893 - Þjóðaratkvæðagreiðsla

Verði Icesave-samkomulagið samþykkt í núverandi mynd þurfa Íslendingar að..... Undir þessum orðum er mótmælt hástöfum og mótmælafundir haldir. Samkvæmt skoðanakönnunum er meirihluti fólks á þeirri skoðun að Icesave-samkomulaginu beri að vísa frá. Flokkssjónarmið og ríkisstjórnarstuðningur virðist þó ráða miklu um afstöðu fólks til þessa máls. 

Alþingi samþykkir væntanlega Icesave-samkomulagið og ef forsetinn er sjálfum sér samkvæmur og hefur framtíð embættisins í huga, neitar hann að undirrita lögin. Þá verður væntanlega þjóðaratkvæðagreiðsla um þau. Alveg óháð því hvað ríkisstjórnin gerir mun sú atkvæðagreiðsla auk annars snúast um líf hennar. Meirihluti kjósenda virðist fyrir því að samþykkja ekki lögin um Icesave. Óvíst er þó að svo verði þegar þjóðaratkvæðagreiðslan fer fram ef af henni verður.

Þó ríkisstjórninni takist kannski að koma Icesave-samkomulaginu í gegnum þjóðaratkvæðagreiðslu, mun henni varla takast að koma ESB-samningi af neinu tagi í gegnum Alþingi eins og það er núna. Stjórnin mun því hrökklast frá völdum áður en kjörtímabilið er úti og í næstu Alþingiskosningum mun einkum verða kosið um ESB þó fleiri mál verði til umræðu. Lengra nær spá mín ekki.

Tilraunin með Borgarahreyfinguna mistókst. Fjórflokkurinn blívur. Þá er helst að reyna að breyta flokkunum innanfrá. Hugsanlega er það að gerast þessi misserin. Kemur betur í ljós í næstu kosningum. Verði þjóðaratkvæðagreiðsla um Icesave getur hún veitt vísbendingu um breytingar. Við Íslendingar höfum alltaf verið háðir erlendu valdi. Svo er enn og verður áfram. Getum ekki haft raunveruleg áhrif en þó verið öðrum þjóðum fyrirmynd um margt. Einkum þó friðsemina. Í búsáhaldabyltingunni fyrir tæpu ári var ég aldrei hræddur um að hlutirnir færu úr böndunum.

Oft er gefið í skyn að frægt fólk sé heimskt. Svo er alls ekki. Þó Paris Hilton, Britney Spears, Madonna, David Beckham, Ásdís Rán, Gilzenegger og Bubbi Morthens hafi eflaust sína galla er enginn vafi á að sitthvað er í þau spunnið og gáfur hafa þau áreiðanlega vel yfir meðallagi. Það þarf hæfileika til að geta vafið fjömiðlamönnum um fingur sér þó ekki sé annað. Sum þeirra eru reyndar aðallega fræg fyrir að vera fræg en það þarf hæfileika til þess líka.

Athugasemdir

[Þorsteinn Briem, 12.12.2009 kl. 01:06]

Það eru nokkur ár í þjóðaratkvæðagreiðslu um aðild Íslands að Evrópusambandinu og  núverandi ríkisstjórn var ekki mynduð um IceSave.

Geir H. Haarde og Árni M. Mathiesen samþykktu að greiða þá reikninga sem forsætisráðherra og fjármálaráðherra.

[Sæmundur Bjarnason, 12.12.2009 kl. 01:17]

Niðurstaða úr samingaviðræðum við ESB ætti að geta legið fyrir áður en kjörtímabili núverandi stjórnar á að ljúka árið 2013. Mest áríðandi fyrir ríkisstjórninga núna er að koma Icesave í gegn. Það getur tafist. Talsverðar breytingar þurfa að verða á afstöðu þingflokka til að ESB-samningur komist í gegnum Alþingi. Ekki er það samt útilokað.

[Þorsteinn Briem, 12.12.2009 kl. 01:57]

Það skiptir engu máli núna hvernig þjóðaratkvæðagreiðsla um aðild Íslands að Evrópusambandinu fer eftir nokkur ár. Samningaviðræðurnar taka að öllum líkindum tvö ár og þegar samningurinn liggur fyrir þarf að kynna hann rækilega hér og ræða í allt að eitt ár.

Líklegast verður því kosið um aðildina hér samhliða alþingiskosningunum vorið 2013, enda liggur ekkert á að kjósa um aðildina. Það tekur einnig nokkur ár að fá að taka upp evru hér í stað íslensku krónunnar.

Hér hefur aldrei verið þjóðaratkvæðagreiðsla á lýðveldistímanum og stjórnarskráin segir nú lítið um þær. Til dæmis gæti meirihluti Alþingis krafist aukins meirihluta í þjóðaratkvæðagreiðslu, til dæmis 2/3.

Þar að auki er forseti Íslands nú þegar búinn að samþykkja með undirskrift sinni lög um að IceSave-reikningarnir verði greiddir, bæði fyrrverandi og núverandi ríkisstjórn hafa samþykkt það, svo og meirihluti Alþingis.

Það er því algjör þráhyggja að halda að IceSave-reikningarnir verði ekki greiddir.

