2567 - Óánægður Sókrates

Hvort er betra að vera ánægt svín eða óánægður Sókrates?

Getur Guð skapað svo stóran stein að hann geti ekki lyft honum?

Vel má halda því fram að þessar spurningar séu heimspekilegs eðlis. Heimspekin kemur þó fyrst við sögu ef reynt er að svara þessum spurningum af einhverju viti. Ég treysti mér ekki til þess.

Montið í þessum rudda er næstum óþolandi. Já, ég á við Trump. Mér finnst hann bölvaður ruddi og óþolandi sjálfumglaður að auki. Þetta verða Bandaríkjamenn að sætta sig við. Eiginlega er ég ekkert hissa á því þó að sumum líki bara vel við hann. Við því er ekkert að segja. Vonandi þurfum við sem ekki erum Bandaríkjamenn ekki að verða fyrir neinum kárínum af hans hálfu. Þó má búast við að áhrif hans á þróun heimsmála verði einhver.

Flokkun sorps er engin nýlunda. Þetta hefur verið gert mjög víða áratugum saman. Þó eigum við Íslendingar í miklum vandræðum með þetta. Í Reykjavík láta menn eins og þetta sé merk nýjung eftir að hafa hvorki hreyft legg né lið í þessa átt mjög lengi. Svei mér ef Sjálfstæðismenn hefðu ekki verið búnir að gera eitthvað. Geirs Hallgrímssonar er t.d. minnst fyrir það að hafa staðið fyrir malbikun nær allra gatna í höfuðborginni. Sorpflokkun gerist ekki af sjálfu sér. Yfirvöld þurfa að skipta sér af þessu. Það er hægt að gera á margan hátt. Það þarf ekki einu sinni að kosta þau veruleg fjárútlát. Fólk fer eftir buddunni. Ef það er dýrara að vera sóði þá hætta flestir því. Það er sannarlega ömurlegt fyrir yfirvöld að þurfa að elta almenningsálitið í stað þess að reyna að hafa áhrif á það.

Lyftuskömmin hér á Hagaflöt virðist ekki vera fær um að hugsa jafnhægt og ég!! Þegar ég er t.d. staddur á fjórðu hæð á ég það stundum til að ýta á 4 því það kemur alveg fyrir að ég sé pínulítið ruglaður. Lyftan hættir þá snimmhendis við að loka sér, þó hún sé byrjuð á því, og opnar hurðina aftur upp á gátt. Þá ýti ég gjarnan á 1 eftir smávegis umhugsun og þá lokar hún sér og fer þangað.

Nú er ég að mestu búinn að hella úr skálum reiði minnar. Miðlar eins og Moggabloggið og Fésbókin eru stundum álitnir hafa breytt heiminum. Flestum finnst það hafa verið til hins verra. Ekki er ég þó sama sinnis. Mér finnst heimurinn sífellt vera að batna. Líkfundurinn í Selvoginum í dag dregur ekki úr því. Auðvitað finn ég til með foreldrum Birnu, en svo ég reyni að ljúka þessu á heimspekilegum nótum þá verð ég að segja það að við Íslendingar erum og höfum verið ákaflega lausir við alvarlega glæpi hingað til.

Einhver mynd.

Athugasemdir

[Anna Sigríður Guðmundsdóttir, 23.1.2017 kl. 01:38]

Sæmundur. Nú fundu björgunarsveitir Ísland líkið að manninum sem sagður var hafa farist í Ölfusá fyrir ári síðan? Eða hvað?

Gott að búið er að finna líkið af þeim manni sem engum fjölmiðli á Íslandi fannst skipta máli hvort væri að finna lífs eða liðinn?

Engar sannanir eru fyrir hvers er líkið sem fannst við Strandakirkunnar fjörusteina.

M.b.kv.

[Jóhannes 23.1.2017 kl. 07:44]

Svo furðulegt sem það er þá fá sum fyrirtæki greitt fyrir pappírinn sem þau henda í þar til gerðan pappírsgám (ætlaður fyrir bylgjupappa) en heimilin þurfa að borga fyrir sinn pappírsúrgang.  Svo selur endurvinnslufyrirtækið hér á landi, þetta með hagnaði til útlanda.

Hvernig væri að allir fengu greitt fyrir sinn pappírsúrgang, jafnvel þótt lítið væri, a.m.k. fengju bévítans pappírsruslatunnuna fría en þyrftu ekki að greiða fyrir hana.

[Sæmundur Bjarnason, 23.1.2017 kl. 17:48]

Anna Sgríður. Þekki ekki þetta mál sem þú ert að tala um. Vil ekki hætta mér útí umræður um fjölmiðla, andlát og björgunarsveitir.

[Sæmundur Bjarnason, 23.1.2017 kl. 17:50]

Jóhannes, mér finnst fyrst og fremst að Íslendingar hafi verið óhæfilega seinir varðandi þetta mál. Alltaf má deila um peninga.