færslunni hjá mér er nú eiginlega dönskusletta. Skilst samt alveg held ég. "Auðlærð er ill danska."

Sæmundur Bjarnason, 25.4.2010 kl. 16:32

4 Smámynd: Jóhannes Laxdal Baldvinsson

hehe, já þetta var voða kauðalegt hjá þér. bæði; til fóts og til bíls....
akandi , gangandi, hjólandi er miklu betra. Ég hjóla mikið um þessa göngustíga. mest hér í Reykjavík en hef samt farið nokkrar ferðir um Kópavoginn

Jóhannes Laxdal Baldvinsson, 25.4.2010 kl. 18:11

5 identicon

"Stefán Benediktsson er athyglisverður og mjög góður bloggari þó hann sé sannfærður Samfylkingarmaður" - skrifar þú. Stefán er mjög góður bloggari og ég held einhvernveginn að það sé síst að há honum að vera Samfylkingarmaður?

Ellismellur 25.4.2010 kl. 20:51

6 Smámynd: Sæmundur Bjarnason

Uss, ekki hafa hátt um þetta Ellismellur. Er sjálfur Samfylkingarmaður en reyni að leyna því með svona orðalagi.

Sæmundur Bjarnason, 26.4.2010 kl. 13:36

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Innskráning

Ath. Vinsamlegast kveikið á Javascript til að hefja innskráningu.

Hafðu samband