713 - "Valtýr á grænni treyju"

Það var Jón Björnsson sem skrifaði skáldsöguna „Valtýr á grænni treyju". Hún var um sakamál eitt fornt sem ég man fremur óljóst eftir. Jón skrifaði líka sögu um dráp Jóns Gerrekssonar ef ég man rétt. Hafði einu sinni heilmikinn áhuga á því máli enda merkilegt mjög. Man eftir Jóni sem bókaverði í Þingholtsstrætinu en það er önnur saga. 

Nú er það annar Valtýr sem tengist öðru sakamáli sem allt snýst um. Valtýr Sigurðsson nefnist hann og er ríkissaksóknari. Vill ekki hætta sem slíkur og segist alls ekkert tengjast þessu sakamáli. Ragna dómsmála segist ekki geta rekið hann þó hún fegin vildi. Við aðrar aðstæður væri það hið besta mál. Hugsum okkur bara ef ráðherrarnir færu að reka hvern annan. Jafnvel þó við völd væri ríkisstjórn sem þolir flest gæti það endað með ósköpum.

Ég hef trú á því að Valtýr hætti því Eva vill losna við hann hvað sem það kostar. Eva Joly fer bráðum að ráða öllu hér á landi (eða ekki) og segir ríkisstjórninni hiklaust fyrir verkum. Sennilega er það ágætt því hún sér sjaldan skóginn fyrir trjánum. (ríkisstjórnin altsvo)

Eva segir að mikilvægast sé að góma bastarðana. Sumir segja að mikilvægast sé að samþykkja (eða fella) Icesave-samninginn. Einhverjir segja að það séu hagsmunir heimilanna. Hverju á maður að trúa? Ekki er stjórnlagaþing á þessum lista eða skattahækkanir. Mér finnst mikilvægt að blogga smá á hverjum degi. Varla öðrum.

Hreppsnefndarmaðurinn Jón notaði orðið nefnilega óhóflega mikið. Nefndin ákvað að lagfæra vegarspotta einn sem hafði áður verið þannig eftir því sem Jón sagði að menn:

Nefnilega í náttmyrkri
nefnilega mættu.
Nefnilega nokkurri
nefnilega hættu.

Athugasemdir

[Malína 12.6.2009 kl. 09:33]

Ég segi það satt, ég myndi anda mun léttar ef Eva Joly yrði hæstráðandi á Klakanum þau ár sem við eigum eftir að sitja hérna í brunarústunum því hún er hafin yfir íslenska vina- og frændsemisspillingarsamfélagið hérna.  Því miður verður það víst ekki hægt.  Í rauninni treysti ég engum Íslendingi til að rannsaka orsakir hrunsins og möguleg lagabrot.

Við verðum að fá hingað fleiri erlenda sérfræðinga í þetta verk.

[Sæmundur Bjarnason, 12.6.2009 kl. 13:12]

Malína malar
mikið og flott.
Hérna æ hjalar
og hefur það gott.

Nei, ég segi bara svona. - Get ekkert sagt af viti.

[Ben.Ax. (Benedikt Jóhannes Axelsson), 12.6.2009 kl. 17:03]

Steini kann ráð við öllu.

[Malína 12.6.2009 kl. 17:43]

Sæmundur, ég geri ráð fyrir að þetta sé frumsamið!  

[Sæmundur Bjarnason, 12.6.2009 kl. 20:04]

Já, auðvitað gerði ég þetta. Mér finnst fyrsta línan ágæt en hitt óttalegt hnoð. Geri líka ráð fyrir að þú heitir ekki Malína þó þú notir það nafn. Eiginlega má vera allskonar bull í vísum finnst mér og alltaf hægt að bera því við að eitthvað sé "rímsins vegna".

[Malína 12.6.2009 kl. 22:29]

Rætur Malínu:

http://www.sigurbjorns.blog.is/blog/sigurbjorns/entry/889609/#comments

[EE elle 15.6.2009 kl. 11:39]

Eva Joly ætti að stýra rannsóknunum.  Nóg er víst komið af ger-spillingu milli ættingja og vina og stolið af almenningi í öllum skúmaskotum.   En vildu yfirvöld alvöru rannsókn með einum heilum "sérstökum" saksóknara í fjársveltu embætti?  Og vanhæfum saksóknara í þokkabót?  Ekki trúverðugt, svo ekki sé fastar að orði kveðið.  Hvað þýðir annars "sérstakur" þarna?  Og hvað með öll löglegu og ríkisstuddu ehf´in sem fá endalaust og enn að ræna milljörðum af þjóðinni? 

[EE elle 15.6.2009 kl. 11:55]

Ég meinti vanhæfum rikissaksóknara þarna.

[Sæmundur Bjarnason, 15.6.2009 kl. 11:58]

Já, já EE elle mér finnst það líka. Þegar talað er um ger-spillingu þá dettur mér náttúrlega í hug ger því ég er svo skrítinn. Sérstakur saksóknari er bara sérstakur að einhverju leyti en undirmaður ríkissaksóknara samt.

[EE elle 15.6.2009 kl. 20:29]

Já, akkúrat, undirmaður ríkissaksóknara.  Ger, - ha, ha, ha.