755- Bloggið bæði hressir og kætir

Ég blogga yfirleitt á hverjum degi. Ekki stendur á því. Þetta hef ég vanið mig á og er minn stíll. Yfirleitt blogga ég ekkert um sjálfan mig enda frá litlu að segja. Ýmislegt slæðist þó með svona í forbifarten og ég veit ekki betur en sumt af mínum ættingjum og venslafólki neyðist til að lesa þetta blogg. Bagalegt getur verið og kjánalegt að vita ekki mest beisik þings um sína nánustu ættingja. Bjarni þurrkaði allt út af sínu Moggabloggi um daginn. Áslaug bloggar að minnsta kosti öðru hvoru á 123.is/asben og ég hérna. Og svo stendur fésbókin auðvitað fyrir sínu, en þangað vil ég helst ekki fara.

Ég legg svolítinn metnað í að skrifa um allt mögulegt. Þeir sem leggja það í vana sinn að lesa bloggið mitt vita aldrei á hverju þeir eiga von. Stundum eru það minningar eða hugleiðingar um málefni dagsins. Stundum eitthvað allt annað. Satt að segja er ég orðinn pínulítið leiður á bankahruns-skrifunum. Þetta eru óttalegir heimsendaspádómar. Því ekki að gleðjast yfir því að vera til? Er til meiri hamingja? Ekki dygði að vera grátandi bæði í svefni og vöku ef maður ætlaði að taka alla heimsins óhamingju inn á sig. Gott ef kæruleysið er ekki bara betra. Því segi ég: Etið, drekkið og verið kát. Kannski verður enginn morgundagur.

Misheyrnir og mismæli geta verið skemmtileg. Um daginn heyrði ég farið með kvæði eða þulu í útvarpinu. Mér heyrðist endilega vera sagt: „Hundurinn ber mig hálfa leið í heimana nýja." Samt hlýtur það að vera vitleysa. Svo sagði Tryggvi Þór Herbertsson í þingræðu um daginn: „Þarna er greinilega verið að kasta augunum í rykið á fólki." Þá hló þingheimur en eftirmál urðu engin enda sárasaklaust að mismæla sig á þennan hátt. Höskuldur Þórhallsson sagði líka eftirminnilega í þingræðu að nauðsynlegt væri að taka einhver mál almennilegum vettlingatökum. Svona eru bara beinar útsendingar.

Og nokkrar myndir:

IMG 3671Frá Grænavatni.

IMG 3682Úr fjörunni við Herdísarvík.

IMG 3700Hvað er þetta eiginlega?

IMG 3704Tóft með Herdísarvík í baksýn.


« Síðasta færsla | Næsta færsla »

Athugasemdir

1 Smámynd: Eygló

Ótrúlegt hvað ryðguð olíutunna getur verið listræn, ef hún er á réttum stað.

Svar við spurningunni við eina myndina:  Sjórekinn jólasveinn!

Eygló, 27.7.2009 kl. 00:40

2 Smámynd: Kama Sutra

"Etið, drekkið og verið kát. Kannski verður enginn morgundagur."

Tek undir þetta.  Gæti verið okkar síðasti sjens að fylla vömbina núna.  Þjóðin á líklega eftir að fá sig fullsadda af hungri (!) eftir að við byrjum að greiða af IceSlave dæminu.

Kama Sutra, 27.7.2009 kl. 01:22

3 identicon

Aldeilis tímabær hugleiðing. Erum við almenningur ekki komin með upp í kok af stjórnmálaumræðunni. g það bætir í sukksafnið á hverjum einasta degi!

Og ekkert af því er á valdi okkar,sem minnir mig á þann tíma sem ég hef eytt í að fjargviðrast í málum sem ég get ekki breytt.

Myndin frá Herdísarvík minnir mig á Hlín sem annaðist Einar Ben síðustu árin. Gaman væri ef einhver þar til bær skrifaði sögu hennar sem er örygglea merkileg.

Hallgerður Pétursdóttir 27.7.2009 kl. 08:55

4 Smámynd: Sæmundur Bjarnason

Takk öll.

Glingló: Kannski var þetta sjórekinn jólasveinn. Ég komst aldrei svo langt að ég gæti athugað það.

Kama Sutra: Munur að verða saddur af hungri. Ekki öllum gefið.

Það er víða getið um Hlín í bókum en kannski hefur hennar saga aldrei verið skrifuð sem vert væri.

Sæmundur Bjarnason, 27.7.2009 kl. 10:14

5 Smámynd: Hildur Helga Sigurðardóttir

Viðbót við annars ágæta tilgátu Glinglóar um sjórekinn jólasvein:

Tel að þetta sé ísbjörninn,(eða ullarlagðurinn), sem strandaglóparnir í fyrstu þáttaröð "LOST" fundu í frumskóginum í fyrsta þætti. (Það var þá sem ég hætti að horfa). Nema ef vera skyldi gamla gæruúlpan á Hveravöllum, sem menn töldu vera þriðja björninn hér í fyrrasumar.

Hildur Helga Sigurðardóttir, 27.7.2009 kl. 23:05

6 Smámynd: Sæmundur Bjarnason

Þetta með hvítu flygsuna verður sífellt dularfyllra. Ætli ég verði ekki bara að skreppa aftur til Herdísarvíkur að athuga þetta. Þegar ég hugsa mig vandlega um þá hugsa ég að þetta hafi verið full-lítið til að vera ísbjörn. Að minnsta kosti fullorðinn ísbjörn. Veit ekki með jólasvein. Þeir eru sumir litlir.

Sæmundur Bjarnason, 28.7.2009 kl. 00:37

7 Smámynd: Hildur Helga Sigurðardóttir

Litlir jólasveinar geta nú fokið á haf út við minnstu hviðu. Sama máli gegnir um bómullarlagða í frumskógum, að ekki sé talað um gæruúlpur á hálendi Íslands.

Þú átt mikil ransóknarferðalög fyrir höndum Sæmundur.

Hildur Helga Sigurðardóttir, 28.7.2009 kl. 01:37

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Innskráning

Ath. Vinsamlegast kveikið á Javascript til að hefja innskráningu.

Hafðu samband