980 - I am just trying to save the planet

Horfði á heimildarmyndina um Bobby Fischer í sjónvarpinu. Fannst hún á margan hátt góð. Eftirminnilegast þótti mér þar sem hann var í heimspekilegu rifrildi við Kára Stefánsson og sagði þá meðal annars þá setningu sem er fyrirsögn þessa pistils. 

Eins og Fischer birtist okkur í þessari heimildarmynd var hann einþykkur og undarlegur en samt ákafur andstæðingur Bandaríkjastjórnar og Gyðinga yfirleitt og vildi greinilega líta á sig sem hinn mesta mannvin. Jafnfram var hann mikill „besservisser" og viðurkenndi það jafnvel sjálfur. Þrjóskur mjög og sérvitur.

Ég hef lengi verið aðdáandi Fischers og hefur alla tíð fundist það lítilmannlegt að ráðast að honum persónulega fyrir skoðanir hans einar. Á margan hátt hefur verið komið illa fram við hann og hann hefur einnig komið illa fram við aðra. Einkum marga þeirra sem af einlægni hafa viljað hjálpa honum.

Það sem gerðist þegar Fischer var gerður að íslenskum ríkisborgara var ekki ómerkur kafli í Íslandssögunni og alls ekki að ófyrirsynju að heimildarmynd skuli gerð um það. Ég er bærilega sáttur við allt sem þar kom fram. Hlutur Garðars Sverrissonar er samt líklega gerður verri en efni standa til.

Margt var undarlegt við útför Fischers og í fréttum hér á landi var nýlega sagt frá því að svo kunni að fara að lík hans verði grafið upp til að ganga úr skugga um faðerni stúlkubarns frá Filippseyjum. Þetta er alls ekki ný frétt. Það eina nýja sem ég sá í henni var að þar var því haldið fram að búið væri að setja dagsetningu á það hvenær gert er ráð fyrir að héraðsdómari úrskurði um þetta mál. (16. apríl n.k.)

Fischer heldur áfram að vera umdeildur eftir dauða sinn. Það er engin furða. Maðurinn var ekki eins og fólk er flest. Dauða hans bar að á óvæntan og einkennilegan hátt. Er samt alls ekki að gefa í skyn að eitthvað óheiðarlegt hafi þar átt sér stað. Fréttin um lát hans fór samstundis eins og eldur í sinu um skákheiminn þó hún hafi ekki komist í fjölmiðla fyrr en degi síðar.

Athugasemdir

[Jóhannes Laxdal Baldvinsson, 4.4.2010 kl. 01:12]

Mér fannst þessi mynd með eindæmum illa klippt. Þótt á endanum kæmi allt hið helsta fram, þá þurfti maður að hafa vitað um helstu atriði í lífshlaupi meistarans til þess að hafa gaman af þessari mynd. Hún varpaði ekki nýju ljósi á neitt fyrir mér, allt hafði þetta komið fram í blöðum hérlendis nema kannski þegar Guðmundur G þórarinsson var að reyna að troða sér sem númer 1, eins og hann tók til orða í Japan.  Eins verður það talin fjöður í hatt Bónusfjölskyldunnar að hafa lánað einkaþotuna til að sækja ferðalangana til Japans. Rifrildið um arfinn er bara punkturinn yfir róstusamt líf og í hans anda, ef hann er þá dáinn?  Í myndinni kom fram leynd ósk hjá honum til að láta sig hverfa og slíta öll samskipti við fjölskyldu og "vini". Gerði hann það kannski bókstaflega?

[Ólafur Sveinsson 4.4.2010 kl. 01:43]

Mér fannst þessi mynd með eindæmum illa klippt.

[Jóhannes Laxdal Baldvinsson, 4.4.2010 kl. 01:56]

af því Fischer var svo ósexy þá læt ég þetta flakka

Ásdís Rán er aldrei down
og órana hún kann að erta
Bráðna myndi Gordon Brown
ef hann fengi bara að snerta...

[Jóhannes Laxdal Baldvinsson, 4.4.2010 kl. 01:59]

leiðréttir höfuðstafir.

Ásdís Rán er aldrei down
órana hún kann að erta
Mundi bráðna Gordon Brown
ef bara fengi hann að snerta...

