1210 - Stjórnlagaþing VI

Hin sögufræga stjórnlagaþingskosning nálgast óðfluga. Fésbókin er varla lesandi lengur og bloggið litlu betra. Þar er þó frekar hægt að forðast ósköpin finnst mér. Auðvitað koma allar þessar kynningar einhverjum til góða og óþarfi að vera að vorkenna sjálfum sér útaf fyrirferð kosninganna. Hefðbundnir fjölmiðlar vilja helst ekkert af þeim vita. Ríkisútvarpið var þvingað til að sinna þeim svolítið. 

Sögufrægu segi ég og meina það. Þjóðaratkvæðagreiðslan fyrir nokkru var auðvitað söguleg líka. Þar voru þó greidd atkvæði að mestu í tilgangsleysi og þar að auki í óþökk sumra stjórnmálaafla. Ekkert slíkt er til staðar nú og ég á von á að kjörsókn verði mikil. Flokkarnir eru orðnir verulega hræddir sýnist mér flest benda til. Hættan á því að allt fari í rifrildi og vitleysu á stjórnlagaþinginu sjálfu er þó vissulega fyrir hendi.

Kristján Óli Hjaltason sendi mér eftirfarandi áminningu. Auðvitað var ég búinn að taka eftir því að Baldur er í framboði og ætla að kjósa hann. Góð vísa er samt aldrei of oft kveðin:

„Eins og fram hefur komið þá er bekkjarbróðir okkar Baldur Óskarsson í framboði til Stjórnlagaþings.  Baldur sendi mér þennan pósti sem ég áframsendi til ykkar með hvatntingu að styðja Baldur en með því vitum við að "rödd okkar" verður á Stjórnlagaþingi."

„Þessi póstur" er svona:

„Ég hef ákveðið að bjóða mig fram til stjórnlagaþings. Með þessum pósti er ég að leita eftir  stuðningi  ykkar við framboðið með því að kjósa mig til þingsins.  Ég er sá eini úr hópi Bifrestinga sem útskrifuðust úr Samvinnuskólanum eins og hann var og hét sem býður sig fram. Hér er því tækifæri til að fá fulltrúa okkar hóps á hið merkilega þing. Ég vek athygli ykkar á að því ofar sem ég er á seðlinum ykkar, þeim mun þyngra vegur atkvæðið.  Með von um góðar undirtektir."

Mér finnst þessi fésbók vera algjörlega rugluð. Er stundum að reyna að skilja hana en þeim mun dýpra sem ég fer í stillingar og annað þessháttar því óskiljanlegri verður hún (bæði á ensku og íslensku). Svo sé ég ekki betur en sífellt sé verið að breyta henni. Annars er ég kannski bara svona vitlaus. Aðrir virðast geta skrifað allan fjandann þarna.

Bráðum getur fólk bara setið við tölvuna allan daginn og haft margfalt betri samskipti við ættingja og vini en nokkurntíma var mögulegt í kjötheimum. Meira að segja kaffið er betra þegar maður hellir sjálfur uppá svo tími kaffikerlinganna er eiginlega liðinn. Aumingja Ketilríður hennar Guðrúnar frá Lundi. Ekki hafði hún síma eða tölvu en komst þó af. Drapst að vísu fyrir rest en það gerum við víst öll.

Er ekki kominn tími til að segja allri þessari tölvuvitleysu stríð á hendur? Mér finnst það. Var einu sinni áskrifandi að blaði sem barðist gegn notkun tölva í skólastarfi og fann þeim ýmislegt til foráttu. Já, og auðvitað var því dreift á Internetinu, meira að segja á póstlista, svo gamalt er þetta mál.

IMG 3772Svanur á steini.


« Síðasta færsla | Næsta færsla »

Athugasemdir

1 Smámynd: Grefill

Er ekki hægt að finna betra orð en "kjötheimar" yfir jarðneskar vistarverur okkar til aðgreiningar frá tölvuheiminum og öðrum heimum og geimum?

Þar sem hingað leggja leið sína ýmsir málræktarmenn skora ég á þá sömu að yfirgefa ekki svæðið fyrr en að minnsta kosti ein tillaga liggur hér eftir þá.

Grefill, 24.11.2010 kl. 00:54

2 identicon

Ég er að tölvast í mannheimum.

Guðmundur Bjarnason 24.11.2010 kl. 03:27

3 Smámynd: Sæmundur Bjarnason

Grefill, mér finnst orðin netheimar og kjötheimar ekkert slæm og þau eru engin nýjung. Netheimar getur vel gengið finnst mér sem þýðing a enska orðinu "cyberspace" en veit ekki vel hver andstæðan er þar. Kjötheimar er lýsandi en vel er hægt að hugsa sér betra orð og ekki sakar þó þau séu mörg. 

