2097 - Eru píratar nokkuð til í alvöru?

Ásgautsstaðir, Ásgautsstaðir, Ásgautsstaðir. Mér finnst ég þurfa að minna á að enn er verið að nýta þessa jörð í óleyfi. Árborg gerir það. Auðvitað er ekki við því að búast að Selfyssingar séu tilbúnir til að borga hærra útsvar bara til þess að bæjarstjórnin geti gerst heiðarleg og samið um greiðslur fyrir þessi ólöglegu not, sem staðið hafa í marga áratugi. Samt gæti það á endanum verið betra fyrir þá. Ef ég á að halda áfram að skrifa um þetta mál í hverju einasta bloggi, (sem ég tel ekkert eftir mér) þá er eins gott að hafa það ekki mjög langt í hvert sinn.

Annars eru fleiri en ég sem hafa áhuga á þessu Ásgautsstaðamáli. Í æviminningum Bjögvins Guðmundssonar, eðalkrata, sem út kom nýlega og heitir „Efst á baugi“ eftir vinsælum útvarpsþætti sem hann (Björgvin) stjórnaði ásamt öðrum, er kafli um mál þetta á bls. 145. Kannski birti ég þennan kafla einhverntíma seinna, ef ég má, en hvet auðvitað alla sem áhuga hafa á þessu og nálgast geta bókina til að lesa með athygli það sem hann hefur að segja um Ásgautsstaðamálið. Bréfið frá sýslumanni sem hann talar um hef ég undir höndum, eða ljósrit af því.

Flestir sem bréf skrifa ætlast til að þeim sé svarað. Íslendingar er mér þó sagt að séu manna latastir við að svara bréfum og reyna allskyns undanbrögð til að komast hjá því. Oftast er það áreiðanlega vegna gleymsku og athugunarleysis, sem það er ekki gert. Sjálfur hef ég áreiðanlega einhverntíma komið mér hjá því að svara bréfi. Kannski með heldur þunnildislegri afsökun.

Allt það besta í lífinu er ókeypis. Ekki borga ég neitt fyrir að nota Google. Sama er að segja um Moggabloggið og fésbókina. Er frá einhverju fleiru að segja. Ég held ekki. Þetta er eins og með vatnið og loftið. Mundum við borga fyrir það séstaklega ef einhver ætlaði að rukka okkur um það. Ég held varla. Samt er það álitin mikil speki þegar einhver segir að hádegisverðurinn sé aldrei ókeypis. Þó er auðvitað sannleikskorn í því. Auglýsingar eru lúmskar. Að sjálfsögðu er ekkert ókeypis, ekki einu sinni Wikipedia eða rigningin ef útí það er farið. Allt fer þetta eftir því við hvað er miðað eða hver hugsunin er.

Uppi á hól
stend ég og kanna.

Æ, ég nenni ekki að halda áfram. Allir hljóta að kannast við þetta. Í gamla daga var sagt: „Uppi á stól stendur mín kanna.“  Svo var það víst ekki nógu gott. Mér finnst samt enn vanta skýringu á því hvað þessi bölvuð kanna er að gera hjá þeim sem stendur uppi á hólnum og af hverju hún er þarna.

„Simmi, eru Píratar nokkuð til í alvöru?“ Þessi setning úr áramótaskaupinu er mér minnisstæðust á nýjársdagsmorgni. Ber á sinn hátt vott um afneitun þá sem á sér stað hjá yfirstétt landsins og skilningsleysi hennar á þörfum þjóðarinnar. Simmi virðist telja að því meiri þjóðremba sem borin er á borð því meiri líkur séu til að hann tryggi sér þau atkvæði sem þarf. Vonandi er það vitleysa. Ég hallast æ meira að þeirri kenningu að ef skipta þarf þjóðinni í tvo flokka þá skiptist Íslendingar fyrst og fremst í opgáttarmenn og einangrunarsinna.

Fór áðan út í Nauthólsvík. Þar var mikið um að vera. Sjósund stundað af krafti og líka heiti potturinn. Kvikmyndatökumaður kom þar að og skipaði öllum útí aftur og þeir hlýddu. Mér fannst samt kalt.

Stuðningsmenn núverandi ríkisstjórnar vilja umfram allt að gjaldeyrishöftin haldi sér, krónan, eins löskuð og hún er, verði áfram mynt okkar Íslendinga og tengslin við Rússland og Kína efld en önnur veikt. Ekkert af þessu hugnast mér.

Samsýning félags frístundamálara.

Athugasemdir

[Óskar Helgi Helgason 1.1.2014 kl. 16:49]

Heill og sæll Sæmundur æfinlega - og þakka þér fyrir samskiptin á liðnum árum hér á vef !

Hvet þig eindregið - til þess að birta gögn Björgvins og raunar mjög brýnt að fletta ofan af sóðaskap forráðamanna Stokkseyrar og Selfoss sem og Sýslumanna þeirra í Árnessýslu sem eindregna meðábyrgðina bera í Ásgautsstaða málinu á liðnum árum - sem og áratugum.

Með Nýárskveðjum - af Suðurlandi /

[Sæmundur Bjarnason, 1.1.2014 kl. 21:42]

Það er ekki ég einn sem ákveð neitt í þessu máli. Mundi samt ekki hika við að bjóða þeim byrginn.

Þakka þér fyrir áhugann og að láta mig vita af honum.

[Ellismellur 2.1.2014 kl. 09:45]

Gleðilegt nýtt ár, skólabróðir, og megi nýja árið vera þér og þínum farsælt.

Ég verð að viðurkenna, að ég er svo treggáfaður að ég er ekki enn farinn að skilja um hvað þetta Ásgautsstaðamál snýst.  Helst finnst mér að sveitarfélagið Árborg og forverar þess hafi nytjað umrædda jörð, skipulagt notkun hennar o.s.frv. án þess að hafa skeytt um eignarhald á henni? Ef svo er, þá hlýtur þetta að vera óhjákvæmilega dómsmál, en ég geri mér grein fyrir að slíkt kostar morð fjár fyrir fólk, sem ekki hefur því meira af aurum. Reyndar er það ekki einsdæmi, að valdsmenn og auðmenn komist upp með valdníðslu og yfirgang í skjóli þess að lögfræðingar eru svo déskoti dýrir. Skv. upplýsingum frá "infamous" alþingismanni og lögmanni er lágmarkstaxti þessarar stéttar ISK 35.000  á hvern tíma. Ja, hérna. 

kv. 

[Sæmundur Bjarnason, 2.1.2014 kl. 12:18]

Það getur vel verið að ég hafi ekki tilgreint nógu oft um hvað þetta Ásgautsstaðmál snýst. Auðvelt ætti að vera að gera bragarbót á því, vegna þess að ég hugsa að ég haldi áfram lengi enn að minnast á þetta mál. Finnst samt of einhæft að skrifa ekki um annað.