719 - Á hverfanda hveli

Okkur bloggurum hættir til að sýna málum sem tengjast bankahruninu fullmikla léttúð. Dæmið um manninn á Álftanesinu sýnir að þetta er dauðans alvara. Íslenskt þjóðfélag er breytt eftir bankahrunið. Bankar njóta ekki trausts. Stjórnvöld njóta ekki trausts. Stjórnmálaflokkar njóta ekki trausts. Fjölmiðlar njóta ekki trausts. Í stuttu máli sagt þá er traust orðið að sjaldgæfum munaðarvarningi hér á landi. 

Sjálfur fjármálaráðherrann og formaður Vinstri grænna nýtur ekki einu sinni trausts meðal sinna eigin þingmanna. En því miður, alþingismenn njóta ekki trausts frekar en aðrir. Þegar fólk treystir ekki lengur sínum nágrönnum og sinni fjölskyldu þá er stutt í byltinguna. Og hún étur börnin sín. Þeir sem ofaná fljóta eru einkum þeir sem afskiptalausastir eru.

Ég er hræddur um að ástandið hér á landi eigi eftir að versna enn áður en það fer að batna. Dómharka og ábyrgðarleysi vex, stjórnmálastarfsemi er í lamasessi, Lög og regla eru á undanhaldi og margt á fallanda fæti. Grunnstoðir samfélagsins halda þó enn.

Látum ekki etja okkur út í algjört stjórnleysi.

Var að enda við að lesa grein Guðbjörns Guðbjörnssonar sem hann birtir á bloggi sínu í dag (17. Júní) og kallar: Er þjóðin samdauna spillingu, valdhroka, óbilgirni, valdníðslu, siðleysi, kúgun , klíkuveldi og ættdrægni? Þetta er góð grein. Verulega góð og ég hvet alla til að lesa hana.

Athugasemdir

[Eygló, 18.6.2009 kl. 00:21]

Það tóku krumlur um hjartað í mér þegar ég sá fréttina um niðurrif hússins.  Samt leið mér þannig að hugur minn og samúð var öll hjá manninum. Ég hef ekki hugmynd um forsögu þessa máls en auðvitað flökrar að manni að hún hafi verið þung og sársaukafull.

[Sigurður Þór Guðjónsson, 18.6.2009 kl. 19:37]

Mest kvíði ég því ef maðurinn verður dæmdur. Það væri ranglæti svo hrikalegt að bylting væri betri.  

[Sigurður Þór Guðjónsson, 18.6.2009 kl. 19:38]

Já, og í þeirri byltingu ætti að afhöfða sem flesta!

[Sæmundur Bjarnason, 18.6.2009 kl. 22:21]

Sigurður, þarna finnst mér þú nú vera ansi mikið á mörkunum. Moggaguðirnir gætu lagt þetta út á versta veg.

[Sigurður Þór Guðjónsson, 18.6.2009 kl. 22:32]

Moggaguðirnir eru tvímælalaust meðal þeirra sem fyrst ætti að afhöfða.

[Sæmundur Bjarnason, 18.6.2009 kl. 23:33]

Moggabloggsguðirnir ætlaði ég að segja. Skiptir kannski ekki miklu máli. Ekki ætla ég að fara að munnhöggvast við þig, Siggi. Kannski best að fara bara í felur.

[Eygló, 18.6.2009 kl. 23:53]

Ég samþykkti að þessi maður sæti inni um tíma........ EF jafnframt auðrónarnir færu bak við lás og slá!!!!!

[Malína 19.6.2009 kl. 21:01]

Það er uppi á mönnum typpið hérna!