1246 - Meira um WikiLeaks

Nú eru spákonur komnar á kreik og farnar að spá fyrir um næsta ár. Yfirleitt er ekkert að marka þær en þetta er saklaus skemmtun meðan hún meiðir engan. Samt er ekki örgrannt um að einhverjir trúi þessu.

WikiLeaks málið er merkilegasta fréttamálið sem fram hefur komið á þessu ári og því er hvergi nærri lokið. Það er fyrst og fremst barátta milli stjórnvalda og almennings þó stjórnmál blandist auðvitað þar inní. Óeining innan WikiLeaks samtakanna auðveldar stjórnvöldum e.t.v. að ná sínu fram.

Tengsl málsins við Ísland gera það að sjálfsögðu áhugaverðara fyrir okkur og vel getur verið að við eigum næsta leik. Ómögulegt er að segja hvort tengsl Íslands við málið eigi eftir að aukast eða minnka.

Málfrelsi á netinu og höfundarréttur hvers konar finnst mér skipta miklu máli. Ég gæti gerst afar langorður um þau mál. Því fer fjarri að þar sé allt eins klippt og skorið og sumir vilja vera láta. Tölvur og Internet hafa gjörbreytt heiminum á tiltölulega fáum árum og sú breyting er langt frá því að vera um garð gengin.

Stjórnmál munu í vaxandi mæli snúast um gegnsæi og leynd. Leyndarhyggja stjórnvalda hefur beðið mikinn hnekki fyrir tilverknað WikiLeaks. Það er þó ekki ásættanlegt að WikiLeaks eða stjórnendur þar ákveði hvað skuli fara leynt. Stundum er slík leynd bráðnauðsynleg.

Fjölyrt er núna nokkuð um hugsanleg stjórnarslit. Í því sambandi vil ég bara minna á að væntanlega er þingrofsheimild í höndum Jóhönnu Sigurðardóttur. Össur ræður þar eflaust einhverju og að sjálfsögðu Steingrímur. Ástæðulaust er fyrir þau að fara á taugum þó stjórnarandstaðan hafi hátt.

Mér finnst erfitt að skilja íslenska pólitík. Get t.d. ómögulega áttað mig á hvort Guðbjörn Guðbjörnsson og hans menn eru hægra eða vinstra megin við Bjarna Benediktsson og afganginn af sjálfstæðisflokknum.

Þegar rætt er um stjórnmál er freisting að vera persónulegur. Flest blogg eru það. Samt er það ekki árangursríkt til langframa. Stefnan ætti að vera það mikilvægasta og er það yfirleitt hvað sem hver segir.

Tvær mílur = þónokkrir kílómetrar.

Athugasemdir

[Jon Danielsson 30.12.2010 kl. 02:02]

Heill Sæmundur.

Þú segir: "Málfrelsi á netinu og höfundarréttur hvers konar finnst mér skipta miklu máli. Ég gæti gerst afar langorður um þau mál."

Ég hef iðulega velt þessu talsvert fyrir mér og þætti vænt um að sjá a.m.k. heilan pistil um "þau mál" - jafnvel framhaldsþáttaseríu ef þú nennir.

Og þú getur verið óhræddur. Það leiðist fáum að lesa pistlana þína.

Góðar kveðjur - Jón Dan.

[Sæmundur Bjarnason, 30.12.2010 kl. 06:21]

Takk Jón. Að undanförnu hefur þróunin í þessum málum hlaupið svolítið frá mér en á sínum tíma þegar ég stóð að Netútgáfunni ásamt fleiru kynnti ég mér höfundarréttarmál ágætlega. Var áskrifandi að nokkrum póstlistum og las allt sem ég fann um þessi mál. Salvör Gissurardóttir lektor er margfróð um þessi mál og hefur oft skrifað um þau. Hef fylgst með þeim "torrent" málum sem upp hafa komið hérlendis og sjóræningjaflokknum í Svíþjóð, Smáís og samskonar samtökum o.s.frv. Einhverntíma hef ég bloggað um þetta. T.d. um jólin í fyrra, einnig 15/4 ´08,9/4 ´08 og 4/3 '08 og sömiuleyðis 13/11 09. Þarf að útbúa fyrir grúskara mögleika fyrir utanaðkomandi að leita i bloggunum mínum þau eru svo mörg og það er vel hægt. Kannski bið ég bara Moggabloggsguðina að gera það.

