3054 - Trump að hverfa

Veit ekki af hverju það er sem ég blogga svona sjaldan núorðið. Einhver hlýtur ástæðan að vera. Ekki er það útaf kófinu. Ég þrífst beinlínis af því að þurfa ekki að eiga mikið saman við aðra að sælda. Löngu hættur öllu kossaflensi, handaböndum og þessháttar. Hef ekki einu sinni fengið kvef síðan Covid-19 skall á. Sú áskelling hefur á margan hátt orðið mér til mikillar blessunar. Auðvitað eiga sumir um sárt að binda vegna kófsins. Svo er mér sagt og allir fjölmiðlar eru uppfullir af þessu. Þegar fyrsta bylgjan skall á var maður jafnvel hálfhræddur við hurðarhúna og lyftuhnappa. En ekki lengur. Gott ef þetta eru ekki orðnir vinir mínir. Þegar ég fer út í mína morgungöngu snerti ég þá berhentur eins og ekkert sé. Annars ætlaði ég ekkert að blogga um þetta. Bara vera með í þessum leik, sem bloggið óneitanlega er. Sem betur fer er hann ekki erfiður.

Nú er kominn tími til að þykjast vera voða gáfaður. Þúsundáraríkið er ekkert nær núna en það var á dögum Hitlers. Kannski var/er Trump bara Hitler endurfæddur og gat/getur ekkert gert að því þó hann væri/sé svona. Já, ég held áfram að tala um Trump hvað sem herra Siglaugsson segir. Kannski hætti ég því samt einhverntíma.

Ég á eiginlega alveg eins von á því að McConnell verði settur af sem leiðtogi Repúblikana í öldungadeild bandaríkjaþings og einhver Trump-sauðurinn kosinn í staðinn. Áhrifa Trumps mun gæta eitthvað áfram. Ákærendur hans úr fulltrúadeildinni sögðu upphaflega að þeir þyrftu ekki að kalla til vitni núna því eitthundrað þeirra að minnsta kosti væru í salnum sem réttarhöldin fóru fram í.

Eina ástæðan fyrir þvi að ekki var staðið við að kalla til vitni í málinu gegn Trump var að tefja ekki um of fyrir Biden forseta með því og einnig var ekki við því að búast að öldungadeildarþingmenn breyttu atkvæði sínu við það. Með þvi að tefja málið nægilega mikið til að gera hann að fyrrverandi forseta var búið að gefa þeim repúblikönum sem það vildu afsökun til að hengja sig í formsatriði. Mjög fáir efuðust um sekt hans.

Einhverntíma ætla ég að skrifa langt blogg um öfga-hægrið og óða-vinstrið, en satt að segja leiðist mér pólitík og mér finnst alþingismenn svotil aldrei vera nægilega hreinskilnir. Sumir þeirra eru beinlínis óttalega vitlausir. En förum ekki nánar útí það.

Einhver mynd.

Athugasemdir

[Þorsteinn Briem, 23.2.2021 kl. 09:54]

Lúðinn Trump þar loksins hvarf,
lítill var sá missir,
en Palli elskar enn þann skarf,
og afturendann kyssir.

[Sæmundur Bjarnason, 23.2.2021 kl. 17:47]

Svona hverfur allur leir
sem miðlunum er háður.
Tromparinn ei tístir meir
á Twitter eins og áður.

[Sæmundur Bjarnason, 23.2.2021 kl. 17:49]

Heldur er nú stuðlasetningin í þessu frjálsleg.

[Hörður Þormar 23.2.2021 kl. 21:21]

Ég óska "Dónaldi frænda" Trump alls hins besta og vona að hann muni njóta elliáranna við að leika golf í sólinni á Flórída.                               Mary Trump & Frank Patterson interview, 1994           

[Sæmundur Bjarnason, 24.2.2021 kl. 16:56]

Takk, Hörður. Ég les frekar en hlusta. Það er sennilega mest ávani. Þessi linkur á Youtube viðtal er sjálfsagt ágætur og vel getur verið að ég hlusti á hann við tækifæri. Ég hef ekkert sérstakt við Trump að athuga nema forsetatíð hans. Finnst hann hafa verið gjörsamlega óhæfur sem forseti bandaríkjanna.