900 - Fréttablogg

Gott að þeir voru ekki á Evuklæðum, hún hefði orðið foj við. Og svo áfram.

Guð er aumingi segir Sigurður Þór Nimbus á sínu bloggi, en leyfir engar athugasemdir við þá færslu. Það er nú reyndar aumingjaskapur líka en vel skiljanlegur.

„Því að svo elskaði Guð heiminn að hann gaf son sinn eingetinn til þess að hver sem á hann trúir glatist ekki heldur hafi eilíft líf." Þetta lærði ég einu sinni eins og páfagaukur og fékk Jesúmynd í ramma fyrir á stúkufundi hjá Sigurþóri. Samt finnst mér ég ekki vera trúaður og strax um fermingu eða fyrr var ég farinn að efast mikið og ekki hefur trú mín styrkst síðan.

Ég er miðnæturbloggari og hef hingað til forðast að fréttablogga. Geri samt stundum vísur sem ég set á visur7.blog.is og hengi þær í fréttir á mbl.is. Gefst vel. Blogga eiginlega aldrei með hliðsjón af einhverju sem ég sé á Moggavefnum. Sumir hengja sín blogg samt oft í einhverjar fréttir og eru ekkert hræddir við takkann sem Mogga-guðirnir hafa sett fyrir þá sem vilja tilkynna vafasöm fréttablogg. Nýlegar og krassandi fréttir eru heldur ekki algengar um miðnæturleytið. Ætla samt að prófa þetta.

Vonandi fyrirgefst mér á efsta degi þó mér hætti til að rugla þeim saman Jórunni Frímannsdóttur og Þorbjörgu Helgu Vigfúsdóttur. Báðar eru þær að ég held borgarfulltrúar Sjálfstæðisflokksins í Reykjavík. Í farsanum sem fram fór fyrir nokkru og kallaður var „blaðamannafundir vegna nýs meirihluta " man ég af einhverjum ástæðum betur eftir smáatviki á einum þeirra en flestu öðru sem þar fór fram. Þar komu annaðhvort Jórunn eða Þorbjörg við sögu.

Framarlega í flokknum
finnst mér hún um stund.
Skálmar hún í skokknum
skyndilega á fund.

Fékk nýlega bréf í tölvupósti frá Atlantsolíu. Í því stóð ekki annað en þetta: „Smelltu hér ef þú getur ekki skoðað póstinn eins og hann á að vera."  
Ég sá ekkert til að smella á og auk þess er ég ekki viss um hvernig pósturinn á að vera. Þarna er greinilega um að ræða gallaða hugsun annaðhvort hjá mér eða bréfritara.

5188 er að verða eins fræg tala og atkvæðin sem Ólafur F. Magnússon tónaði eða tuldraði í sífellu í Spaugstofuþættinum fræga og var víst atkvæðafjöldinn sem flokkur hans hlaut i borgarstjórnarkosningunum. Man samt ekki hver talan var. 5188 er fjöldinn sem þátt tók í „þjóðaratkvæðagreiðslunni" á Eyjunni. Semsagt marklaus könnun. Marktækar skoðanakannanir held ég samt að hafi sýnt meirihluta kjósenda andvígan Icesave-ríkisábyrgðinni. Líka hafa margir skorað á Ólaf Ragnar að skrifa ekki undir ríkisábyrgðarlögin. Getur orðið spennandi alltsaman.

Vestfirskir fótboltamenn á Adamsklæðum

Athugasemdir

[Rósa 19.12.2009 kl. 00:30]

Góð vísa. Mér er hún líka minnisstæð þegar hún skálmaði á skokknum. Það var Þorbjörg og handleggjunum sveiflaði hún um sig.

[Þorsteinn Jónas Skjóldal Haraldsson, 19.12.2009 kl. 00:47]

Sæmundur þú ert hvalur,hvort á skjóta þig eða friða.Love you long time my friend.

have a cabana and class orance djúsi

[Sigurður Þór Guðjónsson, 19.12.2009 kl. 11:03]

Hvernig væri að þú getir þess hvers vegna ég leyfi ekki athugasemdir Sæmundur við þessa færslu en ég gat um það í færslunni. Ég er búinn að fá nóg af því að vera kallaður öllum illum  nöfnum og nú ert þú að bætast í þann hóp.

[Sæmundur Bjarnason, 19.12.2009 kl. 15:09]

Takk Rósa. Tók líka eftir handleggjaslættinum þó ekki sé minnst á hann í vísunni.

Þorsteinn. Hæ. Við erum ekki alveg á sömu bylgjulengd en gaman að heyra frá þér.

Sigurður. Þú ert of viðkvæmur. Þú hefur ekki full yfirráð lengur yfir efni sem þú ert búinn að setja á Netið.
Ætlaði að spyrja þig um loftslagsgreinina sem var horfin en sé að hún er komin aftur.

[Brjánn Guðjónsson, 19.12.2009 kl. 17:14]

las guðsbloggið hanns Sigurðar og langaði að kommenta, en ég skil fyllilega hans sjónarmið að leifa ekki athugasemdir við færsluna. líklega hefðu hrúgast þar inn allir ésúbloggarar landsins og haft í frammi leiðindi eða reynt að sannfæra hann um sannleikann.

[Sigurður Þór Guðjónsson, 19.12.2009 kl. 17:50]

Mér finnst ekkert  sjálfsagt að ég hafi opið fyrir trúmen sem ég hef reynt af langri reynslu að beita ekki málefnalegum rökum gegn hugmyndum mínum, hversu vitlausar sem þeim finnst þær, en einbeita sér þess í stað að því að gera lítið úr mér sem persónu. Það er það sem þeir gera alltaf. Mér finnst ekki sjálfsagt að leyfa þeim þá ánægju.

[Axel Þór Kolbeinsson, 21.12.2009 kl. 11:27]

7454 er fjöldinn sem tók þátt.  5188 er fjöldi þeirra sem vilja að frumvarpið verði fellt og 2144 fjöldi þeirra sem vilja sjá það samþykkt.  122 tóku ekki afstöðu.