Sæmundur Bjarnason, 24.11.2010 kl. 09:05

4 Smámynd: Sæmundur Bjarnason

Guðmundur, mannheimar finnst mér vera andstæðan við dýrheima og ekki alveg nógu lýsandi. T.d. finnst mér internetið vera í mannheimum. Auðvitað eru tröll og allskyns forynjur svo og draugar ekki í mannheimum. Líklega er Guð sjálfur og allt sem yfirnáttúrulegt er ekki heldur í mannheimum.

Sæmundur Bjarnason, 24.11.2010 kl. 09:10

5 Smámynd: Jóhannes Laxdal Baldvinsson

Grefill, ekki brjóta heilann. hann er það dýrmætasta sem þú átt.

Jóhannes Laxdal Baldvinsson, 24.11.2010 kl. 09:20

6 Smámynd: Sæmundur Bjarnason

Jóhannes, en við Grefill viljum vita hvað þú vilt nota í stað kjötheima, ef eitthvað. Heilinn í Grefli er ekkert brothættari en í öðrum, bara asnalegri. 

Sæmundur Bjarnason, 24.11.2010 kl. 09:28

7 Smámynd: Sæmundur Bjarnason

Grefill út um borg og bý
býr til marga feila.
Er nú líka eftir því
með asnalegan heila.

Sæmundur Bjarnason, 24.11.2010 kl. 09:36

8 Smámynd: Jóhannes Laxdal Baldvinsson

Sæmi, mér finnst engin ástæða til að aðgreina þessa heima. Hjá mér rennur þetta saman og styður hvort annað. Ég er ekki sammála þeim sem telja netsamskipti eitthvað óæðri. Veruleikinn er sá sami en tíminn öðlast nýja vídd á netinu.

Og smá skot á þá sem ekki koma fram undir nafni

Veruleikinn virðist mér
vefjast fyrir mönnum
sem bera nick og nýta sér
nafnleysið í hrönnum

Jóhannes Laxdal Baldvinsson, 24.11.2010 kl. 10:59

9 Smámynd: Sæmundur Bjarnason

Netsamskipti eru öðruvísi. Blanda af báðum er best. Ef netsamskipti útrýma öðrum samskiptum eru þau neikvæð.

Grefilli er gaman nú,
glennast margar fjaðrir.
Yrkir Jói útúr kú
eins og sumir aðrir.

Sæmundur Bjarnason, 24.11.2010 kl. 11:24

10 Smámynd: Jóhannes Laxdal Baldvinsson

Skýtur föstum skeytum á
og skotmarkið er Grefill
Dynja glósur dólgnum frá
af drengskap ekki snefill

Jóhannes Laxdal Baldvinsson, 24.11.2010 kl. 11:40

11 Smámynd: Sæmundur Bjarnason

Jóhann telur örlög ill
og ójafnt drengskap varið.
Glósur mínar grafa vill
og grætur mjög við svarið.

Sæmundur Bjarnason, 24.11.2010 kl. 11:56

12 Smámynd: Jóhannes Laxdal Baldvinsson

Sama er mér alveg um
órétt sem þú beitir
og gaman hef af glósunum
því grefill ekkert heitir

Jóhannes Laxdal Baldvinsson, 24.11.2010 kl. 12:21

13 Smámynd: Sæmundur Bjarnason

Jú, Grefillinn heitir eitthvað. Man bara ekki í augnablikinu hvað.

Fonnemaður finnst mér þú
frekar vera núna.
Á Bjarnastöðum baul er nú
því bóndann vantar kúna.

Sæmundur Bjarnason, 24.11.2010 kl. 12:33

14 Smámynd: Jóhannes Laxdal Baldvinsson

Frægðar sólin Sæma er sest
á sama augnabliki
og hann sem vita mundi mest
ef minnið ekki sviki

Jóhannes Laxdal Baldvinsson, 24.11.2010 kl. 12:53

15 Smámynd: Jóhannes Laxdal Baldvinsson

það á ekkert er að vera í fyrstu ljóðlínu.

Frægðar sólin Sæma sest
á sama augnabliki
og hann sem vita mundi mest
ef minnið ekki sviki

Jóhannes Laxdal Baldvinsson, 24.11.2010 kl. 13:17

16 Smámynd: Sæmundur Bjarnason

Með aðstoð Gúgla frænda komst ég að því að Grefill heitir Guðbergur Ísleifsson og ég held að það sé ekkert leyndarmál.

Flyst nú Jói á friðarstól;
finnst það engum mikið.
Yrkir nú um sína sól
sunnan yfir strikið.

Sæmundur Bjarnason, 24.11.2010 kl. 13:35

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Innskráning

Ath. Vinsamlegast kveikið á Javascript til að hefja innskráningu.

Hafðu samband