2009 nr. 96 2. september Lög um heimild til handa fjármálaráðherra, fyrir hönd ríkissjóðs, til að ábyrgjast lán Tryggingarsjóðs innstæðueigenda og fjárfesta frá breska og hollenska ríkinu til að standa straum af greiðslum til innstæðueigenda hjá Landsbanka Íslands hf.

[Kama Sutra, 12.12.2009 kl. 02:08]

Mig grunar að margir þingmenn Sjálfstæðisflokksins, og líklega einhverjir Framsóknarmenn, fái stóra hlandgusu fyrir hjartað ef Icesave-samningarnir verða felldir - þótt þeir láti núna eins og berserkir gegn þeim.

[Sæmundur Bjarnason, 12.12.2009 kl. 02:20]

Steini, ég minnist þess ekki að hafa haldið fram að ekki eigi að greiða Icesave reikningana. Tel samt að forsetinn geti kallað fram þjóðaratkvæðagreiðslu. Geri hann það tekur frumvarpið samt gildi en fellur aftur úr gildi verði það fellt. Bretar og Hollendingar sætta sig ekki við lögin frá í sumar svo gagnslaust er að þau taki gildi aftur. Það er alls ekki ólíklegt að Ólafur samþykki lögin og þau er það mál frá og hægt að snúa sér að öðru.

[Þorsteinn Briem, 12.12.2009 kl. 02:33]

Ríkisstjórnin gæti látið núgildandi lög duga ef forseti Íslands neitar að skrifa undir breytingar á þeim. Bretar og Hollendingar vilja að sjálfsögðu fyrst og fremst fá IceSave-reikningana greidda og myndu því aldrei mála íslenska ríkisstjórn út í horn í þeim efnum.

"9. gr. Lög þessi öðlast þegar gildi. Ákvæði laga nr. 121/1997, um ríkisábyrgðir, að undanskilinni 5. gr. þeirra laga, gilda ekki varðandi þá ábyrgð sem lög þessi taka til."

2009 nr. 96 2. september Lög um heimild til handa fjármálaráðherra, fyrir hönd ríkissjóðs, til að ábyrgjast lán Tryggingarsjóðs innstæðueigenda og fjárfesta frá breska og hollenska ríkinu til að standa straum af greiðslum til innstæðueigenda hjá Landsbanka Íslands hf.

[Sæmundur Bjarnason, 12.12.2009 kl. 11:14]

Þetta er allt að verða svo flókið að þýðingarlaust er að vera að spá einhverju. Alþingi samþykkir lögin eða ekki við þriðju umræðu og ef lögin verða samþykkt þá mun forsetinn annaðhvort skrifa undir þau eða ekki. Hvað svo tekur við er bara ekki gott að segja. Auk þess getur orðið um allskyns viðauka eða eitthvað þessháttar að ræða.

[Þorsteinn Briem, 12.12.2009 kl. 12:32]

4.7.2004: "Fjölmiðlalög dregin til baka

Ríkisstjórnin kom saman til fundar kl. 18:00 í kvöld. Fyrir fundinum lá að ganga endanlega frá lausum þáttum tengdum frumvarpi til laga um þjóðaratkvæðagreiðslur og að ná samkomulagi um frumvarp sem lagt skyldi fram á þingfundi á morgun.

Þess í stað var samþykkt á fundinum að afturkalla fjölmiðlalögin, sem samþykkt voru á Alþingi 24. maí sl. og Ólafur Ragnar Grímsson, forseti Íslands, synjaði um samþykki sitt 2. júní sl., og leggja þess í stað fram nýtt frumvarp um eignarhald á fjölmiðlum á sumarþinginu sem hefst á morgun."

Fjölmiðlalögin dregin til baka

Þjóðaratkvæðagreiðslur hérlendis - Wikipedia

1944 nr. 33 17. júní Stjórnarskrá lýðveldisins Íslands

"1. gr. [...] Lögin gilda einnig um framkvæmd þjóðaratkvæðagreiðslu sem fer fram skv. 3. mgr. 11. gr., 26. gr. og 2. mgr. 79. gr. stjórnarskrárinnar."

þskj. 118 frumskjal forsrh., 112. mál: þjóðaratkvæðagreiðslur (heildarlög) frv.

[Jóhannes Laxdal Baldvinsson, 12.12.2009 kl. 20:11]

Þetta þus og tuð um ríkisábyrgðina á eftir að fjara út og menn munu átta sig á hvað Steingrímur var að fara þegar hann sagði í sumarbyrjun að Icesave samningurinn væri ekki það versta sem við okkur blasti.  Forsetinn mun ekki beita sér gegn stjórnvöldum í þessu máli. Hann hlýtur að átta sig á að þetta er ekki þess eðlis að hægt sé að vísa í þjóðaratkvæði.

Verkefni ríkisstjórnarinnar er svo í kjölfarið á samþykkt ríkisábyrgðarinnar að sannfæra okkur um að þeir sem ábyrgð bera á röngum ákvörðunum verði látnir svara til saka og stjórnvöld muni ganga fram af fullri einurð til að endurheimta góssið á hendur útrásardólganna.  Ef þjóðin treystir því ekki þá skiptir engu hvort stjórnin stendur eða fellur