970 - Eigi skal strippa

Lastaranum líkar ei neitt
lætur hann ganga róginn.
Finni hann laufblað fölnað eitt
fordæmir hann skóginn.

         (Veit ekki eftir hvern þessi vísa er.)

VG: „Er þetta fíkjublað eða hvað á myndinni hér fyrir ofan?"

GV: „Það veit ég ekki."

VG: „Andskotans klám er þetta. Svona lagað ætti að banna."

Hlustaði á útvarp í bílnum mínum í kvöld. Verið var að ræða um bankaleynd og einhverjir að tala við Helga Hjörvar. Hann vildi ekki gera mjög mikið úr tregðu bankanna á að veita upplýsingar. Annar fyrirspyrjandinn sagði þá:

„En hvernig túlkar þú þennan trega?"

Í því slökkti ég á útvarpinu því ég var kominn á leiðarenda. Held að fyrirspyrjandinn hafi ætlað að spyrja um tregðu bankanna og kannski hefur hann leiðrétt sig. En það er margs að gæta þegar talað er í útvarp.

Grófasta dæmi sem ég þekki um misnotkun á kommentakerfum er frá þeim tíma þegar ég las reglulega blogg Ágústar Borgþórs Sverrissonar. Verið var að ræða um einhver skrif og einhver sagði: „Eyrbyggja er betri." Og peistaði Eyrbyggju eins og hún lagði sig. Mér er þetta enn minnisstæðara vegna þess að á sínum tíma skrifaði ég upp alla Eyrbyggju og setti hana á Netið. Það var nú þá.

Og fáeinar myndir:

Hörpudiskur.

Fyrirtækismerki - ekki sem verst.

Skútur í Kópavogi.

Girðing að gefast upp.

Gangstéttar eru aðallega fyrir bíla eins og allir vita. Einkum jeppa að sjálfsögðu.

Athugasemdir

[Jóhannes Laxdal Baldvinsson, 25.3.2010 kl. 00:19]

Var það ekki Káinn sem orti um lastarann?

[Jón Steinar Ragnarsson, 25.3.2010 kl. 01:42]

Það var Steingrímur Thorsteinson.

[Hrannar Baldursson, 25.3.2010 kl. 06:42]

Eyrbyggja er mín uppáhalds Íslendingasaga. :)

Ljóðið er snilld.

[Þorsteinn Briem, 25.3.2010 kl. 08:09]

Fólin á RH 587,
fýsnin bar þar ofurliði,
í bílnum fóru úr brókum tvö,
en blöðin fölnuð á þeim viði.

[Jóhannes Laxdal Baldvinsson, 25.3.2010 kl. 12:45]

só, hvort er þetta blogg um "bann við nektardansi" eða "lög um bankaleynd"?

Ég hef sterkar skoðanir á hvoru tveggja svo það sé á hreinu

[Sæmundur Bjarnason, 25.3.2010 kl. 14:17]

Hrannar: Eyrbyggja hefur allt.

Jóhannes: Þetta fjallar bæði um nektardans og bankaleynd. ýmislegt annað líka og þar að auki fjalla myndirnar um hitt og þetta eins og Steini áttar sig vel á. Ef það sem skrifað er vekur einhverjar hugsanir hjá lesandanum er tilganginum náð.

[Jóhannes Laxdal Baldvinsson, 25.3.2010 kl. 14:22]

Mæltu manna heilastur
mikli Hvera-Sæmundur
En Steini er okkar stórastur
við steypu-rím og leirbakstur

[Jóhannes Laxdal Baldvinsson, 25.3.2010 kl. 14:26]

p.s þetta er þá svona einskonar soft porn? Vekja hugrenningar segirðu..

[Gunnar Th. Gunnarsson, 25.3.2010 kl. 14:44]

Ég held að "fíkjublaðið" á efstu myndinni sé elri

[Grefillinn Sjálfur - Koma svo! 25.3.2010 kl. 15:47]

Bölvaður dónaskapur er þetta. Sérstaklega myndin af uppgefnu girðingunni. Á hún að vera táknræn fyrir hugsunarhátt kvenna?

[Sæmundur Bjarnason, 25.3.2010 kl. 15:58]

Fín vísa, Jóhannes. Rímið er ekki allt.

Gunnar, nú eyðilagðirðu allt.

Grefill, ég get ekki tekið ábyrgð á hvað mönnum dettur í hug. Ef girðingin minnir þig á hugsunarhátt kvenna þá verður bara svo að vera.

Flottar hugleiðingar. Svona eiga sýslumenn að vera.

[Sæmundur Bjarnason, 25.3.2010 kl. 17:25]

Jóhannes baunar á Steina
óvininn eina og hreina.
Rím hans er ranglega metið
rétt eins og blessað ketið.

[Jóhannes Laxdal Baldvinsson, 25.3.2010 kl. 18:06]

Nei , ég met Steina mikils, en hann liggur bara svo assgoti vel við höggi

[Kama Sutra, 25.3.2010 kl. 18:24]

Steini er skemmtilegur.  Hann mætti fara að blogga aftur.

[Sæmundur Bjarnason, 25.3.2010 kl. 18:26]

Þetta er tilraun. Sumir geta sett myndir í athugasemdir, aðrir ekki. Í DV var birt mynd af fólki á Fimmvörðuhálsi. (röng mynd). Af því tilefni datt mér í hug:

Flóttamenn á Fimmvöruhálsi
fæturnir toga í burt.
En þeir sem fórnuðu sínu frelsi
fá nú að vera um kjurt.

Hef ekki hugmynd um hvort mér tekst að koma myndinni hér í athugasemdina.

http://saemi7.blog.is/admin/album/#album_-1_image_973977

[Sæmundur Bjarnason, 25.3.2010 kl. 18:31]

OK, ekki virkar það. Myndin var heldur ekki merkileg. Má sjá á DV.

[Þorsteinn Briem, 25.3.2010 kl. 21:47]

Sæmi var á sjónum,
með sjötíu og níu rónum,
á lækjum og bláum lónum,
lifðu á tómum grjónum.

[Kama Sutra, 25.3.2010 kl. 21:56]

[Theódór Norðkvist, 26.3.2010 kl. 11:52]

Til að setja myndir í athugasemdir:

Fara í grafískan ham og slá inn

<img src="slóð myndar" width="x" height="y">

Passa að myndir séu með opnar slóðir, ekki slóðir þar sem þarf innskráningu. Má sleppa widht og height, hægt að stýra stærð með því að fara aftur í HTML-ham.

Þá er tölvunördahorninu lokið í dag. Góðar stundir.

[Theódór Norðkvist, 26.3.2010 kl. 12:58]

Fara fyrst í HTML-ham, setja síðan inn mynd (<img src=.....>) og í grafískan ham til að breyta stærð myndar. Sneri þessu við.

Núna er tölvunördahorninu lokið.

[DoctorE 26.3.2010 kl. 15:31]

Ég er nú bara svona viðvaningur í vísnagerð.. en

Naktar dömur klúbbum á
Ekki sækir Sæmi í
Bregður hann sér frekar frá
að kíkja á kakkalakka á Kanarí

[Gunnar Th. Gunnarsson, 26.3.2010 kl. 15:57]

DoctorE, þú gast sparað þér ómakið að taka það fram að þú værir viðvaningur á þessu sviði ......

[DoctorE 26.3.2010 kl. 16:05]

[Kama Sutra, 26.3.2010 kl. 18:33]