848 - Búsáhaldabyltingin

Þegar mótmælendur grýttu lögregluþjóna við Stjórnarráðshúsið í janúar í vetur og almennir borgarar úr röðum mótmælenda stilltu sér upp á milli grjótkastaranna og lögreglunnar held ég að legið hafi við raunverulegu byltingarástandi hér á Íslandi. Þjóðin hafi hinsvegar sýnt að hún vill ekki slíkt og þeir sem kalla eftir byltingu núna eru að misskilja ástandið. 

Umtalað er hve Moggablogginu hefur hrakað að undanförnu. Tvennt er það einkum sem ég hef haft til viðmiðunar um vinsældir þess. Til að komast í sæti 400 á vinsældalistanum hefur oft þurft svona þrjú til fimmhundruð vikuheimsóknir. Nú eru þær 195. Hinsvegar er það hve langt er síðan nýr bloggari númer 400 kom. Nú eru 112 dagar síðan og ég held að áður fyrr hafi dagarnir verið miklu færri. Það erum við sem eftir erum hér sem væntanlega tryggjum áframhaldandi vinsældir Moggabloggsins. Það er að segja ef það verður áfram vinsælt. Reyndar veit ég ekki hve margir heimsækja mbl.is eða blog.is og hvert hlutfall þeirra er í heildarvefheimsóknum netverja hér á landi en mælingar eru til um það og segja sennilega til um auglýsingaverð.

Flest sem um Schengen-samkomulagið er sagt er afskaplega neikvætt. Fæstir skilja mikið í því og alls ekki hver fengur er í því fyrir okkur Íslendinga. Þegar verið var að koma þessu á var sagt að kostirnir væru margir. Meðal annars áttum við að geta fengið strax allar upplýsingar sem við þyrftum um glæpamenn sem legðu leið sína hingað. Ekki held ég að það hafi gengið eftir. Mér vitanlega eru þeir ekki sérmerktir þegar þeir koma.

Jú, eitt er sennilega Schengen að þakka. Við eigum tiltölulega auðvelt með að losa okkur við óæskilega hælisleitendur. Kannski er það ekki sérlega jákvætt fyrir hælisleitendurna, en ekki verður við öllu séð. Eitthvað hlýtur að vera jákvætt við Schengen þó Bretar og Írar hafi ekki komið auga á það.

Og nokkrar myndir í lokin sem teknar voru í rokinu í dag.

Svanir og endur.

Skýjafar í Árbænum.

Er þetta hvönn?

Önd í öldugangi.

Vatnsflaumur í Elliðaárdalnum.

Athugasemdir

[Sveinn hinn Ungi 29.10.2009 kl. 09:04]

Ég leit þannig á, að mótmælin væru til að þrýsta á kröfurnar sem settar voru fram á fundunum. Nýjar kosnigar, burt með stjórnir Seðlabanka og FME. Þegar gengið var að þessu, þá hættu mótmælin. Ekki var ætlunin að taka völdin með ofbeldi.

Varðandi bloggarann sem hvarf, Halldór Egilsson, þá hefur mér dottið í hug sú samlíking, að þetta sé eins og í Argentínu á sínum tíma. Þar hurfu menn bara. Ekkert var tilkynnt um neitt. Síðar kom í ljós að flogið var með mennina út á haf og þeim hent í sjóinn.

Hérna eru bloggarar farnir að hverfa og ekkert er tilkynnt um málið. Enginn fær að vita hvað það var sem leiddi til þessa. Svona er stjórnað hér á moggablogginu. Menn vita ekkert hvað er í gangi, en sumir bara hverfa.

[Sæmundur Bjarnason, 29.10.2009 kl. 09:18]

Ég á við að hlutirnir hefðu vel getað farið úr böndunum. Einhverjir hafa örugglega viljað raunverulega byltingu.
Hugleiðingar þínar um Halldór Egilsson eru áhugaverðar en ég hef ekki trú á að þær séu réttar. Verulegur fengur væri samt í að vita meira um það mál.

[Sveinn hinn Ungi 29.10.2009 kl. 10:19]

Við vitum ekkert um málið. Maðurinn bara hvarf. Þetta er frekar óþægilegt.

[Anna Einarsdóttir, 29.10.2009 kl. 10:43]

Mér finnst Moggablogginu hafa hrakað verulega síðan Davíð kom.  Öfgafullir Sjálfstæðismenn virðast nú hafa misst allar hömlur og þeir komast auðvitað upp með það.  Það væri líklega skynsamlegt fyrir allt venjulegt fólk að yfirgefa svæðið, láta þessa leiðindaskarfa sem enn kjósa sérhagsmunaflokkinn vera eina eftir og þá myndu fáir lesa hérna. 

[Sæmundur Bjarnason, 29.10.2009 kl. 13:27]

Takk Sveinn og Anna. Mér finnst slæmt að heyra ekki meira af Halldórsmálinu. Veit ekki alveg með Moggabloggið. Hélt að það væri ekki alfarið undir afkomu Morgunblaðsins komið. Ef menn halda áfram að lesa mbl.is þá ætti Moggabloggið að geta haldið áfram.