2124 - En ég á engan kjallara

Öll þessi umræða um „Skagfirska efnahagssvæðið“ er svolítið fyndin, og grínið flest um Gunnar Braga Sveinsson, ef maður hefur smekk fyrir pólitískum áróðri. Annað er þetta auðvitað ekki. Framsóknarflokkurinn gerir að vísu tómar vitleysur og utanríkisráðherrann ekki síst. Það hafa samt fyrr verið misheppnaðir ráðherrar en í núverandi ríkisstjórn. Ætla samt ekki að vekja meiri athygli á því hvað ég er misheppnaður bloggari og hætti því per samstundis. Allir bloggarar sem ekki eru kærðir, eða a.m.k. reynt að stinga upp í, eru stórlega misheppnaðir.

Marínó G. Njálsson bloggar um vísitölur http://marinogn.blog.is/blog/marinogn/ Því sem hann segir er ég að mestu sammála. Á vissan hátt kemur það umræðunni um verðtrygginguna heilmikið við. Með því að fimbulfamba um vexti, verðbætur, og allskyns vísitölur er hægðarleikur að rugla fólk í ríminu. Marínó lætur þó ekki blekkjast og hann er einmitt áberandi skýr í því sem hann skrifar. Ég ráðlegg semsagt öllum að lesa þessa grein.

Auðvitað á maður ekki að vera að gera grín að barnabörnunum sínum. Internetið gleymir aldrei neinu og þetta getur sem hægast komið í andlitið á þeim þegar verst gegnir eftir svo og svo langan tíma. Get samt ekki stillt mig um að segja smásögu af Tinnu: Hún kom hingað í heimsókn um daginn. Foreldrar hennar skildu hana eftir og fóru eitthvað annað. Tinna greyið (4 ára) var grútsyfjuð og vildi bara fara að sofa. Það vildum við afi hennar og amma helst ekki svo ég fór með hana í skoðunarferð niður í geymslu í kjallaranum. Þar fann hún tvo gamla badmintonspaða. Ég sagði henni að hún mætti eiga þá. Svar hennar var alveg gullvægt: „En ég á engan kjallara.“

Setti vísukorn eftir sjálfan mig á Boðnarmjöð og vegginn minn á fésbók í dag og það var svona:

Sátu tveir að tafli þar
titrandi af bræði.
Simmi karlinn sáttur var
ef svarað gat í næði.

Fyrsta ljóðlínan er eiginlega hálfstolin (alþekkt klámvísa sem byrjar: Sátu tvö að tafli þar.) Og sumir segja að sv sé gnýstuðull.

Ég er alveg sammála Hallgrími Helgasyni um að hagstæðast sé að róa sig útaf þessu ESB-máli. Við endum þar hvort sem okkur líkar betur eða verr. Evrópa er skárri kostur en Kína eða Bandaríkin. Okkur liggur svosem ekkert á. Best að bíða bara ef það er hægt. Kannski verður sífellt flóknara að lifa með þennan EES-samning yfir hausamótunum, en hann nægir okkur alveg í bili.

Auk þess legg ég til að Ásgautsstaðamálið verði tekið á dagskrá á næsta bæjarstjórnarfundi (eða er það kannski borgarstjórnarfundur?) í Árborg. Eyþór Arnalds er að hætta, en hann vildi einmitt koma þessu máli á hreint.

Brú yfir Kringlumýrarbraut.

Athugasemdir

[Ásthildur Cesil Þórðardóttir, 20.2.2014 kl. 12:22]

Takk fyrir þennan góða pistil Sæmundur, gaman að sögunni um litlu telpuna þína.

[Sæmundur Bjarnason, 20.2.2014 kl. 17:24]

Takk, Ásthildur. Mér finnst líka sagan af Tinnu vera besti kafli þessa bloggpistils. Hún er einbirni og kannski endurspeglast það í þessu svari hennar. Hún þarf þó ekki endilega að vera að meina að hana langi frekar í kjallarann. Ég skildi hana ekki þannig. Fannst hún frekar eiga við að hún hefði ekki ráð á neinum kjallara til að geyma badmitonspaðana í. Við vitum ekki með neinni vissu hvað hún meinti.

[Ásthildur Cesil Þórðardóttir, 20.2.2014 kl. 18:50]

Jú rökhugsun barnsins var einfaldlega að badmintonspaðar geymast í kjallaranum. Börn eru svo fallega innrætt og saklaus og draga sínar eigin ályktanir, við mættum oft taka þau okkur til fyrirmyndar. Það kæmi okkur oftar betur en ekki Sæmundur minn.

[Eysteinn Gunnarsson 20.2.2014 kl. 20:30]

Sæll Frændi

Mér hefur alltaf fundist dálítið undarlegt varðandi umræðuna um aðild okkar að ESB hvort við eigum að spyrja: Villtu ganga í ESB eða ekki, eða. Villtu að við klárum viðræður við ESB og tökum síðan ákvöðrun um hvort við göngum inn eða ekki. Síðari spurningin gagast mér betur, þar sem þá veit ég um hvað málið snýst.

Nú var verið að birta skoðunarkönnun um hvort menn vildu ganga í ESB eða ekki og er niðurstaðan auðvitað neikvæð fyrir ESB sinna.Sem er eðlilegt. Ef ég myndi spyrja verkalýðin: villtu samþykkja samninginn sem gerður verður í vor.. hver haldi þið að svörin yrðu?

Að mín mati er ljóst, að ef gerður verður samningur við ESB og hann er ekki hagstæður Íslensku þjóðinni, væri ég fyrsti maður til að hafna þeim samningi.

[Sæmundur Bjarnason, 20.2.2014 kl. 21:08]

Já,Ásthildur ég held að hausinn á okkur sé oft fullur af allskyns ranghugmyndum sem trufla okkur án þess að við vitum það eða skynjum.

[Sæmundur Bjarnason, 20.2.2014 kl. 21:10]

Eysteinn, ég held að núverandi ríkisstjórn (eins og þær fyrri flestar) vilji umfram allt komast hjá þjóðaratkvæðagreiðslu, þó annað sé látið í veðri vaka.

[Eyjólfur 26.2.2014 kl. 16:01]

Mér sýnist hið skagfirska koma hreint prýðilega út: http://i.imgur.com/RLFlaEm.jpg

[Eyjólfur 26.2.2014 kl. 16:05]

Mér sýnist hið skagfirska koma prýðilega út: http://i.imgur.com/RLFlaEm.jpg :)