1334 - Muhammad Ali

Gamla myndin

Er af Erni Jóhannssyni og Reyni Helgasyni sem kallaður var Smalli. Líklega tekin árið 1958 eða svo.

Hef að undanförnu verið að lesa ævisögu Muhammads Ali eftir Walter Dean  Myers. Hann nefnir bókina „The greatest" og er það engin furða.

Bók þessi er gefin út árið 2001 og ég fékk hana frá Amazon um daginn ásamt þónokkrum öðrum bókum.

Muhammad Ali er fæddur árið 1942 og varð fyrst þekktur eftir að hafa sigrað í sínum þyngdarflokki í hnefaleikum á Ólympíuleikunum sem haldnir voru í Róm á Ítalíu árið 1960.

Upphaflega hét hann Cassius Clay eins og margir muna en þegar hann tók Islamstrú tók hann upp nafnið Muhammad Ali.

Heimsmeistari varð hann árið 1964 þegar hann sigraði Sonny Liston. Þegar skrá átti hann í herinn og mögulega senda til Viet Nam setti hann sig upp á móti því og var í staðinn útilokaður frá hnefaleikum í nokkur ár á hátindi getu sinnar og sviptur heimsmeistaratitlinum. Kom samt aftur og vann titilinn að nýju. Sigraði George Foreman í frægum bardaga í Zaire árið 1974 og Joe Frazier í öðrum ekki minna frægum á Filippseyjum árið eftir.

Sinn síðasta boxbardaga háði hann í Nassau á Bahamaeyjum árið 1981 og tapaði honum.

Kveikti Ólympíeldinn eftirminnilega á Ólympíuleikunum sem haldnir voru í Atlanta árið 1996 þá illa haldinn af Parkinsonsveiki.

Muhammad Ali er án efa einhver litríkasti og eftirminnilegasti íþróttamaður allra tíma. Tímaritið Sports Illustrated  útnefndi hann mesta íþróttamann tuttugustu aldarinnar. 

Í gegnum tíðina (dönskusletta) hafa margir andskotast útí orðið blogg og talið það hina ömurlegustu enskuslettu. Svo er þó eiginlega ekki því þó enskir kalli Weblog gjarnan blog þá er bloggið eiginlega búið að eignast þegnrétt á íslensku, þegjandi og hljóðalaust.

Verra er með fésbókina sem virðist vera að taka við af blogginu hvað vinsældir snertir. Hún er ýmist kölluð facebook, fasbók eða fésbók. Fleiri nöfn hef ég heyrt en líkar einna best við að kalla fyrirbrigðið fésbók þó sumir leggi einhverskonar niðrandi merkingu í það.

Farsímana má sem best kalla gemsa mín vegna. Lítil hætta er á að þeim sé ruglað saman við raunverulega gemsa. Það er ekki alltaf hægt að finna orð eins og sími, þota, þyrla, berklar eða bíll sem eru bæði þjálli og styttri en alþjóðlegu orðin. Svo er líka spurning hvort við Íslendingar erum ekki sífellt að verða alþjóðlegri og æ erfiðara að koma á framfæri snjöllum nýyrðum. Þó má gera ráð fyrir að þau breiðist út með leifturhraða ef þau eru nógu góð. MS.is reynir þó og þar er einnig að finna frábært ljóðasafn.

Hér hlýtur sá frægi Ragnar Reykás að eiga heima.

Athugasemdir

[Sigurður Hreiðar, 18.4.2011 kl. 11:17]

Það er eins og góð nýyrði renni inn í málið af sjálfu sér. Og snjallir nýyrðingar hafa verið og eru enn fundvísir á að finna orð sem sjálfkrafa smeygja sér inn í málvitundina. Þota og þyrla hygg ég að bæði séu komin frá Högna Torfasyni sem ég þekkti því miður allt of skamman tíma. Ferna kom frá Tómasi Karlssyni þegar átti að kenna okkur að segja Tetra pac -- og þar stóð mas. MS að baki. Samlæsing kom sjálfkrafa fyrir Central Lock -- og svo má lengi telja. Viðleitni MS er góð, en textarnir sem fylgja stundum arfavitlausir (sbr. nýbúann).

[Sæmundur Bjarnason, 18.4.2011 kl. 13:00]

Já yfirleitt verður maður lítið var við nýyrði en samt getur verið að spurningin sé um að nýyrðasmiðir hafi aðstæður sem henta. Viðleitni MS er ágæt og margt gott hjá þeim. Ágætt að hafa þetta svona á einum stað.