1761 - Ammæli

Ég fékk svo margar hamingjuóskir á fésbókinni í tilefni af afmælinu að ég treysti mér ekki til að þakka hverjum og einum sérstaklega, eins vert væri að sjálfsögðu. Kærar þakkir öll sömul. Margir minntust líka á afastelpuna sem litlu munaði að ég fengi í afmælisgjöf og ég þakka að sjálfsögðu líka fyrir það.

Benedikt Axelsson sendi mér eftirfarandi vísu sem mér finnst ljómandi góð.

Að eldast gjarnan verðum vér,
oss varla tekst að yngjast.
Á kvennafari færðin er
farin mjög að þyngjast.
Tíminn engin gefur grið.
Gratúlera með afmælið.

Ekki er búið að bíta úr nálinni með óveðrið fyrir norðan. Samkvæmt fréttum er ástandið ýmist betra eða verra en búist var við og það segir manni ákaflega lítið. Einhverjir hafa álasað bændum fyrir að hafa ekki verið búnir að smala, en ég held að enginn hafi búist við svona miklum snjó. Ég hef ekkert vit á þessu og held að ég heimski mig bara á því að vera að fjölyrða um ástandið. Man eftir rafmagnsleysi í rúma viku þegar ég bjó á Snæfellsnesi, en það voru allt aðrir tímar þá.

Eiríkur Örn Norðdahl segir að það sé bölvaður aumingjaskapur að blogga ekki á hverjum degir og þeir sem ekki geti það eigi ekki að fá að blogga. Ég er svolítið sammála þessu en er samt ekkert hræddur um að missa bloggleyfið. Hugleiðingar um hitt og þetta eins og ég ástunda er auðveld leið til að blogga fjandann ráðalausan. Svo er líka hægt að blogga um það hvorn fótinn maður setur fyrr framúr rúminu á morgnana o.s.frv. en slík blogg ganga vafalaust ekki fyrir hvern sem er og jafnvel ekki endalaust fyrir útvalda.

Blóm.

Athugasemdir

[Jón Daníelsson 14.9.2012 kl. 01:23]

Heill þér Sæmundur margfróði.

Þar eð ég er aðeins fáeinum árum yngri en þú - og farinn að sjá hvert stefnir - þá færðu engar hamgingjuóskir frá mér, en hins vegar hjartanlegar samúðarkveðjur :-)

Jón Dan

[Sæmundur Bjarnason, 14.9.2012 kl. 10:17]

Takk og til hamingju með þitt flotta blogg. Ég les það stundum en líklega ekki nærri nógu oft. Það fer svo mikill tími í skrifin og ýmislegt annað.

[Jóhannes Laxdal Baldvinsson, 14.9.2012 kl. 18:12]

 Svona er að fylgjast ekki með.  Missti næstum af þessari færslu.  En í tilefni dagsins sendi ég þér bestu heillaóskir og afmælisbrag sem þó skortir allt nema upphafið og endinn.  En er það ekki eins með lífið? 

Lítur yfir liðna tíð
er lengist ævislóði
Á Vegamótum vistin blíð
var þér Sæmi Fróði

 - - - - - - - - -

Sjötugur er Sæmi nú
þó sjáist lítt þess merki
Vona ég að vaxir þú
og verði margt úr verki

[Sæmundur Bjarnason, 14.9.2012 kl. 21:00]

Takk Jóhannes, fínar vísur. Já, það var gott að vera á Vegamótum!