886 - Grímulaus árás

Sé ekki betur en blaðamannafundur stjórnarandstöðunnar og tillaga um að vísa Icesavemálinu frá sé árás á ríkisstjórnina. Tvísýnt er um að hún takist. Líklegt er að viðbrögð ríkisstjórnarinnar ráði mestu um hvernig fer. Einkennilegt er að í áskorun stjórnarandstöðunnar er lagt til að ESB miðli málum.

Gefið er í skyn að ríkisstjórnin ætli sér að láta handhafa forsetavalds samþykkja Icesave frumvarpið en ekki forsetann sjálfan. Það væri hættulegur leikur hjá stjórninni.

Þingmaður úr stjórnarliðinu leggur til að Icesave málið verði tekið úr höndum Alþingis. Sú lausn kann að verða ofaná.

Vinsælt er af mörgum sem vilja vera hátíðlegir í þingræðum að fjölyrða um sögu landsins. Auðvelt er að túlka hana á margan hátt. Sumir reyna að fyrna mál sitt sem mest og tala sem hæst.

Fyrir nokkru sá ég ógleymanlegt brot úr kvikmynd. Þar var einhverfur drengur að staulast niður stiga eða tröppur og hafði mikið fyrir því sem flestum hefði verið auðvelt. Held að þetta hafi verið úr íslensku kvikmyndinni sem nefnd er „Sólskinsdrengurinn."

Nú eru sagðar fréttir af því að HBO sjónvarpsstöðin bandaríska hafi keypt þessa mynd og að hún verði hugsanlega tilnefnd til Óskarsverðlauna.

Á uppboði hjá góða hirðinum voru ýmsir áhugaverðir munir til sölu. Mesta athygli mína vakti gamaldags þvottabretti sem kaupandinn ætlaði að nota sem einhvers konar taktstokk. Sú var tíðin að þvottabretti voru ekki spor merkileg. Man vel eftir slíkum hlutum í notkun. Einnig taurullum sem nú er alveg hætt að nota. Þvottabretti voru svo algeng áður fyrr að notkun orðsins í óeiginlegri merkingu um slæma malarvegi skildu allir.

Myndræn framsetning hugmynda getur verið af því góða. Slík framsetning tíðkast mjög á Netinu. Vel er þó hægt að setja flestar hugmyndir í orð.

Mjög hefur tíðkast undanfarið hjá stórum fyrirtækjum að tala fremur um svið en deildir. Til dæmis eru flestar tölvudeildir nú orðnar að upplýsingasviðum. Þá sé ég jafnan fyrir mér sviðahaus með gulum minnismiða. Þetta væri einfalt að setja fram á myndrænan hátt.

Athugasemdir

[Eygló, 5.12.2009 kl. 00:17]

Þú hefðir þá fengið snert af bráðkveddu með mér þegar ég fór eitt sinn í Íbúðalánasjóð (eða hét það ennþá Húsnæðismálastofnun þá?) Allavega var stofnunin/sjóðurinn til húsa á Suðurlandsbrautinni.

Þar voru ýmis svið; lánasvið, innheimtusvið og fleira sem maður hló svo sem ekkert að, svona upphátt allavega. Þangað til að manni varð litið yfyrir ofan einar dyrnar sem hafa að líkindum sýslað með ýmsa sjóði... þar stóð:  "Sjóðasvið"

[Sæmundur Bjarnason, 5.12.2009 kl. 00:47]

Konan mín var eitt sinn í Sókn og var fremur uppsigað við ráðsfólk þar. Einu sinni sagði ég henni að verið væri að heimta að selja Sókn. Ég hefði að minnsta kosti séð skilti þar sem á stóð "Seljasókn".

[Eygló, 5.12.2009 kl. 01:45]

Segið svo að ekki sé hægt að skemmta sér við skiltalestur og fleira sem í fyrstu virðist fáfengilegt.

[Skorrdal 5.12.2009 kl. 04:09]

"Gefið er í skyn að ríkisstjórnin ætli sér að láta handhafa forsetavalds samþykkja Icesave frumvarpið en ekki forsetann sjálfan. Það væri hættulegur leikur hjá stjórninni."

Hótaði ekki Davíð Oddsson að skrifa sjálfur undir fjölmiðlalögin - sem handhafi forsetavalds - og sniðganga þannig forsetann (eða láta einhvern hinna af handhöfunum gera það - kemur niður á það sama)? Mig minnir það. Þá kallaði Sigurður Líndal slíka aðgerð nánast landráð - og ég var honum sammála þar. Ég stend enn við þá skoðun.

[Eygló, 5.12.2009 kl. 15:22]

Ef e-r ætlar/ætla að koma málum þannig fyrir, hlýtur það líka að flokkast undir glæpsamlegt athæfi (þótt ég þekki ekki lögin) jah, og - ef ekki landráð!!!

[Sæmundur Bjarnason, 5.12.2009 kl. 16:45]

Það er alveg sama hvað Ólafur gerir hann lendir í vandræðum. Líkllega kæmi honum best að ríkisstjórnin tæki Icesave útúr þinginu.

[Kristinn Pétursson, 5.12.2009 kl. 19:26]

Þetta er alveg makalaus fyrirsögn hjá þér.  Af 6 lögmönnum sem hafa tjáð sig síðustu daga - er  3 með málinu - en vilja ekki láta hafa neitt skriflegt eftir sér.

Hinir þrír eru þungavigtarmenn í  2 af virtustu lagaprófessorum okkar  ásamt einum hæstaréttarlögmanni - þeir  skrifuðu  sameiginelga grein í Morgunblaðið í vikunni um að hæpið væri að málið stæðist stjórnarskrá.  Það var þó alla vega skrifleg gögn...

Mýmörg atriði málsins eru flókin og þarfnast mikillar vinnu til að  það geti talist ábyrgt að sú faglega vinna sé nægileg til að fólk átti sig á málinu.

Svo eru þeir sem eru greinilega pólitískt staurblindir og skeyta engu um stjórnarskrá eða önnur grundvallaratriði.

Ég spyr þig: Eru þeir sem kæra sig kollótta um hvort stjórnarskráin er brotin eða ekki - eru þeir eitthvað betri en bankamennirnir sem kærðu sig kollótta um hvernig  hvort  verið væri að skapa þjóðinni áhættu með því hversu glannalega og  geyst var farið í bankamálinu.

ER þú ánægður - ef farið er jafn  geyst og glannalega núna - af hálfu ríkisstjórnarinnar - þegar ekkert rökstutt liggur fyrir - um að það liggi neitt á - nema í að koma örðum málum  áfram í þinginu - öllu öðru en Icesave málinu.

[Sæmundur Bjarnason, 5.12.2009 kl. 20:25]

Kristinn. Takk fyrir skörulega og málefnalega athugasemd. Málþófsmenn þurftu að sanna fyrir stjórnarsinnum og öðrum að aðgerðir þeirra beindust ekki að því að fella ríkisstjórnina. Það gerðu þeir ekki á blaðamannafundinum. (A.m.k. ekki skv. frásögn mbl.is af honum).

Það sem síðan hefur gerst bendir til þess að einhvers konar samkomulag hafi tekist þrátt fyrir fundinn.

Ég skil vel að ég sé samkvæmt þínum skilningi "staurblindur pólitískt og skeyti ekkert um stjórnarskrána", en við því er ekkert að gera. Þú hugsar áreiðanlega aldrei pólitískt.