1103 - Skattskráin 2010

Að Moggabloggsvist mín skuli vera ókeypis með góðri þjónustu og tryggja þar að auki allnokkra útbreiðslu hefur vissulega áhrif á ákvörðun mína um tryggð við þetta bloggsvæði. Það hefur líka áhrif að Moggabloggið var alveg frá upphafi úthrópað sem óalandi og óferjandi af snobbelítunni í blogginu. Mér er alveg sama um það og líka sama þó sumir Moggabloggarar næli sér í meiri vinsældir en þeir eiga í rauninni skilið með því að krækja í sem flestar og mest krassandi fréttir.

Það er árleg skemmtun að rífast um skattskrána. Blöðin velta sér sem mest uppúr þessu og þeir sem eru á móti hamast við að útskýra af hverju tekjur eigi að vera leyndarmál. Aðeins er leyfilegt að skoða þetta í visst langan tíma og ýmsar takmarkanir eru á skoðuninni. Þetta millibilsástand er asnalegt. Þeir sem eru svo óheppnir að blaðamenn álíti þá fræga verða að sæta því að fá birtar upplýsingar um það opinberlega hverjar tekjur þeirra eru. Aðrir sleppa.

Eðlilegast væri auðvitað að þetta væri með öllu lokað alltaf eða opið öllum á netinu.

Langstærsti galli bloggsins er hve pólitísk skrif eru þar áberandi. Það efni virðist vera vinsælt og heimsóknir margar hjá þeim sem það stunda. Margir þeirra leggja áherslu á að tengja blogg sín við fréttir á mbl.is. Það getur verið beggja handa járn því fréttirnar takmarkast við það sem gerist á hverjum tíma og pólitíska sýnin hjá mbl.is er oft skrýtin. Svo keppast bloggarar jafnan við að vera sem neikvæðastir og oft eru þeir hver öðrum líkir í umfjöllun sinni.

Annar stór flokkur í blogginu er málfarsumræðan. Hún er oft mjög smásmuguleg og leiðinleg. Auk þess er vafamál að hún geri nokkurt gagn. Til þess er hún of tilviljanakennd og losaraleg. Þeir sem helst þyrftu á málfarslegum leiðbeiningum að halda lesa hana greinilega ekki.Til hvers er þá að vera að þessu?

Athugasemdir

[Anna Sigríður Guðmundsdóttir, 7.8.2010 kl. 01:02]

Sæll Sæmi! Skattsráin kemur okkur öllum við og á að sjálfsögðu að vera aðgengileg öllum landsmönnum allt árið!

Það er án nokkurs vafa réttur almennings í skattskyldu ríki? Sá sem borgar skatt á rétt á að vita að réttlætinu sé framfylgt af öllum! Við viljum öll hafa heilbrigðisþjónustu og svo framvegis!!!!!!! Eða hvað?

Þeir sem ekki borga skatt og þiggja t.d. heilbrigðisþjónustu? Hvað eru þeir?

En ég veit líka að lægstu laun duga hvorki fyrir nauðsynjum né meiru og hafa ekki gert í áratugi á Íslandi! Þess vegna ýtir þessi ólíðandi láglauna-stefna verkafólks í þessu landi undir skattsvik til að þurfa ekki að kaupa sér stóra frystikistu fyrir sig og sína til að sofa í þar til verkalýðsforystan vaknar aftur!!!

Eða kannski ættu sviknir að prófa að fara á beit í vegköntunum eins og vestfjarðar-rollurnar? M.b.kv.

[Sæmundur Bjarnason, 7.8.2010 kl. 01:12]

Blaðamenn misnota skattskrána. Það er eins og þeir séu oft að hneykslast á lágum tekjum þekktra manna og gefa í skyn að þeir svindli nú gróflega.

Ef allt væri uppi á borðinu væri minni ástæða til að hneykslast. Auðvitað eru tekjur manna misjafnar. 

[Ragnar Eiríksson, 7.8.2010 kl. 08:50]

Hér má sjá þjónustuna sem norska blaðið Aftenposten veitir um framtalið og þar fylgir sjálf skattskráin -

http://skattelister.aftenposten.no/skattelister/start.htm

Auðvitað á skattskráin að vera öllum aðgengileg, alltaf, þo ekki væri nema í þágu jafnréttis,   margir hafa aldrei lausan tíma milli 930 og 1500 en það er opnunartími sýsluskrifstofunnar hér á Sauðárkróki!

