671- Á fésbókina fer ég ei

Nei, ég held að ég fari ekkert á fésbókina. Mér líst ekki á þetta. Má varla vera að því að sinna mínum blogglestri og bloggskrifum, mínum tölvupósti, mínum bréfskákum á Netinu og öllu öðru í kjötheimum svo sem lestri, vinnu og svínaflensuvörnum þó ég fari nú ekki að bæta óþarfa eins og fésbókinni við. 

Fólk virðist festast yfir þessu eins og flugur á límpappír. Þetta er eflaust gaman en meðan maður veit sem minnst um þetta allt saman sparar maður gríðarlegan tíma sem annars væri tekinn frá öðru þarfara.

Ekki nær mér fésbók fín.
Finnst hún slæmur siður.
Alla þessa ógnar pín
ætti að leggja niður.

Gúgli segir að þann 12. maí 1996 hafi Björn sjálfur Bjarnason skrifað þennan texta á sinn einkavef:

Ég sé, að birst hefur á netinu frásögn eftir Sæmund nokkurn Bjarnason, sem hann kallar Ævintýrið um góða kaupmanninn, ef ég man rétt, og á víst að vera neyðarleg lýsing á því ferli, sem leiddi til þess, að menntamálaráðuneytið keypti þann hluta af Ísmennt, sem þjónar skólakerfinu.

Þarna er stórmennið sjálft að skrifa um mig. Ekki veit ég af hverju mér datt í hug að gúgla þessi ósköp. Ég man óljóst eftir þessu ævintýri en á það kannski hvergi skrifað. Líklega birti Bjössi í Snerpu þetta fyrir mig á sínum tíma.

Þegar þetta var hafði mér verið úthýst af Imbu og sárnað það eitthvað. Guðmundur meiraprófsbílstjóri (sem ég held endilega að sé sá sami Guðmundur Ólafsson og nú lætur gamminn geysa á Útvarpi sögu með Sigurði G. Tómassyni) atyrti mig líka fyrir að ráðast svona á öðlinginn Pétur Þorsteinsson á Kópaskeri. Guðmundur taldi mig hafa vegið að Pétri úr launsátri en sannleikurinn er sá að ég neitaði aldrei að hafa samið þessa sögu og birti hana undir fullu nafni.

Kannski er þetta partur af sögu Internetsins á Íslandi. BBS-in voru líka merkilegt fyrirbrigði þó fáir kannist við þau núna.

Athugasemdir

[Eygló, 1.5.2009 kl. 02:12]

Í öllum bænum láttu þér ekki einu sinni detta í huga að skrifa UM Fésbók, hvað þá skrifa Í hana.

Þú giskar rétt; þetta var gaman fyrst (meðan maður var að læra á þetta) Ég var ötult fés í mánuð; fór a.m.k. 1-2 á dag og fannst ég ofboðslega fyndin (var ein um það)  Núna kíki ég stöku sinnum, fylgist ekki með neinu eða neinum. Sé stöku sinnum eitthvað skemmtilegt/spennandi/fróðlegt og geri þá athugasemdir við það eða spyrst fyrir.

Það sem er virkilega skemmtilegt en gerist örsjaldan, er að fólk frá "fyrra lífi" finnur mann og á kemst dulítið samband.  Það sem var best var að fá að sjá myndir af smáfrænkum mínum, sem gerðu mig að langömmusystur, og ég hafði aldrei séð.

[Óskar Þorkelsson, 1.5.2009 kl. 08:52]

ég er á fésbók, og finnst það frekar ómerkilegur miðill.. hann er ágætur til að halda utan um vinahópinn því að allir eru á þessu :)

[Hildur Helga Sigurðardóttir, 1.5.2009 kl. 10:48]

Stend með þér Sæmundur; Vertu ekkert að fara á Snjáldurskinnuna. 

Var sett á hana að sjálfri mér forspurðri og finnst þetta óttalegur tímaþjófur þá sjaldan ég nenni að líta þar inn.

[Sæmundur Bjarnason, 1.5.2009 kl. 11:33]

Takk öll.
Ein ástæðan fyrir því að ég kynni mér sjaldan nýjungar eins og fésbókina er að ég er hræddur um að gera heimskulegar vitleysur, en ég á víst að vera svo mikill tölvunörnd að ég má helst ekki gera svoleiðis.

[Jón Óskarsson 1.5.2009 kl. 14:18]

 Snoppa er fín þýðing á Facebook

[Sigurður Þór Guðjónsson, 1.5.2009 kl. 15:15]

Fésbókin er skömminni skárri en bloggið. En hvort tveggja er af hinu illa.

[Hilmar Gunnlaugsson, 1.5.2009 kl. 15:22]

Facebook virkar spennandi en ég tel það nægja mér að sinna blogginu.

[Sigurður Þór Guðjónsson, 1.5.2009 kl. 16:18]

Á fésbók er meiri skemmtun. Það er ekki opið fyrir alla, aðeins vini viðkomandi. Þar af leiðir líka að þessi hryssingur sem er svo algengur í athugasemdum á blogginu og skætinur er þar miklu minni. Menn eru yfirleitt í góðum fíling.

[Ben.Ax. (Benedikt Jóhannes Axelsson), 1.5.2009 kl. 17:57]

Það sem mér finnst andlit hafa fram yfir blogg er að maður getur strokað allt út sem sagt er.

[Brjánn Guðjónsson, 1.5.2009 kl. 19:13]

á fésbókina farir'ðu ei
finnst mér afar miður.
að afloka sig inn'í skáp
er ekki góður siður.

[Sæmundur Bjarnason, 1.5.2009 kl. 21:28]

Takk, takk. Það sem ég hef einkum á móti fésbókinni er að hún virðist geta verið talsverður tímaþjófur ef maður gætir sín ekki. Skil líka alveg hvað Sigurður Þór á við þegar hann segir að fésbókin sé skárri en bloggið. Bloggið getur maður þó takmarkað líka, bæði skrif og lestur. Samskipti manna hafa breyst talsvert eftir að tölvunotkun jókst. Brjánn, það getur vel verið að ég fari einhvern tíma á fésbókina. Einu sinni ætlaði ég aldrei að blogga. Bara lesa svoleiðis nokkuð. Mér finnst fésbók ágætt nafn vegna líkingarinnar við enskuna.