2851 - MAX 8 og 9

Núorðið er það svo að þegar eitthvað gerist og fólk er viðstatt (annars gerist það kannski ekki.) þá eru teknar 260 myndir af því og einar 16 vídeómyndir. Ef hjóli er stolið eða ef kviknar í bíl eru auðvitað um margfalt fleiri myndir að ræða. Hvað skyldi verða um allar þessar myndir? Ekki öfunda ég sagnfræðinga framtíðarinnar af að þurfa að skoða þær allar . Þessvegna er það sem ég er farinn að taka sífellt færri og færri myndir og nýta þær betur. T.d. eru allar þær myndir sem ég birti með bloggunum mínum endurnýttar. Samt hef ég nú tekið þær allflestar. Annars er það að verða mest fyrirkvíðanlegt í sambandi við bloggið að sækja þær alltaf. Ekki hef ég komið mér upp góðu systemi til þess arna.

Eiginlega er ég í mestu vandræðum með hvað ég á að gera við þriðja orkupakkann. Sumir segja að ég verði að vera á móti honum en aðrir að ég eigi að vera meðmæltur honum. Mér er nær að halda að það skipti litlu máli hvorn kostinn ég vel. Blessuð ríkisstjórnin er áreiðanlega búin að ákveða fyrir löngu (fisk) hvort hagstæðara er að vera meðmæltur honum eða andvígur. Gulli er a.m.k. meðmæltur honum. Kannski er það bara vegna þess að Bjarni hefur sagt honum það og kannski ekki. Hver veit nema við getur bara róið í burtu þegar Tjallinn kemur og vill stinga í samband.

Já, vel á minnst. Ég get sem best fjölyrt fjandann ráðalausan um Brexit. Ég er nefnilega kominn á þá skoðun að Bretar fari aldrei úr ESB-buxunum sínum. Á hverju byggi ég það? Skysemi eingöngu. Nú þegar Sambandsherrarnir eru komnir uppá lag með að veita Bretum frest, þá má hiklaust búast við að þeir haldi því áfram. Alltaf fær Bretinn frest á öllu. Kannski þeir fresti því bara að hætta að vera heimsveldi. Þeir reyndu það. Einu sinni héldu þeir meira að segja að þeir gætu eitthvað í fótbolta, en Íslendingar komu þeim í skilning um annað.

Mér sýnist að allar líkur séu á að langur tími muni líða þangað til Boeing fyrirtækið getur aftur farið að selja Boeing 737 MAX 8 og 9. Kannski geta þeir það aldrei og kannski fer þetta fyrirtæki á hausinn eða skiptir um kennitölu. Veit ekki hvort er vinsælla í henni Ameríku. Að láta sér í léttu rúmi liggja þó mörg hundurð manns hafi drepist af þeirra völdum er ekki í boði nútildags.Einu sinni voru fleiri fyrirtæki í USA sem framleiddu flugvélar. Kannski einhver þeirra verði endurvakin.

Að undanförnu hef ég verið að lesa gömul blogg eftir sjálfan mig. Ekki þó eftir einhverju áður ákveðnu skipulagi, heldu svona á maa og faa, einsog danskurinn mundi segja. Mikið andskoti hef ég stundum verið velskrifandi. Eiginlega er furðulegt að lesendur mínir skuli ekki vera miklu fleiri en raun ber vitni. Eins og ég hef verið frumlegur oft og einatt. Annars er ég ekkert að gagnrýna þessa fáu lesendur sem ég þó hef. Ekki geta þeir gert að því þó þeir séu ekki fleiri.

IMG 6933Einhver mynd.


« Síðasta færsla | Næsta færsla »

Athugasemdir

1 Smámynd: Jóhannes Laxdal Baldvinsson

Nú ýfir gamla Icesave und
sem aldrei ég trúa þyrði.
Úr landi vill hún leggja hund
og leyfa höfn í Finnafirði

Um ríkisstjórnina og orkupakkann

Jóhannes Laxdal Baldvinsson, 23.4.2019 kl. 14:19

2 Smámynd: Sæmundur Bjarnason

Orkupakki engist smár
öllum leiður baggi.
Ef hann stoppar örfá ár
útúr heimi flaggi.

Fer burt eftir fáein ár
fjandans orkupakki.
Er víst orðinn gamalgrár
sá grútarsendill skakki.

Sæmundur Bjarnason, 23.4.2019 kl. 22:56

3 Smámynd: Þorsteinn Siglaugsson

Það sem skiptir langmestu máli í sambandi við þriðja orkupakkann Sæmundur, það er að maður trúi því að hann sé bara toppurinn á risastórum ísjaka sem er samsæri gyðinga, frímúrara, frjálshyggjumanna, kommónista, George Soros og marsbúa gegn góðu og grandvöru fólki (eins og Páli Vilhjálmssyni og honum Jónival), íslenskum landbúnaðarafurðum, kristindómnum, þjóðsöngnum, fullveldinu og góðum hægðum.

Hvort þessi upptalninga hjálpar þér að taka afstöðu veit ég ekkert um og er eiginlega alveg sama.

Góða nótt.

Þorsteinn Siglaugsson, 24.4.2019 kl. 00:05

4 Smámynd: Sæmundur Bjarnason

Orkupakki ekki stór
er að valda kvíða.
Gulli þórðar mikið mjór
marga þarf að svíða.

Sæmundur Bjarnason, 25.4.2019 kl. 10:53

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Innskráning

Ath. Vinsamlegast kveikið á Javascript til að hefja innskráningu.

Hafðu samband