Af hverju ætti ég að hafa betri aðgang að norsku skattskránni?

Kveðja,

Ragnar

[Sæmundur Bjarnason, 7.8.2010 kl. 09:09]

Sammála þér Ragnar. Með nútíma tækni ætti að vera ósköp auðvelt að koma þessu í kring. Þeir sem græða á öllum sínum "Tekjuskattsútgáfum" mundu auðvitað tapa á því en hverjum er ekki sama. Sumir vilja líka hafa sínar tekjur í friði fyrir forvitnum augum og kannski líka í friði fyrir skattinum.

[Ragnar Eiríksson, 7.8.2010 kl. 09:12]

Þetta er greinilega ekki komið í gegn í Danmörku því þar finn ég þetta hjá skattinum þar -:

B 22: Forslag til folketingsbeslutning om åbne skattelister (offentliggjort den 01-11-2006) oktober 2006 af Morten Homann (SF), Anne Baastrup (SF), Poul Henrik Hedeboe (SF) og Ole Sohn (SF) Folketinget pålægger regeringen at fremsætte lovforslag om åbne skattelister straks i den kommende folketingsamling, således at alle borge...

L 120: Betænkning over Forslag til lov om ændring af forskellige love. (Konsekvensændringer som følge af lov om et indkomstregister) (offentliggjort den 31-03-2006) SF har yderligere peget på, at forslaget kunne udvides med indførelsen af åbne skattelister efter norsk forbillede. Men SF anerkender de praktiske og juridiske problemer, som skatteministeren har peget på i forhold til at gennemføre dette i forbindelse med det foreliggende lovforslag. Et ande...

L 119: Betænkning over Forslag til lov om et indkomstregister (offentliggjort den 31-03-2006) SF har yderligere peget på, at forslaget kunne udvides med indførelsen af åbne skattelister efter norsk forbillede. Men SF anerkender de praktiske og juridiske problemer, som skatteministeren har peget på i forhold til at gennemføre dette i forbindelse med det foreliggende lovforslag. Et ande...

 Hér geta menn skoðað umræðurnar og svor ráðherra um opna skattalista:

 http://www.skat.dk/SKAT.aspx?oId=399409&vId=0&search=skattelister

[Sæmundur Bjarnason, 7.8.2010 kl. 10:41]

Datt aldrei í hug annað en að skattayfirvöld og stjórnmálamenn sæu á þessu allskonar vankanta.

[Ben.Ax. (Benedikt Jóhannes Axelsson), 7.8.2010 kl. 18:59]

Það, sem þú segir í lok greinar, Sæmundur, finnst mér orka tvímælis. Umræða um íslenskt mál er alltaf að mínu mati gagnleg og sjaldan leiðinleg. Hvort hún ber árangur eða ekki er umdeilanlegt. En við megum ekki gleyma því að tungumálið gerir okkur að þjóð og því betur sem það er talað og ritað þeim mun betur tekst okkur að skilja hvert annað. Því miður er margt, sem sett er á blað, til dæmis lög, svo klúðurslegt að fáir skilja og þegar dæmt er eftir illskiljanlegum lögum er varla von á góðu. Sem dæmi má nefna dóm um gengistryggð lán. Í lögum, sem vitnað er til, finn ég hvergi ákvæði þess efnis að lánin séu ólögleg. Samkvæmt dómi hæstaréttar eru þau það samt.

[Sæmundur Bjarnason, 7.8.2010 kl. 22:06]

Mér finnst stór hluti af málfarsumræðunni vera þannig að hún fæli þá frekar frá fræðslu um íslensku sem mest þurfa á henni að halda. Ástæðan fyrir því að íslenskan breyttist svona lítið í aldanna rás er sennilega einangrun landsins. Nú er henni lokið og þá er hætt við að gömlu aðferðirnar dugi ekki. Umfram allt þarf málfarsumræðan að vera þannig að sem flestir geti notið hennar. Of miklar og neikvæðar umvandanir eru hugsanlega ekki það sem skortir.