1974 - Brandley Manning

Ekki linka ég nærri alltaf í einhverjar mbl.is fréttir enda eru þær að mínu áliti oft óspennandi mjög. Skárri samt en flestra annarra vefmiðla. Ekki vil ég heldur að fréttin sem ég e.t.v. linka í (aðallega til að fá fleiri lesendur) sé alveg ósamrýmanleg öllu því sem ég skrifa í það blogg (enda er það víst bannað) Mér er líka nokk sama hvort margir eða fáir lesa þessi skrif mín, en einhverjir verða þó alltaf til þess (samkvæmt mbl.is teljaranum), svo þessvegna held ég áfram. Um daginn þegar ég minntist á Vigdísi Hauksdóttur urðu heimsóknirnar mjög margar, eða yfir eitt þúsund. Þetta hefur ruglað alla súluritagerð en það gerir mér ekki mikið til. Ég lít þó þangað a.m.k. daglega. Suma daga, þegar ég skrifa lítið eða ekkert eru heimsóknirnar bara svona 30 – 40 eða jafnvel færri. Algengt er samt að heimsókafjöldinn sé hundrað og fimmtíu til tvö hundruð á dag. Linkun eða linkun ekki skiptir samt miklu máli.

Annars er mesta vileysa að týna sér svona í tölum, línuritum og súluritum því þar er venjulega logið mest. Einkum þó ef tölurnar skipta milljörðum. Aumingja milljónin er alveg komin úr tísku. Man að við deildarstjórarnir báðum Skúla Ingvarsson gjaldkera hjá Kaupfélagi Borgfirðinga að gæta þess að launin okkar færi ekki yfir milljón á  mánuði og tók hann vel í það. Þarna var um gömlu krónuna að ræða og líklega hefur þetta verið um 1980. Sú nýja virðist vera komin í svipaða stöðu núna. Efast þó um að ég eigi eftir að lifa það að ellilaunin verði meira en milljón nýkrónur á mánuði. Steingrímur Hermannsson (eða var það Ólafur Jóhannesson – minnið er farið að bila – kannski byrjandi Alzheimer) minnir mig að hafi Eitt sinn talað um það að umsamin Dagsbrúarlaun gætu vel farið í 100 000 (gamlar krónur) á mánuði.

Nú er sumarið komið og þessi dagur á eflaust eftir að verða góður hvað sólskin og hita snertir. Tinna var í heimsókn hjá okkur þessa helgi og er sannkallaður gleðigjafi. Þol okkar til að sinna þörfum hennar er þó svolítið takmarkað því hún er algjört orkubúnt með ótakmarkað energi. (Já, ég sletti þegar ég tel mig þurfa þess og er nokkuð viss um að sletturnar skiljast.) 

Samkvæmt frétt sem ég las einhversstaðar (sennilega í dv.is) er frægt fólk nú farið að verða „væntanlegir Íslandsvinir“. Þetta finnst mér nú nokkuð langt gengið. Hingað til hafa menn getað orðið Íslandsvinir alveg án alls biðtíma.

Svo er það víst í dag sem réttarhöldin yfir Bradley Manning hefjast. Við Íslendingar ættum af mörgum ástæðum að fylgjast betur með þeir réttarhöldum en mörgum öðrum. Talsvert virðist fylgst með þeim í Bandaríkjunum. Það er að mínu mati ekki nóg fyrir Bandaríkjamenn að vera í þessum efnum (þ.e. að skjóta saklaust fólk) greinilega mun skárri en mótaðilinn. Þarna er um stríðsglæpi að ræða sem ekki má láta óhegnt. Það er ætlast til að hernaður Bandaríkjamanna sé óaðfinnnanlegur og hann verður að vera það.

Skrautlegur skápur

Athugasemdir

[spritti 3.6.2013 kl. 04:11]

Ég ætla að fá mér svona skúr í garðinn minn og vera með hænur í honum.

[G 3.6.2013 kl. 12:41]

Málsvörn Mannings er barnaleg

Já ég stal peningunum EN ég ætlaði að gefa fátækum svo það á ekki að refsa mér

og fréttastofa RUV er svo hliðholl Manning að maður fær aulahroll

[Sæmundur Bjarnason, 3.6.2013 kl. 16:49]

G, það er miklu meira undir, en það hvort Manning tók eitthvað ófrjálsi hendi. Það er beinlínis um frelsi fjölmiðla og "whistle blowers" í Bandaríkjunum að ræða. Bandarískt réttarfar er það sem aðrir miða við.

[Jón Logi 3.6.2013 kl. 16:53]

"Já, ég stal að vísu upplýsingum um morð sem sópa átti undir teppi" væri nærri titill. Maðurinn er "whistleblower", - en flautar á berg.

Enginn hernaður er óaðfinnanlegur, - það er alltaf þetta "collateral damage", og svo eru alltaf rotin epli hér og þar, sem eiga það til að drepa til sports.

Bandaríkjamenn mega eiga það á síðustu árum að þeirra plön miða að því að lágmarka fall óbreyttra borgara. Það er erfið raun, þar sem óvinurinn notar óbreytta sem skjöld og feluskjól. Og stunda gjarnan "sport-dráp".

Aumingjaskapurinn felst því í því að reyna að sópa óþverra og óhöppum undir teppi og henga bakara fyrir smið. Fyrir allra augum. Manning var víst með eitthvað gall í hálsinum, og setti sönnunargögn á netið, - því skal hann hengdur, en glæpurinn óáreittur.