[Axel Þór Kolbeinsson, 30.12.2010 kl. 10:25]

Það er reyndar bara Forseti sem getur rofið þing, en það gerir hann að sjálfsögðu ekki nema allar aðrar leiðir hafa verið skoðaðar við að mynda stjórn.  Jóhanna hefur hinsvegar stjórnarmyndunarumboðið.

[Sæmundur Bjarnason, 30.12.2010 kl. 11:43]

Hingað til hafa forsætisráðherrar (eða þeir sem með svokallaða þingrofsheimild hafa farið) skipað forseta eða látið hann framkvæma þingrof. ÓRG er illútreiknanlegur en ekki er trúlegt að hann gangi móti þeirri hefð. Það er huglægt hvenær allar leiðir til stjórnarmyndunar hafa verið reyndar. Stundum hefur þingrof mælst mjög illa fyrir.

[Vendetta, 30.12.2010 kl. 18:35]

"Yfirleitt er ekkert að marka þær ..."

Leiðrétting: Það er aldrei neitt að marka þær. Þetta eru allt svindlarar, sem geta ekki sagt fyrir um neitt, ekki frekar en hr. Jón og frú Gunna. En þær fá athygli vegna þess að blaðasnápar sem ekkert þarfara hafa að gera en að fylla upp með trivial nonsense, eins og t.d. á sorpsneplinum DV.

Hins vegar skrifaði ég tvo spádóma á blogginu mínu 2007 (að mig minnir), sem hafa rætzt og eru enn að rætast. Og það án þess að ég sé að auglýsa spádómsgáfu mína.

[Bjarne Örn Hansen 30.12.2010 kl. 20:45]

Þegar þú talar um "málfrelsi", þá verður mér hugsað um tvo hluti. Fyrir það fyrsta dettur mér í hug "pikkadilly" í Bretlandi, og þegar menn stóðu á torgum þar í landi og héldu ræður um það sem menn töldu skipta máli. Mér dettur í hug börn sem voru hengd fyrir að stela epplum, vegna svengdar. Og þá dettur mér í hug, að maður hefur ekki leifi til að "spila inn" það sem maður heirir, eða sér. Ekki má ég taka mynd af henni Jónu og birta, nema með leifi hennar Jónu.

Hafa menn velt því fyrir sér, að ef svona strangar reglur hefðu verið í gildi á tímum iðnbiltingarinnar. Þá hefðu wright bræður átt erfitt um vik að finna upp flugvélina.

[Bjarne Örn Hansen 30.12.2010 kl. 20:50]

Ég vil einnig strika undir eina staðreynd í þessu sambandi.  Að á sama tíma, og verið er að eltast við dreifingu á myndefni á netinu, eru þessir sömu aðilar að standa fyrir þessari sömu dreifingu.  Það sem verra er, að Pétur eða Páll getur ekki sótt um leifi til að dreifa myndefni á netinu.  Þetta, samkvæmt þeim sjálfum, er aðeins hægt að gera með leyfi þeirra í Bandaríkjunum, en á sama tíma standa þeir sjálfir fyrir slíkri mynd dreifingu (Samanber SF í Svíþjóð).  Á fagmáli, kallast þetta fyrir "einokun", og ég veit ekki betur en að slíkt sé í hæsta máta ólöglegt ... og svo ekki sé á minst, svívirðilegar viðskipta aðferðir.

[Sæmundur Bjarnason, 30.12.2010 kl. 23:26]

Alveg rétt, Vendetta. Það er aldrei neitt að marka svona spádóma. Ekki miðla heldur og ekki drauga en það getur verið erfitt að draga mörkin í einstökum tilfellum og ekki hægt að neita öllu. 

[Sæmundur Bjarnason, 30.12.2010 kl. 23:29]

Bjarne, höfundarréttarmál eru margflókin og ekki hægt að mynda sér skoðun á þeim sem getur tekið yfir allt og gilt um aldur og æfi. Við eigum ekki að láta slíkt ofbeldi sem beitt er í WikiLeaks-málinu yfir okkur ganga. Stjórnvöldum hættir ætíð til að ganga of langt.