1119 - DV ollir ýmsu

Flestir eiga sér sínar uppáhalds málfarslegu vitleysur ef svo má segja. Það fer hræðilega í taugarnar á mér þegar ég sé að blaðamenn og aðrir málsmetandi menn kunna ekki að beygja rétt í kennimyndum sterku sögnina að valda. Þetta er þó ótrúlega algengt. Þessi tilvitnum hér fyrir neðan er úr DV.is og þó orðið „kynferðismisnotkunarmálin" sé afkáralegt og alls ekki blaðamanni sæmandi er sögnin að „olla" sem kemur rétt á eftir margfalt verri að mínum dómi.

segir Hildur Eir Bolladóttir, prestur í Akureyrarkirkju, um kynferðismisnotkunarmálin sem hafa ollið miklu umtali um hæfni Þjóðkirkjunnar til að bregðast við slíkum málum.

Auðvitað er það hrein smámunasemi að vera að finna að málnotkun og þessháttar þegar önnur og miklvægari mál skekja þjóðfélagið. Þjóðkirkjan er greinilega í vanda og vörn. Vinstri menn sækja hart að henni. Biskupinn fer undan í flæmingi og búast má við að trúmál verði stjórnmálunum að bráð. Stjórnarandstaðan sækir hart að ríkisstjórninni og ekkert er athugavert við það. Stuðningsmenn ríkisstjórnarinna fara undan í flæmingi og reyna að hefna þess í héraði sem hallast á í þjóðmálum.

Bloggarar hafa hátt og reyna að valda sem mestu uppnámi. Búast má við hávaðasömu Alþingi og að talsvert muni reyna á fjölmiðla.

Samkvæmt rannsókn sem ég las einhvers staðar um eyðir fólk í fyrsta heiminum nærri helmingi vökustunda sinna við samskiptatæki. Síðan eru talin upp sjónvörp, símar og tölvur og sögð vera þau samskiptatæki sem rætt er um. Einhver er þarna afar illa að sér. Útvarp og bækur og blöð eru a.m.k. jafnmikil samskiptatæki og sjónvörp. Bílar jafnvel líka. Margir halda sig á Netinu m.a. til að lesa. Fréttir af þessu tagi eru alveg út í hött. Lífshættir fólks eru þó að breytast. Nútildags eyðir fólk ekki nærri eins stórum hluta vökustunda sinna til vinnu eins og áður var. Sé aukinn frítími notaður vitlega getur hann sannarlega verið til góðs. Of miklar frístundir geta líka verið til tjóns. 

Og nokkrar myndir:

Kópavogsfjara.

Reyniber.

Fylgst með fésbókinni.

Reisulegt hús á Álftanesi.

Fíflalegur þessi.

Tómatur ættaður úr stofuglugga.

Athugasemdir

[Sigurður Þór Guðjónsson, 25.8.2010 kl. 00:58]

Flottur kisi.

[Matthías Ásgeirsson, 25.8.2010 kl. 08:57]

> Þjóðkirkjan er greinilega í vanda og vörn. Vinstri menn sækja hart að henni.

Snýst þetta virkilega um vinstri og hægri í pólitík? Hvað segir það okkur þá um hægri menn?

[Sæmundur Bjarnason, 25.8.2010 kl. 09:12]

Já, mér finnst trúarmálefni í vaxandi mæli vera orðin pólitísk. Menn hafa forðast að ræða þau á þann hátt en ég er ekki frá því að pólitík skipti þarna máli.

[Ólafur Sveinsson 25.8.2010 kl. 09:55]

Ég veit ekkert um hvort prestarnir sem studdu biskupinn og lugu fyrir hann 1996, séu vinstri/hægri. Vitið þið það? Vinir mínir, stuðningsmenn D listans, sækja hart að Karli í þessu máli.

Það var aðallega eftir að Karl lét þau orð falla, eftir fundinn með dóttir Ólafs þar sem hann sagði eitthvað á þá leið "ég mun geyma þessi orð í hjarta mér" og ætlaði síðan að gera ekkert með þau að hafa.

[Sæmundur Bjarnason, 25.8.2010 kl. 10:01]

Hugtök eins og hægri/vinstri hjálpa stundum til skilnings á málefnum en eru enginn stóri dómur um skoðanir fólks. Auðvitað blandast allt svona saman á allan hugsanlegan hátt.

[Hólímólí 25.8.2010 kl. 10:22]

Mér finnst þetta frekar vera spurning um "upp" og "niður" en hægri/vinstri.

[Sigurður Hreiðar, 25.8.2010 kl. 19:11]

Mér sýnist þú stefna í að olla fjaðrafoki, Sæmundur.

[Hólímólí 25.8.2010 kl. 20:55]

Það skyldi þó aldrei vera að hann ollaði slíku, hann Sæmi?

[Sæmundur Bjarnason, 25.8.2010 kl. 21:09]

Hvort skyldi það fjaðrafok fremur stafa af ollingunni eða samblöndun trúmála og stjórnmála? Er ég einn um það að finnast trúleysi vera svolítið til vinstri en að guð sé dálítið hægrisinnaður. (og jafnvel með stórum staf)

[Hólímólí 25.8.2010 kl. 21:22]

Guð er uppi, Sæmi minn, þú ert hérna niðri með okkur hinum. Sættu þig við það.

[Sæmundur Bjarnason, 25.8.2010 kl. 21:31]

Ég hef aldrei tekið trúarjátninguna bókstaflega. Fannst hún óttaleg steypa meira að segja þegar ég var fermdur. Hafði þó ekki uppburði í mér til að gera neitt í málinu. Þegar talað er um stefnur og strauma finnst mér gagnlegra að tala um hægri/vinstri en upp/niður.

[Hólímólí 25.8.2010 kl. 22:50]

Hey ... þarna er kannski komið verðugt deilumál? Hvernig væri nú að blogga um þetta og athuga hvort ekki sé hægt að koma af stað logandi umræðum um hvort Guð sé til hægri, vinstri, uppi, niðri, úti, inni eða jafnvel fyrir norðan?

[Sæmundur Bjarnason, 25.8.2010 kl. 23:17]

Ég sé að þú skrifar guð með stóru gé-i. Það finnst mér ofrausn. Við gætum deilt um það og dregið stafsetningu og jafnvel réttritun inn í þetta allt saman. Ætli Guddi sé ekki bara að fara hringinn, ef hann er fyrir norðan?

[Hólímólí 25.8.2010 kl. 23:30]

Mér skilst að þeir sem fara norður séu á leiðinni niður, alla vega í þeirri merkingu sem ég átti við. En blessaður farðu nú ekki að agnúast út í að Guð fái stórt G, hann hefur víst fengið að þola nóg undanfarið þótt hann missi ekki G-ið líka.

[Sæmundur Bjarnason, 26.8.2010 kl. 00:05]

Grefillinn í góm sletti
og gretti sig í framan.
en guð með sínum G-bletti
gekk víst allur saman.

[Hólímólí 26.8.2010 kl. 00:24]

Ha, ha, góður :-)

Góða nótt Sæmundur. Guð blessi þig og þína.