878 - Bloggið bætir, hressir og kætir

Í vaxandi mæli hef ég á tilfinningunni að ég sé að blogga fyrir þá sem ég veit af ýmsum ástæðum að lesa skrif mín reglulega. Í gegnum samskipti mín í kjötheimum veit ég um suma. Aðrir kommenta öðru hvoru og svo framvegis. Flestir hafa einhver áhrif á hvernig ég skrifa. Líka þeir sem aldrei heyrist frá en þeir hljóta að vera þónokkrir. 

Áhrif þeirra sem kommenta eru stundum augljós. Til dæmis hefur Steini Briem afar góð áhrif á hagyrðingstaugina í mér. Oft má sjá áhrif kommentanna bæði í bloggum og svörum við athugasemdum og þau samskipti eru næstum alltaf á léttu nótunum. Að minnsta kosti svara ég kommentum oftast með því sem mér dettur fyrst í hug. Stundum er það svolítið út úr kú eða jafnvel asnalegt en við því er ekkert að gera.

Freistandi er að halda að því fleiri sem lesendurnir eru samkvæmt Moggabloggsteljaranum því betri séu skrifin. Svo er þó ekki. Það eru fyrirsagnirnar, efnið sem um er fjallað og fyrstu línurnar sem skipta mestu máli. Oft heldur maður að tiltekin skrif veki mikil viðbrögð í teljaramálum en hefur svo eftir allt saman alrangt fyrir sér. Ekki er með neinu móti hægt að sjá þau fyrir.

Ef ég blogga ekki finnst mér eins og ég sé að bregðast mínum föstu lesendum. Kannski eru þeir samt bara fegnir og þessvegna er ég að hugsa um að hætta núna.

Athugasemdir

[Ólafur Sveinsson 28.11.2009 kl. 00:21]

Þú bloggar að allaveganna í mínum takti. Takk.

[Sigurður Þór Guðjónsson, 28.11.2009 kl. 00:31]

Ómissandi fyrir svefninn að lesa miðnæturþanka Sæma.

[Skorrdal 28.11.2009 kl. 02:37]

Þú ert ómissandi á bloggrúntinum, Sæmi minn. Ég myndi amk. sakna þín mikið.

[Jóhannes Laxdal Baldvinsson, 28.11.2009 kl. 06:02]

Hér áður fyrr notuðum við símann til að hlera um sveitungana, núna er það bloggið :)

[Þorsteinn Briem, 28.11.2009 kl. 11:52]

Bloggið þitt og bloggið mitt,
bloggin Sæma og Steina,
lítið mitt en þrútið þitt,
þú veist hvað ég meina.

[Sæmundur Bjarnason, 28.11.2009 kl. 13:23]

Horfið næstum bloggið Briem.
Bókstafirnir fúna.
Sorfið hefur runurím.
Rósu stælir núna.

[Finnur Bárðarson, 28.11.2009 kl. 17:36]

Sæmundar bloggið hefur öðast verðugan sess. Gerist ekki betra.

[Anna Sigríður Guðmundsdóttir, 28.11.2009 kl. 21:53]

Sæmundur, ef þú ætlar raunverulega að hætta að blogga vil ég þakka þér fyrir það sem ég hef lesið og lært af þér. Þú hefur mjög víða réttláta sýn á mörgu.

Skil hvað þú ert að tala um þegar þér finnst eins og þú sérst að svíkja ef þú svarar ekki eða rökræðir á blogginu. Ég blogga til að koma sjónarmiðum mínum á framfæri en hef svo ekki nógu marga klukkutíma í sólarhringnum til að rökræða athugasemdirnar. Mér finst ekki gott að sinna þessu ekki eins vel og ég vildi helst en tel að betra sé að henda af og til inn skoðunum þegar tími gefst og koma umræðu í gang.

Ég hvet þig til að halda áfram því þú ert að kenna okkur öllum eitthvað gott og gagnlegt. Oftast held ég að kommenta-skortur sé vegna tíma-skorts. Ég mun sakna þín á blogginu ef þú hættir. Við erum öll jafn mikilvæg, hver á sinn hátt meða sína lífsreynslu-skoðanir.

Hættu að hugsa um að hætta að blogga og haltu endilega áfram því þú hefur mikið að gefa okkur öllum . Með kærri kveðju Anna.

[Sæmundur Bjarnason, 29.11.2009 kl. 01:57]

Takk öll.
Anna Sigríður. Ég held að þetta sé óverðskuldað. Ég hugsa að ég hætti aldrei alveg að blogga. Það er of gaman til þess. Reyni að hafa einstök blogg ekki alltof löng. Tekst stundum.

[Anna Sigríður Guðmundsdóttir, 6.12.2009 kl. 00:31]

Þetta er ekki óverðskuldað Sæmi. Þín blogg verða adrei of löng vegna þinnar visku og kennslu, en veit að ég á það til að þvæla hlutina of mikið. Ég er að læra á blogginu og líkar það vel. Þökk sé þér og svo mörgum öðrum fyrir svo margt sem ég hef fengið að lesa á blogginu. Við þurfum fleiri svona menn eins og þig á bloggið.