2630 - Zú

Eitthvert dularfyllsta mál sem um þessar mundir veltist í dómskerfinu er mál Zúistanna. Ekki ætla ég mér þá dul að kveða neinskonar dóm yfir því félagi eða þeim sem lagt hafa því lið. Ekki er gott að segja hver afdrif málsins verða, en augljóst er að afskipti ríkisins af trúmálum eru að verulegu leyti komin undir því. Trúmál valda jafnan deilum, sem í sumum tilfellum geta orðið hatrammar mjög. Á heimasíðu Zúista á Íslandi er fátt um dagsetningar. Úr daglegri umræðu virðast þeir líka hafa fallið á fésbókinni. Dagblöðin (réttara sagt Fréttablaðið) eru samt að byrja að sinna þessu. Sennilega er það næsta stóra málið. Þeir sem deilum unna laðast mjög að málum sem þessu. Ég er ekki þannig og þagna því per samstundis.

Heimsmálin og Verslunmannahelgarmálin virðast á réttri leið. Rússar hafa að vísu verið að tala við bæði Írani og Tyrki um Sýrlandsmálin, en það mega þeir helst ekki nema með leyfi frá USA og helst vilja þeir auðvitað vera memm. Það er að segja Bandaríkjamenn. Ekki er heldur víst að nauðgunum fjölgi að neinu ráði í Vestmannaeyjum um þessa verslunarmannahelgi. Lögregluyfirvöld þar passa vel að tala ekki af sér. Annars eru þetta óttaleg smámál miðað við ýmislegt annað.

Mæðradagur og feðradagur eru hátíðlegir haldnir víða í Bandaríkjum Norður-Ameríku. Gott ef ekki á að reyna að troða þeim hátíðisdögum upp á okkur saklausa Íslendinga líka eins og ýmsu Costcolegu af öðru tagi. Þó eigum við bæði bóndadag og konudag, en þeir dagar eru dálítið gamaldags orðnir og þar að auki um hávetur. Kannski vita það fáir en hinn alþjóðlegi systradagur var í gær 6. ágúst. Frægasta systraparið um þessar mundir er auðvitað Pippa og Kate Middleton. Svo veit ég eiginlega ekki hve margar þær Kardashian-systur eru. Bræðradagur og systkinadagur veit ég ekki með vissu hvenær á að halda hátíðlega, en það hlýtur að vera einhverntíma.

Kannski ég fari bara á blogga á fésbókinni eins og sumir gera. Ef ég hefði verið spurður að því um það leyti sem minna íhaldssamir bloggarar en ég fluttu sig og sínar hugleiðingar frá Mogganum og eitthvert annað hefði ég sennilega sagt að Morgunblaðið mundi lifa lengur en fésbókarvitleysan. Nú er ég farinn að efast. Að vísu er fésbókin ekki í neinu sérstöku uppáhaldi hjá ungu kynslóðinni og auðvitað er Trump Twitteróður svo kannski lognast fésbókin útaf í fyllingu tímans. Eins og Tíminn.

Einhver mynd.

Athugasemdir

[Jósef Smári Ásmundsson, 7.8.2017 kl. 11:22]

Sráði mig í Zuism vegna loforða um endurgreiðslu sem ég reyndar ætlaði síðan að gefa til góðs málefnis. Ég hef ekki hugsað mér að endurskoða þessa skráningu þó það gæti farið að " glæpasamtök" komist yfir " sóknargjöldin". Mér finnst þetta mál vera alfarið á ábyrgð ríkisins og kominn tími til að það hætti að innheimta sóknargjöld fyrir trúarsöfnuði. Fyrir mína hönd gæti ég alveg hugsað mér það fyrirkomulag að í stað þessarar skattheimtu gæti ég sýnt framá samsvarandi greiðslu til þess málefnis sem ég hef hug á að styrkja. En á meðan er skömmin ríkisins og þjóðkirkjunnar.

[Sæmundur Bjarnason, 12.8.2017 kl. 09:50]

Takk Jósef. Ég tók bara ekki eftir þessu fyrr en rétt áðan. Hugsa að margir fleiri hafi skráð sig í Zú-flokkin á svipuðum forsendum.