2914 - Eiríkur blindi

Ég hef alveg misst af einhverju persónuleikaprófi, sem Kári Stefánsson er sagður hafa dreift í nafni Íslenskrar Erfðagreiningar. Nú er ég orðinn svolítið forvitinn og langar að vita hvernig þetta próf hafi verið. Sennilega fer ég ekki nógu oft á fésbókarfjárann eða les hann ekki eða kynni mér hann nægilega vel. Að sumu leyti kann þetta að sjálfsögðu að vera kostur, en mér finnst það vera galli.

Það er ekki nóg með að mér finnist öll tónlist vera fyrst og fremst hávaði, heldur er ég ekki alveg sjúr á mismuninum á rödduðun hljóðum og órödduðum. Ekki þýðir að spyrja Gúgla að þessu því hann virðist ekki vita það. Eða a.m.k. á hann í einhverjum erfiðleikum með að segja frá því. Ástæðan fyrir því að ég er að velta þessu fyrir mér er eftirfarandi vísa:

Skólapiltar fara á fjöll
og faðma heimasætur.
Ungar stúlkur elska böll
einkanlega um nætur.

Það var Helgi Ágústsson sem lengi var hreppstjóri á Selfossi og forstöðumaður pantanadeildar Kaupfélags Árnesinga sem kenndi mér þessa vísu einu sinni í fyrndinni. Ég veit ekki hvort ellin í þessari vísu eiga að vera rödduð eða órödduð. Eflaust gæti Eiríkur Rögnvaldsson (bróðir hennar Nönnu – sem sumir kannast eflaust betur við) frætt mig um þetta. En ekki þýðir að fást um það. Varla les hann bloggið mitt og á þarafleiðandi erfitt með að svara þessu. Af einhverjum ástæðum man ég greinilega eftir því að Helgi kenndi mér þessa vísu og gætti þess vandlega að Guðrún sem vann í pantanadeildinni þá, yrði ekki vör við þetta. Skrifað hana fyrir mig á Framsóknargrænan miða sem ég hugsanlega á einhversstaðar í drasli hjá mér.

Einhver eftirminnilegast karakter æskuára minna í Hveragerði var Eiríkur blindi Bjarnason á Hótelinu. Einu sinni sá ég hann sparka óvart í stóran stein sem varð á vegi hans. Auðvitað leiddi Sigga hann þá eins og vanalega, en eftir þetta efaðist ég aldrei um blindu hans þó sumir hafi e.t.v. gert það því hann var ótrúlega góður að greina hljóð. Einu sinni reiddist hann mér alvarlega. Þá var ég útibússtjóri í Kaupfélaginu í verkfalli sem verslunarmenn fóru í, en þeir voru mjög óvanir því. Eirík vantaði sementspoka og fannst alveg sjálfsagt að hann fengi slíkt afgreitt þó verkfall væri. Ég þverneitaði aftur á móti að verða við slíkri beiðni.

Ævinlega er það svo að ég er í besta bloggstuðinu strax eftir að ég hef sett upp blogg. Þetta skrifað ég t.d. síðastliðinn þriðjudagsmorgunn skömmu eftir að ég hafði lokið við og sett upp á Moggabloggið eitt slíkt. Alveg er það merkilegt hvað allir (nema ég) eru sjálfmiðaðir í þessum bloggskrifum sínum. Kannski er það best.

Einhver mynd.

Athugasemdir

[Þorsteinn Siglaugsson, 18.2.2020 kl. 22:29]

Ekki veit ég hvað kæmi út úr persónuleika prófinu hjá þér. Kannski að þú sért leiðinlegur við blint fólk? 

Þá getur hann Kári selt Kínverjunum þær upplýsingar.

[Jóhannes Laxdal Baldvinsson, 18.2.2020 kl. 23:51]

Ég lét mig nú hafa það að leita uppi þetta próf á netinu og fann það á https://www.svipgerd.is/

Niðurstöður mínar voru í fullu samræmi við það sem ég vissi og aðrir hafa sakað mig um. úthverfa 2% og samvinnuþýði 7%. Ekki veit ég hvað Kári ætlar sér með að vita þetta en ég er bara stoltur af að vera loksins búinn að fá þessa opinberu greiningu   

[Halldór Egill Guðnason, 19.2.2020 kl. 00:35]

 Eins gott þú tókst ekki prófið Sæmundur!

 Það væri sennilega búið að handtaka þig fyrir húmör, hefðirðu tekið það.

 Góðar stundir, með kveðju að sunnan.

[Sæmundur Bjarnason, 19.2.2020 kl. 08:21]

Þorsteinn. Ég tek aldrei persónuleikapróf. Ef Kári getur selt Kínverjum upplýsinar um mig er hann óvenju snjall. 

[Sæmundur Bjarnason, 19.2.2020 kl. 08:24]

Jóhannes. prósentutölur heilla mig ekki. Sennilega er ég 90% innhverfur

[Sæmundur Bjarnason, 19.2.2020 kl. 08:26]

Halldór. Fjúkk. þar mjóaði munu.

Takk fyrir hrósið.

[Eiríkur Rögnvaldsson 19.2.2020 kl. 09:07]

Ég held að þessi vísa sé ekki ætluð til munnlegs flutnings. Tvíræðnin í henni kemur eingöngu fram á blaði.

[Sæmundur Bjarnason, 19.2.2020 kl. 09:39]

Úps! Ekki veit ég hvort þú ert sá prófessor emeritus sem mér varð á að tala, eða réttara sagt rita, óvirðulega um í þessu bloggi eða bara alnafni hans, en nafnið er fínt, hvort heldur sem er.

[Húsari. 19.2.2020 kl. 16:37]

Sæmundur.

Í nafninu Hallur er -l óraddað;
í gælunafninu Halli er -l raddað.

Af sjálfu leiðir að -l í fjöll er óraddað
og sama gildir um -l í rímorði=orð sem rímar á móti öðru orði.