[Kama Sutra, 4.4.2010 kl. 02:42]

Ég er sammála Ólínu Þorvarðardóttur - ég er ekki miklu nær um manninn Bobby Fischer eftir að hafa séð þessa mynd.

Myndin fókuseraði aðallega á "vinina" í kringum hann og þörf þeirra til að koma sér í sviðsljósið - í gegnum hann.   Bobby Fischer var sjálfur mest í bakgrunninum.

[Sæmundur Bjarnason, 4.4.2010 kl. 07:17]

Líklega hefur þessi heimildarmynd verið vitlaust hugsuð frá upphafi. Það er rétt hjá ykkur að fyrir þá sem hafa ekki þekkt þeim mun betur til ævi Bobby Fischers hefur þessi mynd frætt fólk lítið. Hún fjallaði að mörgu leyti betur um Sæmund Pálsson og ævi hans, en átti að ég held einkum að fjalla um hve erfiðlega gekk að fá Fischer lausan úr fangelsi í Japan og koma honum hingað til lands. Sem partur af ævi hans held ég að sá kafli sé ekki sérlega merkilegur. Fyrir þá Íslendinga sem þekktu vel til hans skipti hann kannski máli.

Jóhannes, held að Baugur hafi ekki flutt hann alla leið frá Japan. Hann hafi komið til Kaupmannahafnar með áætlunarvél, en verið fluttur frá Svíþjóð til Íslands með flugvél frá Baugi.

[Hrannar Baldursson, 4.4.2010 kl. 08:48]

Það væri gaman að sjá þessa mynd. Er hægt að nálgast hana á netinu?

Það er Hollywood kvikmynd í framleiðslu um ævi Fischer, með hinum afar góða Tobey Macguire í hlutverki meistarans. Myndin mun heita Pawn Sacrifice eða Peðsfórn og á að koma í bíó árið 2013. Handritið er ennþá í vinnslu en Macguire búinn að skrifa undir samning, þannig að þetta er í gangi.

[Þorsteinn Briem, 4.4.2010 kl. 09:09]

Sæmar tveir í fyrsta flokk,
falla hér og einnig rokk,
hjá þeim aldrei hálf neitt kák,
og helvíti báðir góðir í skák.

Gleðilega páska!

[Þorsteinn Briem, 4.4.2010 kl. 09:31]

"Vinur minn, Bobby Fischer. Heimildamynd um síðustu ár skákmeistarans Bobby Fischer og vináttu þeirra Sæmundar Pálssonar, Sæma rokk."

[Sæmundur Bjarnason, 4.4.2010 kl. 09:58]

Alveg rétt hjá Steina. Svona var kynningin á myndinni. Þeir sem vænta þess að fá í þessari heimildarmynd skýringu á því hvers vegna Bobby Fischer var eins og hann var fá lítið fyrir sinn snúð.

Held að ekki sé hægt að sjá myndina á Netinu eins og er, en það kemur sjálfsagt að því. Það sem þarna var á ensku var textað, minnir mig, en ekki það sem var á íslensku. Þessu þarf að breyta ef selja á myndina til útlanda. Öðru vísi kemst hún varla á Netið.

Bíð eins og Hrannar eftir mynd um Fischer. Myndin "Searching for Bobby Fischer", var alls ekki um hann. Nafninu breytt í "Innocent moves" eftir að hann kvartaði.

[Anna Sigríður Guðmundsdóttir, 4.4.2010 kl. 16:00]

Ég skildi hvorki meira né minna en áður, eftir að horfa á þessa mynd? Ég hef oft furðað mig á þessari Íslands-fíkn hans? En nú situr hann líklega þarna á eihverju skýjinu, horfir niður á okkur og brosir að hugrenningum okkar, eða hvað?

Maður þarf líklega ekki peninga í eilífðar-heimum? Enginn veit!

Gleðilega upprisuhátið öll M.b.kv. Anna

[Jóhannes Laxdal Baldvinsson, 4.4.2010 kl. 17:20]

Hrannar, myndin verður  Endursýnd: 11. apríl 2010 kl. 13.50 á RUV