3131 - Facebook og Ukraina

Auðvitað veit ég ekki, frekar en aðrir, hvað Pútín og þeir sem styðja hann sem ákafast, hugsa. En ég held að hann geri sér alveg grein fyrir því að hernaður hans í Ukrainu er ákaflega óvinsæll um heim allan. Rússland er annars flokks stórveldi sem nú er í fjörbrotunum. Það er einkum þessvegna sem Pútín og Rússland eru hættuleg. Þau stórveldi sem munu bítast af sem mestum krafti í því kalda stríði sem nú er að hefjast eru að sjálfsögðu Bandaríkin og Kína.

Kína stendur Bandaríkjunum að líkindum svolítið að baki hernaðarlega ennþá. En það mun ekki standa lengi. Kína mun líklega halda fremur með Rússum en Ukrainumönnum í yfirstandandi stríði og tengjast Rússum í vaxandi mæli viðskiptalega og ef ESB (sem á margan hátt er einnig annars flokks stórveldi) mun halla sér að USA, eins og flest bendir til, eru komin tvö super-stórveldi sem munu kljást á mörgum sviðum í því kalda stríði sem væntanlegt er.

Það eru þá helst Japan og Suður-Kórea, ásamt Taiwan og Austurlöndum nær, sem einkum má gera ráð fyrir að bitist verði um á síðari hluta þessarar aldar. Það er að segja ef mannkynið verður ekki búið að tortíma sjálfu sér í heildsölu áður.

Undanfarið hef ég gagnrýnt fésbókina mjög og farið að langmestu leyti í frí frá henni. Þetta hef ég gert þó ég geri mér fulla grein fyrir vinsældum hennar og að margir af notendum hennar geri sér alveg grein fyrir áróðri hennar og takmörkunum. Þó Moggabloggið og Morgunblaðið sé mjög langt frá því að vera gallalaust og að Páll Vilhjálmsson sé eins og hann er (ég fékk mjög margar heimsóknir þegar ég skrifaði um hann um daginn) dettur mér ekki í hug að gerast áskrifandi að blaðinu sjálfu. Læt mér mbl.is nægja, en viðurkenni samt með sjálfum mér að Morgunblaðið er langbesta fréttablaðið á landinu. Vísir og DV eru einfaldlega ekki marktæk og Fréttablaðið er ósköp takmarkað þrátt fyrir að það sé ókeypis.

Internetið í heild er svipuðu marki brennt og fésbókin. Það þarf stórlega að vara sig á því og unglingum getur það beinlínis verið hættulegt. Stríðið um sálir mannanna fer einkum fram á Netinu.

Ég nenni bókstaflega ekki að blogga daglega og er alveg sama (að mestu leyti) þó fáir lesi þetta blogg. Þó er það frekar lesið ef það er stutt.

Einhver mynd.

Athugasemdir

[Þorsteinn Briem, 13.3.2022 kl. 00:53]

Með innrásinni í Úkraínu er Rússland Pútíns einfaldlega búið að vera.

NATO- og Evrópusambandsríkin hafa verið miklu stærri markaður fyrir Rússa en Kína og sem markaður skipta NATO- og Evrópusambandsríkin miklu meira máli fyrir Kínverja en Rússland.

Og það á einnig við um okkur Mörlendinga, þar sem Vestur-Evrópa og Bandaríkin eru langstærstu markaðssvæði okkar í útflutningi á bæði vörum og þjónustu.

Í NATO- og Evrópusambandsríkjunum búa miklu fleiri en í Rússlandi og almenningur í Vestur-Evrópu og Bandaríkjunum hefur miklu meira fé á milli handanna en almenningur í Rússlandi.

Rússneska rúblan er ekki alþjóðlegur gjaldmiðill, eins og evran og Bandaríkjadalur, og Rússar verða að nota alþjóðlega gjaldmiðla til að geta keypt erlendar vörur, rétt eins og við Mörlendingar.

Mörlenska krónan og rússneska rúblan eru því jafn mikið rusl, enda hrundi gengi rússnesku rúblunnar með innrásinni í Úkraínu, rétt eins og gengi mörlensku krónunnar hrundi í Hruninu hér á Klakanum árið 2008.

Rússar flytja fyrst og fremst út olíu og gas en Evrópubúar munu draga verulega úr kaupum á gasi og olíu af Rússum og hætta þeim alveg eftir örfá ár en nota í staðinn eigin kjarnorku og vindorku.

Rússar gætu reyndar tekið upp vöruskipti við Kína, eins og Sovétríkin stunduðu, til að mynda með kaupum á sjávarafurðum héðan frá Íslandi í skiptum fyrir olíu og stál.

En Sovétríkin hrundu vegna óstjórnar og spillingar, og það mun Rússland Pútíns einnig gera.

[Hörður Þormar, 13.3.2022 kl. 13:23]

Nýlega horfði ég á þýskan umræðuþátt þar sem imprað var á því að landamæri Rússlands (Síberíu) og Kína væru alls ekki óumdeild, þar væri óuppgert deilumál frá 19.öld um landsvæði upp á meira en eina milljón ferkílómetra. Kínverjar fara sér í engu óðslega enda hverfur landið ekki burt. En geymt er ekki gleymt.

[Sæmundur Bjarnason, 13.3.2022 kl. 21:32]

Já, það er fróðlegt að velta fyrir sér hvernig heimurinn gæti orðið einhverntíma í framtíðinni. Enginn vafi er á að Rússar gætu beint viðskiptum sínum og samskiptum öllum meira til Asíu en Evrópu. Samt eru þeir Evrópuþjóð.

Kapítalisminn reyndist betur (a.m.k efnahagslega) en sá sósíalismi sem reynt var að reka í sovétinu í ein 70 ár. Hugsjónin er samt allsekki dauð.

Tilraunin sem verið er að gera í Kína er athyglisverð. Þar er ekkert lýðræði, en samt virðist almenningur sæmilega ánægður.