1600 - "Ég keypti þetta í Hagkaupum"

Gamla myndin.
Veit ekki hver þetta er, en hatturinn er flottur.

Staðarnöfn og fyrirtækjanöfn valda oft ágreiningi. Taka má sem dæmi Bolungarvík. Þar má endalaust deila um hvort réttara sé að tala um einn bolung eða fleiri. Sjálfur er ég vanari Bolungarvík; (en kannski er þó til Bolungavík á Ströndum). Hagkaup er enn eitt ágreiningsefnið. Hvort er nafnið í eintölu eða fleirtölu. Stofnandi fyrirtækisins vildi hafa það í fleirtölu að ég held. Fyrir nokkrum árum virðist markaðsdeild fyrirtækisins hafa ákveðið að orðið væri eintöluorð. Sjálfum finnst mér fleirtalan eðlilegri. Munurinn sést vel á setningunum tveimur hér á eftir: „Ég keypti þetta í Hagkaupum“ eða „ég keypti þetta í Hagkaupi“.

Forsetningarnar sem staðarnöfn og bæjanöfn taka með sér (í eða á) eru svo alveg sérkapítuli og virðist engin regla vera þar á. Mér finnst að málvenja og álit íbúanna eigi að ráða. Þannig sé rétt að segja að hlutir gerist annaðhvort á Selfossi eða í Hveragerði.

Horfði um daginn á endursýningu RUV á Silfri Egils. Allir sem við sögu komu í fyrsta kafla þáttarins (þeim pólitíska) þóttust hafa mikið vit á hagfræði og öllu sem hana snertir. Því miður hafði Egill enga stjórn á þeim og hefur líklega ekki valið réttu þátttakendurna því hver talaði upp í annan og þeir virtust keppast um að vera sem illskiljanlegastir. Það er reyndar venjan þegar talið berst að Hruninu; allir þykjast vita nákvæmlega hvað hefði átt að gera og hvenær og sömuleiðis hvað beri að gera næst og það sem allra fyrst. Sennilega er ég eini maðurinn sem er í miklum vafa um hverjum beri helst að trúa.

Á fréttasíðu RUV er sagt frá því að illa ortir dægurlagatextar geti haft áhrif á heilsuna; valdið útbrotum og vöðvabólgu. Að vísu er fréttin skrifuð þannig að fréttastofan kennir öðrum um að hafa þessa skoðun. Það er samt engin afsökun. Mér finnst þetta arfavitlaust og ábyrgðarhluti af RUV að taka að sér að dreifa annarri eins vitleysu.

Kringlumýrarbraut.

Athugasemdir

[V.Jóhannsson 31.1.2012 kl. 10:46]

Á Dalvík , í Reykjavík. Í Vestmannaeyjum, á Breiðarfjarðareyjum. Á Íslandi, í Þýskalandi. Í Englandi, á Írlandi. Á Ísafirði, í Borgarfirði. Það er erfitt að læra svona stefnulaust tungumál.

[Sigurður Hreiðar, 31.1.2012 kl. 11:05]

Þú gleymdir Eimskipi/Eimskipum. Kannski fleiri? Lýsum eftir því. Sammála þér um botnleysuna í rausinu um hrunið. Best væri ef menn -- þar með talið stjórnarmenn landsins -- gætu hætt þessu þvargi og snúið sér að markvissri endurreisn.

[DoctorE 31.1.2012 kl. 11:06]

Eurovision veldur heilaskemmdum.. í alvöru

[Sæmundur Bjarnason, 31.1.2012 kl. 11:17]

Íslenskan er bara svona; eintómar undantekningar.

Málverndarstarf verður leiðinlegt til lengdar. Málið breytist þó alltaf smám saman, hvað sem við segjum.

Hægt er að forðast Eurovision og þá veldur hún varla heilaskemmdum.

[DoctorE 31.1.2012 kl. 11:39]

Það er ekki svo létt að forðast Eurovision á íslandi, þetta er um allt; Fólk hér á klakanum talar eins og þessi keppni sé eitthvað merkilegt, að þarna sé tónlist í gangi.. magnað ha.
Ég afskirfa allt fólk úr tónlist ef það fer í Eurovision.. fólk sem fer í það ber ekki virðingu fyrir tónlist, veit hreinlega ekki hvað tónlist er, það er algerlega ljóst

Sammála með málverndarstarfið, máið mun þróast hvað svo sem einhverjur íslensku fræðingar vilja.. því meira málverndarstarf, því meira breytist málið frá því sem fræðingar vilja..

[Sigurður Hreiðar, 31.1.2012 kl. 14:35]

Datt Doctore ofan úr skýjunum með þessa Eurovisionfælni sína? Ég sé hana ekki í blogginu hjá þér, Sæmundur.

[Sæmundur Bjarnason, 31.1.2012 kl. 15:34]

Líklega hefur hann verið að hugsa um illa orta dægurlagatexta, sem ég skrifaði eitthvað um.